Yoshua 15 - Mukanda Wa Zambi 1970

Chifuchi cha chihinga cha Yuda

¹ Majiko ja vungu lia Yuda yaatambula Chihanda cho cha chihinga chino. Che chifuchi te kuchaheta ndoo ku sude ya puya ya Zine, ku njiza ya Edome.

² Njiza yo ya ku sude te yiikatuka ku chitende cha Kufwa,

³ yiibalika ku jila ya Akrabime mukachi ka milundu, yiiya ku sude ndoo ku Zine. Yiibalika ku sude ya Kadeshe Barnea, yiihiana Hezrone ndoo ni ku Adare, yiinyengumuka ku Karka,

⁴ yiibalika ku Azmone, yiikaula lwiji ku njiza ya Egiptu ndoo ku kalunga lwiji Mediterane, kuze kwasulila ye njiza. Te njiza ya Ayuda ku sude.

⁵ Njiza ya ku chivumbuko te chitende cha Kufwa, ndoo ku chihata cha lwiji Yordau. Njiza ya ku norde yiibutuka kwe kuze,

⁶ yiikanduka ku Bete Hogla, yiibalika ku norde ya Bete Arba, mba yiikanduka ku liwe lia Bohane (Bohane te mwana wa Rubene wa lunga),

⁷ yiikatuka ku chikulo cha Lamba, yiikanduka ku Debire, mba yiinyengumuka ku norde ndoo ku Gilgale, ha talanganyi ni jila ya Adumime mukachi ka milundu, sali lia sude ya chikulo. Yiibalika ndoo ku mashima ja meya ja Enshemeshe, ni ku Enrogele,

⁸ mba mu chikulo cha Hinome ku sude ya mulundu, kuze kwabwile limbo lia Ajebuse, Yerusaleme. Yiikanduka ndoo ha mulundu ku chitokelo cha chikulo cha Hinome, ku norde ya chikulo cha Refaime.

⁹ Katu kwekuze yiiya ndoo ku mashima ja Neftowa ni ndoo ku membo hehi ni mulundu wa Efrone. Kwekuze yiinyengumuka ku Bala (hanji Kiriate Jearime),

¹⁰ yiiyisa konda ku chitokelo cha Bala, yiibalika ku milundu ya Seire, yiiya ku sali lia norde ya milundu Jearime (hanji Chesalone), yiipalumuka ku Bete Shemeshe, yiihiana Timna.

¹¹ Yiiya ku mulundu ku norde ya Ekrone, yiinyengumuka ni kutalikisa ku Shikerone, yiihiana mulundu Bala ndoo ku Jamnia. Yiisulila ku kalunga lwiji Mediterane,

¹² ye njiza ya ku chitokelo. Jenajo je njiza ja majiko ja vungu lia Yuda.

Kaleba yatambula Hebrone ni Debire

¹³ Nikulita ni chize Mwene Zambi alwezele Yoshua, Chihanda cha chifuchi cha Yuda yachihana kuli Kaleba mwana wa Jefune, wa ku vungu lia Yuda. Yatambula Hebrone, limbo lia Arba, tato ya Anake.

¹⁴ Kaleba yahuma vungu lia Anake ku limbo; majimo jo: Sheshayi, ni Ahimane, ni Talmai.

¹⁵ Chize kwekuze yaya ni kwasa jita ni atu waze te atwama mu Debire. (Limbo lize te kakulivuluka ngwo, Kiriate Sefere.)

¹⁶ Kaleba yamba ngwenyi: “Mweswawo matambula Kiriate Sefere, mungumwaha mwanami Aksa kubwa pwo lienyi.”

¹⁷ Otniele, mwana wa Kenaze mwanakwo ya Kaleba, yatambula lie limbo. Chenacho Kaleba yamwaha mwanenyi Aksa ni kumumbata.

¹⁸ Ha tangwa lia umbachiso Otniele yamulweza ngwenyi: “Mwite tata akwehe munda.” Mwe pwo yaya kuli tato. Muze te anasunuka ha chimbulu, Kaleba yamuhula ngwenyi: “Yika unazange?”

¹⁹ Neye ngwenyi: “Tata, ngwehenu mwane mashima ja meya. Chifuchi nwanguhele chili chumu.” Mba Kaleba yamwaha mashima a ku tunda ni a ku mwanda.

