Yoshua 19 - Mukanda Wa Zambi 1970

Chifuchi cha chihinga cha Simeone

¹ Chela cha muchaali yichibwa cha majiko ja vungu lia Simeone. Chifuchi cho cha chihinga yichibwa mukachi ka chifuchi cha vungu lia Yuda.

² Wano e membo ja chihinga cho: Bersheba, ni Sheba, ni Molada,

³ ni Hazare, ni Shuale, ni Bala, ni Ezeme,

⁴ ni Eltolade, ni Betule, ni Horma,

⁵ ni Ziklage, ni Bete Markabote, ni Hazare Susa,

⁶ ni Bete Lebaote, ni Sharuhene: membo kumi ni atatu, hamwe ni yihunda yo.

⁷ Kwabwile nawa Ayine, ni Rimone, ni Etere, ni Ashane, membo awana hamwe ni yihunda yo.

⁸ Yachinga ko nawa yihunda yeswe ya membo waze ndoo ku Balate Bere (hanji Rama), ku sali lia sude. Chino che chifuchi cha chihinga cha vungu lia Simeone, nikulita ni majiko jo.

⁹ Chihinga cha Yuda chatohwele naye, kashika vungu lia Simeone atambwile chihinga mukachi ko.

Chifuchi cha chihinga cha Zabulone

¹⁰ Chela cha muchitatu yichibwa cha majiko ja vungu lia Zabulone. Chifuchi cho cha chihinga yichiheta ndoo ku Saride.

¹¹ Chize kwekuze njiza yiibalika ndoo ku Mareale, yiiheta ku Dabeshete ni ku lwiji ku sali lia chivumbuko lia Jokneame.

¹² Chize ku Saride njiza yiibalika ku chivumbuko ndoo ku Chislote Tabore, mba yiiya ku Daberate ni ndoo ku Jafiya.

¹³ Yiiya lume ku chivumbuko ndoo ku Gate Hefere ni Etkazine, yiikondoloka ni kutalikisa ku Neya mu jila ya Rimone.

¹⁴ Ku sali lia norde, njiza yiinyengumuka ni kutalikisa ku Hanatone, yiisulila ku chikulo cha Iftahele.

¹⁵ Yachinga ko nawa Katate, ni Nahalale, ni Shimrone, ni Idala, ni Betleheme: membo kumi ni aali hamwe ni yihunda yo.

¹⁶ Membo wano hamwe ni yihunda yo, che chihinga cha vungu lia Zabulone, nikulita ni majiko jo.

Chifuchi cha chihinga cha Isakare

¹⁷ Chela cha muchiwana yichibwa cha majiko ja vungu lia Isakare.

¹⁸ Mu chifuchi cha chihinga cho yimubwa: Jezrele, ni Chesulote, ni Shuneme,

¹⁹ ni Hafaraime, ni Shione, ni Anaharate,

²⁰ ni Rabite, ni Kishione, ni Ebeze,

²¹ ni Remete, ni Enganime, ni Enhada, ni Betpazeze.

²² Njiza yiiheta nawa ku Tabore, ni Shahazuma, ni Bete Shemeshe, yiisulila ku lwiji Yordau: membo kumi ni asambano hamwe ni yihunda yo.

²³ Membo waze hamwe ni yihunda yo, che chihinga cha vungu lia Isakare, nikulita ni majiko jo.

Chifuchi cha chihinga cha Ashere

²⁴ Chela cha muchitano yichibwa cha majiko ja vungu lia Ashere.

²⁵ Mu chifuchi cha chihinga cho yimubwa: Helkate, ni Hali, ni Betene, ni Akshafe,

²⁶ ni Alame Meleke, ni Amada, ni Mishala. Ku chitokelo njiza yiiheta ku Karmele, ni Shihore Libnate.

