Yoshua 2 - Mukanda Wa Zambi 1970

Yoshua yatuma ngendeshi ku Yeriku

¹ Yoshua, ku musumba wa Akasia, yatuma ngendeshi aali ni maliji ngwenyi: “Yeenu nukendese chifuchi cha Kanana, chibichibi limbo lia Yeriku.” Muze ahetele ku lie limbo, yaaya ku zuwo lia umwe pwo chitanji, jina lienyi Rahabe.

² Mwanangana wa Yeriku yevwa ngwo, amwe Aisraele heeza ha ufuku ni kwendesa chifuchi.

³ Mba yatuma liji kuli Rahabe ngwenyi: “Atu waze aali ezanga mu zuwo lie ni kwendesa chifuchi atuhwise!”

^4-6 Rahabe yakumbulula ngwenyi: “Ewa amwe atu ezanga ku zuwo liami, alioze Chanyingikine kuze anakatuka. Kaatuhukanga mu limbo muze te tangwa kanda lichinjila, shimbu te kanda achajila ku chikolo cha limbo. Chanyingikine kuze aya, alioze nyi nunazange, akaulenu nikawashi, munuhasa kwakwata.” (Yaasweka ha fulumba lia zuwo, kushi lia mishachi ya masangu yize anyikine ko.)

⁷ Tunganda twa mwanangana yaatuhuka mu limbo, mba yaakasa ku chikolo. Yaaya ni kufupa ngendeshi ja Aisraele, yaaya ndoo ku chau cha Yordau.

⁸ Shimbu te e ngendeshi kanda achibomba, Rahabe yanyina ha fulumba,

⁹ yaalweza ngwenyi: “Ngunanyingika ngwami, Mwene Zambi hanwaha chifuchi chino. Atu eswe mu chifuchi kaananuvwila woma, haalekumuka.

¹⁰ Hitunevu chize Mwene Zambi omishine kalunga lwiji Muchila kulutwe lienu, muze nwatuhukile mu chifuchi cha Egiptu. Hitunevu nawa chize nwashihile Sihone ni Oge, mianangana aali ja Aamore a ku chivumbuko cha Yordau.

¹¹ Muze twevwile sango jino, yitwivwa woma, Yetu eswe yitulekumuka mumu hali yenu. Mwene Zambi, Zambi yenu, kali Zambi wa mwilu ni hashi.

¹² Haliabwila lishingenu ni jina lienyi ngwenu, munukalinga yibema ku vungu liami ngwe chize hinanulinga yenu, ngulwezenu chimwe chinyingi chize munguhasa kunufuliela.

¹³ Ngulakenyenu ngwenu, munukalamwina tata ni mama, ni mandumbu jami, ni anakwetu, ni akwa majiko jo eswe! Nukatupulule kama ku kufwa!”

¹⁴ Malunga yaamukumbulula ngwo: “Nyi kuuchi kulweza mutu niumwe chize tunambe kulinga, tunakulakenya ngwetu, muze Mwene Zambi makatwaha chifuchi chino, mutukakulinga yibema. Zambi akatushinge nyi kutwalingile chize hitwamba!”

¹⁵ Rahabe zuwo lienyi te hatwama ku songo lia limbo ha chipanga, Chenacho asunwishine malunga mu kapenda ni muhipu uchila.

¹⁶ Ngwenyi: “Yeenu ku milundu, nyi ka, tunganda twa mwanangana maanuwana. Nukaswame ko matangwa atatu ndoo muze haahiluka, mba munuhasa kuya mu jila yenu.”

^17-20 Malunga yamba ngwo: “Ukalinga ngwe chino: muze mutukaheta mu chifuchi chenu, ukajichika muhipu uno uchila hiwatusunwisa nawo ku kapenda. Ukatambika tatenu ni noko, ni mandumbu je, ni akwa jiko lia tatenu eswe, akakunguluka mu zuwo lie. Mweswawo makatuhuka mu zuwo, nyi makafwa uli mulonga wenyi mwene, hi wa yetu ko. Alioze nyi makashiha umwe mu zuwo, uze uli mulonga wetu Alioze nyi wambulula yize tunambe kulinga, mutukasamba ku Shingo lietu.”

²¹ Mwe pwo yachitayiza, yalishika no. Muze haaya yakashila we muhipu uchila ku kapenda.

²² Ngendeshi yaaya ku milundu, yaaswama ko. Tunganda twa mwanangana yaafupa mu chifuchi cheswe matangwa atatu, alioze kaawanyine ko, mba yaahiluka ku Yeriku.

²³ Hohene ngendeshi aali yaapalumuka ha milundu, yaazauka lwiji, yaahiluka kuli Yoshua. Yaamwambulwila sango jeswe.

²⁴ Yaamba nawa ngwo: “Tunafuliela ngwetu, Mwene Zambi makatwaha chifuchi cheswe. Atu jako eswe kaanatuvwila mwongo.”