Yoshua 20 - Mukanda Wa Zambi 1970

Membo a kuchinyina

¹ Mba Mwene Zambi yambila Yoshua,

² alweze Aisraele ngwenyi: “Tongolenu membo a kuchinyina ngwe chize nambilile Mose anulweza.

³ Nyi umwe mutu hashiha mukwo te kachizangile, mahasa kuchinyina ko hanga alilamwine kuli mutu yoze mazanga kukala usoko wenyi.

⁴ Mahasa kuchinyina ku limwe lia ku membo wano, nikuya ku chisopelo ku chikolo cha lie limbo, ni kulumbunwina miata chize yinakabwa. Mba e miata maamunjisa mu limbo, maamulweza zuwo atwame mo.

⁵ Nyi yoze unakale usoko wenyi mamukaula, akwa limbo kuchatambile kumukunjika ye. Chatamba kumufunga mumu hashiha mutu yoze te kachizangile, ni kamuvwilile ko ufwatulo.

⁶ Mahasa kushimbwila mu limbo ndoo maakamusopesa, ni ndoo ku kufwa cha mwata wa mahako. Makabwamuze mahasa kuhiluka ku chihunda chenyi mwene, kuze akatukile.”

⁷ Mba ku sali lia chitokelo lia lwiji Yordau, mu Galilea, yaatongola Kadeshe, mu chifuchi cha milundu cha Naftali; ni Shekeme, mu chifuchi cha milundu cha Efraime; ni Hebrone, mu chifuchi cha milundu cha Yuda.

⁸ Ku chivumbuko cha Yordau, mu puya ku tunda, ku chivumbuko cha Yeriku, yaatongola Bezere mu chifuchi cha Rubene; ni Ramote mu Gileade, mu chifuchi cha Gade; ni Golane mu Bashane, mu chifuchi cha Manase.

⁹ Wano e membo waze atongwele a kuchinyina Aisraele ni yilambala waze te atwama mukachi ko. Mweswawo mashiha mutu mukwo te kachizangile, mahasa kuswama mo kuli mutu yoze unambe kukala usoko wenyi. Te kahashile kumushiha muze kanda achimusopesa.