Yoshua 17 - Mukanda Wa Zambi 1970

Vungu lia Manase ku chitokelo cha Yordau

¹ Chihanda cha chifuchi cha ku chitokelo cha Yordau yaachihana ku majiko ja Manase, mwana mutangu wa Josefe. Makire, tato ya Gileade, te mwe mwana mutangu wa Manase, yabwa kajita wa tachi, kashika yaamwaha Gileade ni Bashane ku chivumbuko cha Yordau.

² Chifuchi cha ku chitokelo yaachihana ku majiko akwo ja vungu lia Manase: Abiezere, ni Heleke, ni Azriele, ni Shekeme, ni Hefere, ni Shemida, Wano e malunga a ku vungu lia Manase, mwana wa Josefe, nikulita ni majiko jo.

³ Zelofehade, mwana wa Hefere, mwana wa Gileade, mwana wa Makire, mwana wa Manase, kabwile ko ni ana a malunga, shina a mapwo wika. Majina jo wano: Mala, ni Noa, ni Hogla, ni Milka, ni Tirza.

⁴ Wano yaaya kuli hako Eleazare, ni kuli Yoshua, mwana wa Nune, ni kuli miata akwo, yaamba ngwo: “Mwene Zambi hanambila Mose atwehe chihinga cha chifuchi ngwe chize haahana kuli usoko wetu.” No yaaha cho.

^5-6 Chenacho ana ja Manase a mapwo yaatambula chihinga hamwe ni ana a malunga. Chifuchi cha Gileade yaachihana ku vungu lia Manase. Kashika Manase yatambula yihanda kumi kuhiana yize ya mu yifuchi ya Gileade ni Bashane, ku chivumbuko cha Yordau.

⁷ Chifuchi cha Manase yichibutuka ku Ashere, yichiheta ndoo ni ku Mikmetate ku chivumbuko cha Shekeme. Mba njiza yiibalika ndoo yiihiana akwa Entapua.

⁸ Chifuchi cha Tapua te cha mbala cha Manase, alioze limbo lia Tapua, ku njiza ya Manase, te lia mbala lia Efraime.

⁹ Chize kwe kuze njiza yiipalumuka ku lwiji Kana. Membo a ku sude ya lwiji a Efraime, chibwe te kaali mu chifuchi cha Manase. Njiza yiibalika ku norde ya lwiji, yiisulila ku kalunga lwiji Mediterane.

¹⁰ Vungu lia Efraime te kaatwama ku sude, ni vungu lia Manase ku norde, ni kalunga lwiji Mediterane yabwa njiza yo ya ku chitokelo. Vungu lia Ashere yaabwa ku norde ni ku chitokelo, Isakare te ku norde ni ku chivumbuko.

¹¹ Hakachi ka yifuchi ya Isakare ni Ashere, Manase yabwa ni membo ja Bete Shane, ni Ibleame, hamwe ni yihunda yo ya kujingilika, ni Dore (ku mbumbulu ya kalunga lwiji), ni Endore, ni Tanake, ni Megido, hamwe ni yihunda yo.

¹² Alioze vungu lia Manase kaahashile ko kuhuma Akanana mu membo waze. Kashika kaakutwama mo ndoo ni musono.

¹³ Alioze chibwe muze Aisraele haatakama, kaahumine ko Akanana eswe, yaapwisa ndungo jo.

Efraime ni Manase ku chitokelo cha Yordau yeeta yifuchi yikwo

¹⁴ Vungu lia Josefe yaahula Yoshua ngwo: “Kuchi mba watwaha Chihanda chimuwika wika cha chifuchi? Tala yetu tuli anji, mumu Mwene Zambi hanatuwahisa.”

¹⁵ Yoshua ngwenyi: “Nyi nuli anji kuhiana ni chifuchi cha milundu ya Efraime chanukehela naye, yeenu ku yifuchi ya usaki wa Aperize ni Arefaime, nukalivukile yenwene.”

¹⁶ Yaakumbulula ngwo: “Ewa, chifuchi cha milundu chatukehela naye, alioze Akanana waze atwama mu yana kaakwete matemba a utale a jita, eswe aali, waze atwama mu Bete Shane hamwe ni yihunda yalio, ni waze atwama mu chikulo cha Jezrele.”

¹⁷ Yoshua yambila vungu lia Efraime ni vungu lia Manase lia ku chitokelo cha Yordau ngwenyi: “Chochene, nuli anji, nuli akwa tachi kuhiana. Kunwahashile kutwama mu Chihanda chimuwika.

¹⁸ “Chifuchi cha ku milundu muchibwa nichenu. Chibwe chili cha usaki, munuchivuka cheswe, muchibwa chihinga chenu. Chibwe Akanana, munwahuma haze. Chibwe kaali ni tachi kuhiana ni chibwe kaali ni matemba a utale, hindu munwahuma.”