Yoshua 16 - Mukanda Wa Zambi 1970

Yifuchi ya chihinga cha Efraime ni Manase ku chitokelo cha Yordau

¹ Njiza ya ku sude ya chivumbuko cha chihinga cha vungu lia Josefe yiibutuka ku lwiji Yordau hehi ni limbo lia Yeriku, ku sali lia chivumbuko lia mashima ja Yeriku, yiibalika mu puya. Yiikatuka ku Yeriku, yiikanduka mu chifuchi cha milundu ndoo ku limbo lia Betele.

² Chize ku Betele yiiya ndoo ku Luze, yiibalika ndoo ku Atarote Adare, kuze te kwatwama Aarke.

³ Mba yiibalika ku chitokelo ndoo ku chifuchi cha Jaflete, ndoo ni ku Bete Horone, ku mwanda. Yiibalika ku Gezere, yiisulila ku kalunga lwiji Mediterane.

⁴ Mavungu ja Josefe, Efraime ni mbunga ya Manase ku chitokelo cha Yordau yaatambula chifuchi cho cha chihinga chino.

Efraime

⁵ Chino yichibwa chifuchi cha vungu lia Efraime nikulita ni majiko jo. Njiza yo yiibutuka ku Atarote Adare, yiiya ku chivumbuko ndoo ku Bete Horone ku tunda,

⁶ chize kwenako ndoo ku kalunga lwiji Mediterane, Mikmetate yilibwa ku norde. Ku chivumbuko cha Mikmetate njiza yiinyengumuka ni kutalikisa ku Tanata Shilo, yiibalika Tanata Shilo ku chivumbuko, yiiya ndoo ku Janoa.

⁷ Mba yiikatuka ku Janoa, yiiya ku Atarote ni Nara ni ndoo ku Yeriku, yiisulila ku lwiji Yordau.

⁸ Chize ku Tapua njiza yiibalika ku chitokelo ndoo ku lwiji Kana, yiisulila ku kalunga lwiji Mediterane. Chino che chifuchi cha chihinga cha majiko ja vungu lia Efraime,

⁹ hamwe ni membo amwe ni yimwe yihunda ya mu chifuchi cha Manase, alioze yiibwa ya mbala ya Efraime.

¹⁰ Alioze Akanana waze abwile mu Gezere kaahumine ko. Ha chino Akanana atwama mukachi ko ndoo ni musono, alioze haanabu ndungo ja Efraime.