²⁷ Mba yiikondoloka ku chivumbuko, yiiya ndoo ku Betdagone, yiiheta ku Zabulone ni ku chikulo cha Iftahele, mu jila yize yinayi ku norde ku Betemeke ni ku Niele. Yiiya lume ku norde ndoo ku Kabule,

²⁸ ni Ebrone, ni Rehobo, ni Hamone, ni Kana, ni ndoo ku Sidone.

²⁹ Mba njiza yiinyengumuka ku Rama, yiiheta ku limbo lia kukoleka lia Tiru, yiikondoloka ku Hosa, yiisulila ku kalunga lwiji Mediterane. Yachinga ko nawa Mahalabe, ni Akzibe,

³⁰ ni Uma, ni Afeke, ni Rehobo: membo makumi aali hamwe ni yihunda yo,

³¹ Membo wano hamwe ni yihunda yo e abwile mu chifuchi cha chihinga cha vungu lia Ashere, nikulita ni majiko jo.

Chifuchi cha chihinga cha Naftali

³² Chela cha muchisambano yichibwa cha majiko ja vungu lia Naftali.

³³ Njiza yo yiibutuka ku Helebe ku mutondo shene mu Zananime, ni ku Adamikeba, ni Jamnia, ni ndoo ku Lakumi, yiisulila ku lwiji Yordau.

³⁴ Kwenako yiza yiikondoloka ku chitokelo ndoo ku Aznote Tabore ni ku Hukoke, yiiheta ku Zabulone ku sali lia sude. Ashere yabwa ku chitokelo ni Yordau ku chivumbuko,

³⁵ Membo a kukoleka wano: Zidime, ni Zere, ni Hamate, ni Rakata, ni Chinerete,

³⁶ ni Adama, ni Rama, ni Hazore,

³⁷ ni Kedeshe, ni Edrei, ni Enhazore,

³⁸ ni Yirone, ni Migdalele, ni Horome, ni Betanate, ni Bete Shemeshe: membo kumi ni livwa ni yihunda yo.

³⁹ Membo wano hamwe ni yihunda yo e abwile mu chufuchi cha chihinga cha vungu lia Naftali, nikulita ni majiko jo.

Chifuchi cha chihinga cha Dane

⁴⁰ Chela cha muchishimbiali yichibwa cha majiko ja vungu lia Dane,

⁴¹ Mu chifuchi cha chihinga cho yimubwa: Zora, ni Eshtaole, ni Irshemeshe,

⁴² ni Shalbime, ni Aijalone, ni Itla,

⁴³ ni Elone, ni Timna, ni Ekrone,

⁴⁴ ni Eleteke, ni Gibetone, ni Balata,

⁴⁵ ni Jehude, ni Beneberake, ni Gatrimone,

⁴⁶ ni Mejarkone, ni Rakone, ni chifuchi chize chajingilika Yope.

⁴⁷ Muze vungu lia Dane haatokesa chifuchi cho, yaaya ku Laishe ni kwasa no jita, yaakumba, yaashiha atu jalio, yaalizuka, yaalumuna jina lia Laishe, yaaliluka ngwo, Dane, nikulita ni jina lia kashakulu ko.

⁴⁸ Membo wano ni yihunda yo yaabwa mu chifuchi cha chihinga cha vungu lia Dane, nikulita ni majiko jo.

Kuteta chakusula cha chifuchi

⁴⁹ Muze Aisraele haamanununa kuteta chifuchi, yaamwaha Yoshua, mwana wa Nune, Chihanda cha chifuchi cha chihinga.

⁵⁰ Nikulita ni liji lia Mwene Zambi, yaamwaha limbo lize echile, Timna Sera, mu chifuchi cha milundu cha Efraime. Neye yatungulula lie limbo, yatwama mo.

⁵¹ Hako Eleazare, ni Yoshua mwana wa Nune, ni miata ja majiko ja mavungu ja Aisraele yaata chela ahule Mwene Zambi hanga alweze chize maateta yifuchi ya chihinga. Yaachilinga ku Shilo ku chikolo cha zuwo lia Zambi lia makubu. Chenacho amanunwine kuteta chifuchi.