Yoshua 21 - Mukanda Wa Zambi 1970

Membo ja Alevi

^1-2 Miata ja akwa jiko lia vungu lia Levi yaaya ku Shilo, mu chifuchi cha Kanana, akalitakane ni hako Eleazare, ni Yoshua mwana wa Nune, ni miata ja majiko ja mavungu eswe ja Israele. Yaamba ngwo: “Mwene Zambi hanambila Mose hanga atwehe membo tutwame mo, hamwe ni ulishilo wa yimuna yetu.”

³ Chenacho, nikulita ni liji lia Mwene Zambi, Aisraele ahanyine kuli Alevi amwe membo ni ulishilo wa yimuna yo.

⁴ Chela chitangu yichibwa cha jimo lia Kohate, e aliangile kutambula membo. Majiko ja vungu lia hako Arone yaatetela membo kumi ni atatu a mu yifuchi ya Yuda, ni Simeone, ni Benjamine.

⁵ Atu a ku jimo lia Kohate, waze asalile ho, yaatetela membo kumi a mu yifuchi ya Efraime, ni Dane, ni Manase a ku chitokelo.

⁶ Jimo lia Gershone yaatetela membo kumi ni atatu a mu yifuchi ya Isakare, ni Ashere, ni Naftali, ni Manase a ku chivumbuko.

⁷ Majiko ja jimo lia Merari yaatetela membo kumi ni aali a mu yifuchi ya Rubene, ni Gade, ni Zabulone.

⁸ Chenacho Aisraele atele chela nikuteta membo wano, ni ulishilo wa yimuna yo, kuli Alevi, ngwe chize Mwene Zambi ambilile Mose.

^9-19 Majiko ja Arone, a ku jimo lia Kohate, e atangu kutambula membo. Yaatambula membo kumi ni atatu, hamwe ni ulishilo wa yimuna yo. Mu yifuchi ya Yuda ni Simeone yaatetela membo livwa: Libna, ni Jatire, Eshtemoa, ni Holone, ni Debire, ni Ayine, ni Juta, ni Bete Shemeshe, ni Arba, hamwe ni ulishilo wa yimuna yo. Arba te jina lia tato ya Anake. Limbo lize musono kakulivuluka ngwo, Hebrone, limwe limbo lia kuchinyina mu chifuchi cha milundu cha Yuda. Ye minda ni yihunda ya limbo lize te haayitetela kulu kuli Kaleba, mwana wa Jefune. Ku vungu lia Benjamine, majiko ja Arone yaalambula membo awana: Gibeone, ni Geba, ni Anatote, ni Almone, hamwe ni ulishilo wa yimuna yo.

^20-26 Majiko akwo a ku jimo lia Kohate a ku vungu lia Levi yaalambula membo kumi, hamwe ni ulishilo wa yimuna yo. Ku vungu lia Efraime yaatambula membo awana: Bete Horone, ni Kibzaime, ni Gezere, ni Shekeme, limwe limbo lia kuchinyina mu chifuchi cha milundu cha Efraime. Ku vungu lia Dane yatambula membo awana: Elteke, ni Gibetone, ni Aijalone, ni Gatrimone, hamwe ni ulishilo wa yimuna yo. Ku vungu lia Manase ku chitokelo yaatambula membo aali: Tanake, ni Gatrimone, hamwe ni ulishilo wa yimuna yo.

^27-33 Jimo lia Gershone, mbunga yikwo ya Alevi, yaatambula membo aali a mu chifuchi cha Manase ku chivumbuko: Golane mu Bashane (limwe limbo lia kuchinyina) ni Beshtera, hamwe ni ulishilo wa yimuna yo. Mu chifuchi cha Isakare yaatambula membo awana: Kishione, ni Daberate, ni Jarmute, ni Enganime, hamwe ni ulishilo wa yimuna yo. Mu chifuchi cha Ashere yaatambula membo awana: Mishale, ni Abdone, ni Helkate, ni Rehobo, hamwe ni ulishilo wa yimuna yo. Ku chifuchi cha Naftali yaaha membo atatu: Kedeshe (limwe limbo lia kuchinyina), mu Galilea, hamwe ni ulishilo wa yimuna yo, ni Hamote Dore, ni Kartane. Membo eswe a majiko a ku jimo lia Gershone te kumi ni atatu, hamwe ni ulishilo wa yimuna yo.

^34-40 Alevi waze asalile ho a ku jimo lia Merari, yaatambula membo awana a mu chifuchi cha Zabulone: Jokneme, ni Karta, ni Dina, ni Nahalale, hamwe ni ulishilo wa yimuna yo. Mu chifuchi cha Rubene yaatambula membo awana: Bezare, ni Jahaze, ni Kedemote, ni Mefate, hamwe ni ulishilo wa yimuna yo. Mu chifuchi cha Gade yaatambula membo awana: Ramote mu Gileade (limwe limbo lia kuchinyina), ni Mahanaime, ni Heshbone, ni Jazere, hamwe ni ulishilo wa yimuna yo.

^41-42 Mu chifuchi cha Isakare membo waze ahanyine kuli Alevi te makumi awana ni nake, ni ulishilo wa yimuna yo.

Aisraele yaatambula chifuchi cha chihinga

⁴³ Chenacho Mwene Zambi ahele Aisraele chifuchi chize alakenyene tushakulu two. Muze haachizuka, yaatunga mo.

⁴⁴ Mwene Zambi yaaha uhwimino mu chifuchi cheswe, ngwe chize alakenyene tushakulu two. Mukwa kole niumwe wahashile kulimika no, mumu Mwene Zambi yaakwasa ni kwaakumba.

⁴⁵ Mwene Zambi yamanununa yilakenyo yeswe yize alakenyene Aisraele.