Membo ja Ayuda

²⁰ Chino che chifuchi chize atambwile majiko ja vungu lia Yuda kubwa chihinga cho.

^21-32 Membo a ku sude, hehi ni njiza ya Edome, waze atambwile te makumi aali ni livwa hamwe ni yihunda yize ya kusulangana. Enaa: Kabzele, ni Edere, ni Jagure, ni Kina, ni Dimona, ni Adada, ni Kedeshe, ni Hazore, ni Itnane, ni Zife, ni Teleme, ni Bealote, ni Hazore Hadata, ni Keriote Hezrone (hanji Hazore), ni Amame, ni Shema, ni Molada, ni Hazare Gada, ni Heshmone, ni Betepelete, ni Hazare Shuale, ni Bersheba, ni Biziotia, ni Bala, ni Ime, ni Ezeme, ni Eltolade, ni Chesile, ni Horma, ni Ziklage, ni Madmana, ni Sansana, ni Lebaote, ni Shilime, ni Ayine, ni Rimone.

^33-36 Membo hamwe ni yihunda ya kusulangana mukachi ka mindundena te kumi ni awana, enaa: Eshtaole, ni Zore, ni Ashna, ni Zanoa, ni Enganime, ni Tapua, ni Ename, ni Jarmute, ni Adulame, ni Soko, ni Azeka, ni Sharaime, ni Aditaime, ni Gedera, ni Gederotaime.

^37-41 Vungu lia Yuda yaahinga nawa membo wano kumi ni asambano hamwe ni yihunda yakusulangana: Zenane, ni Hadasha, ni Migdalgade, ni Dileane, ni Mizpa, ni Jokatele, ni Lakishi, ni Bozkate, ni Eglone, ni Kabone, ni Lamama, ni Chitlishi, ni Gederote, ni Bete Dagone, ni Nama, ni Makeda.

^42-44 Kwabwile nawa membo wano livwa ni yihunda yakusulangana: Libna, ni Etere, ni Ashane, ni Ifita, ni Ashna, ni Neziba, ni Kela, ni Akziba, ni Maresha.

^45-47 Kwabwile nawa Ekrone ni membo jalio hamwe ni yihunda ya kusulangana, ni membo eswe hehi ni Ashdode, chize ku Ekrone ndoo ku kalunga lwiji Mediterane. Kwabwile Ashdode ni Gaza hamwe ni membo jo ni yihunda yo, ndoo ku lwiji wa njiza ni Egiptu ni ku mbumbulu ya kalunga lwiji Mediterane.

^48-51 Mu chifuchi cha milundu mwabwile membo kumi ni kashi hamwe ni yihunda ya kusulangana: Shamire, ni Jatire, ni Soko, ni Dana, ni Kiriate Sefere (hanji Debire), ni Anabe, ni Eshtemoa, ni Anime, ni Goshene, ni Holone, ni Gilo.

^52-54 Kwabwile nawa membo livwa hamwe ni yihunda ya kusulangana: Araba, ni Duma, ni Eshane, ni Janime, ni Bete Tapuwa, ni Afeka, ni Humata, ni Hebrone, ni Ziore.

^55-57 Kwabwile nawa membo kumi hamwe ni yihunda ya kusulangana: Maone, ni Karmele, ni Zife, ni Juta, ni Jezrele, ni Jokdeame, ni Zanoa, ni Kaine, ni Gibea, ni Timna.

^58-59 Kwabwile nawa membo asambano hamwe ni yihunda ya kusulangana: Halula, ni Bete Zure, ni Gedore, ni Marata, ni Betanote, ni Eltekone.

⁶⁰ Kwabwile nawa membo aali hamwe ni yihunda ya kusulangana: Kiriate Bale (hanji Kiriate Jearime), ni Raba.

^61-62 Mu puya mwabwile nawa membo asambano hamwe ni yihunda ya kusulangana: Bete Araba, ni Midini, ni Sekaka, ni Nibshane, ni limbo lia Mungwa, ni Engedi.

⁶³ Alioze Ayuda kaahashile ko kuhuma Ajebuse waze te atwama mu limbo lia Yerusaleme. Kwe atwama ndoo ni musono.