Yoshua 18 - Mukanda Wa Zambi 1970

Yoshua yateta chifuchi chize chasalile ho

¹ Muze te haakumba chifuchi, Chikungulwila cheswe cha Aisraele yaalikungulula ku limbo lia Shilo, yaajika ko zuwo lia Zambi lia makubu

² Yikusala mavungu shimbiali ja Aisraele waze te kanda achaatetela chifuchi cha chihinga.

³ Mba Yoshua yahula Aisraele ngwenyi: “Tangwa lika munukahamuka kunjila ni kutambula chifuchi chize Mwene Zambi, Zambi ya tushakulu twenu, hananwehe?

⁴ Ngunehenenu malunga atatu a ku vungu ni vungu, hanga ngwatume mu chifuchi cheswe ni kuchisoneka, chikabwe chihinga cho. Mba makahiluka kuli yami

⁵ Chifuchi akachitete mu yihanda shimbiali; vungu lia Yuda maakasala mu chifuchi cho cha ku sude, ni mavungu ja Josefe mu chifuchi cho ku norde

⁶ Nukachifunjika mu yihanda shimbiali nukangunehena mukanda uze, mba yami mungukata chela ha kunyingika chize Mwene Zambi anazange.

⁷ Alioze vungu lia Levi keechi katambula Chihanda cha chifuchi hamwe ni yenu, mumu kaakulingila Mwene Zambi milimo ya uhako. Nawa mavungu ja Gade, ni Rubene, ni mbunga yimuwika ya Manase haatambula kulu chihinga cho ku chivumbuko cha Yordau, chize Mose kavumbi ka Mwene Zambi, aahele.”

⁸ E malunga yaaya mu jila yo nikufunjika njiza ya chifuchi muze te Yoshua haaha Shimbi jino ngwenyi: “Yeenu mu chifuchi cheswe ni kuchifunjika. Munubwamuze nukahiluka nawa kuli yami kuno ku Shilo. Mba mungukanuhulila kuli Mwene Zambi ni kuta chela”

⁹ Mba e malunga yaaya mu chifuchi cheswe, yaasoneka ha mukanda chize achitetele mu yihanda shimbiali, nikulita ni membo jacho. Mba yaahiluka kuli Yoshua ku musumba wa Shilo.

¹⁰ Yoshua yata chela, yaahulila kuli Mwene Zambi, mba vungu ni vungu lia Aisraele lize liasalile, yaaha chihinga cho cha chifuchi.

Chifuchi cha chihinga cha Benjamine

¹¹ Yaalianga kusoneka chifuchi cha vungu lia Benjamine. Chifuchi cho yichibwa mukachi ka vungu lia Yuda ni lia Josefe.

¹² Ku sali lia norde, njiza yiibutuka ku lwiji Yordau, yiikanduka ku norde ya Yeriku, yiiya ku chitokelo ndusu mu chifuchi cha milundu, ndoo ku puya ya Betehavene.

¹³ Mba njiza yiiya ndoo ku mukandu ku sali lia sude lia Luze (te kakulivuluka nawa ngwo, Betele), yiipalumuka ndoo ku mwanda ku Atarote Adare, ha mulundu ku sude ya Bete Horone.

¹⁴ Mba, ku sali lia chitokelo cha mulundu, ye njiza yiinyengumuka ku sude, yiiheta ku Kiriate Bale (hanji Kiriate Jearime), limbo lia ku chifuchi cha vungu lia Yuda. Yino yabwile njiza ya ku chitokelo.

¹⁵ Njiza ya ku sali lia sude yiibutuka ku Kiriate Jearime, yiiya ndoo ku mashima ja Naftoa.

¹⁶ Mba yiipalumuka ndoo mushi lia mulundu, hatalanganyi ni chikulo cha Hinome, ku norde ya chikulo cha Refaime. Muyabwamuze yiiya ku sude ku chikulo cha Hinome, mu sali lia sude ya mundundena wa Jebuse, ni kutalikisa ku Enrogele.

¹⁷ Yiikondoloka ku norde ku Enshemeshe, yiiya ndoo ku Gelilote, hatalanganyi ni Adumime, jila ya mukachi ka milundu. Yiipalumuka ku liwe lia Bohane (Bohane te mwana wa Rubene).

¹⁸ Yiibalika ku sali lia norde lia mindundena, hatalanganyi ni chikulo cha Yordau. Mba yiipalumuka mu chikulo,

¹⁹ ni kubalika ku sali lia norde lia mundundena ya Bete Hogla, yiisulila ku norde ya chitende cha Kufwa, kuze kwajilila Yordau. Yino yabwile njiza ya ku sude.

²⁰ Mwe Yordau yabwa njiza ya ku chivumbuko. Jino yijibwa njiza ja vungu lia Benjamine ja chifuchi cha chihinga cho, nikulita ni majiko jo.

²¹ Wano e membo ja majiko ja vungu lia Benjamine: Yeriku, ni Bete Hogla, ni Emeke Kezize,

²² ni Bete Araba, ni Zemaraime, ni Betele,

²³ ni Avime, ni Para, ni Ofra,

²⁴ ni Shefaramoni, ni Ofni, ni Geba: membo kumi ni aali, hamwe ni yihunda yo.

²⁵ Kwabwile nawa: Gibeone, ni Rama, ni Berote,

²⁶ ni Mizpa, ni Chefira, ni Moza,

²⁷ ni Rekeme, ni Irpele, ni Tarala,

²⁸ ni Zela, ni Halefe, ni Jebuse (hanji Yerusaleme), ni Gibea, ni Kiriate Jearime: membo kumi ni awana, hamwe ni yihunda yo. Chino che chifuchi cha chihinga cha vungu lia Benjamine, nikulita ni majiko jo.