Yoshua 14 - Mukanda Wa Zambi 1970

Kuteta cha chifuchi cha ku chitokelo

¹ Jino jili sango ja kuteta cha chifuchi cha Kanana kuli Aisraele ku sali lia chitokelo lia lwiji Yordau. Hako Eleazare, ni Yoshua mwana wa Nune, ni miata ja majiko ja Aisraele yaatetela cho.

² Ngwe chize Mwene Zambi alwezele Mose, yaachitetela mavungu livwa ni mbunga yimuwika ya vungu lia Manase, nikulita ni kuta cha chela.

^3-4 Mose te hanatete kulu chifuchi cha ku chivumbuko cha Yordau kuli mavungu aali ni mbunga yimuwika ya vungu lia Manase. (Vungu lia Josefe yaalihandununa mavungu aali: Manase ni Efraime.) Alioze Alevi, Mose kaahele ko chihinga cha chifuchi, yaaha lume membo atwame mo, hamwe ni minda ya kulishila yimuna yo.

⁵ Aisraele yaateta chifuchi nikulita ni chize Mwene Zambi ambilile Mose.

Kaleba yaamwaha limbo lia Hebrone

⁶ Limwe tangwa, amwe Ayuda yeeza kuli Yoshua ku Gilgale. Umwe wa kuli ayo, jina lienyi Kaleba, mwana wa Jefune mukwa Kenize, yamba ngwenyi: “Nunanyingika chize Mwene Zambi ahanjikile kuli Mose, mutu wa Zambi, ku Kadeshe Barnea, hakutwala kuli yenu ni yami.

⁷ Te hinabwa ni miaka makumi awana muze Mose, kavumbi ka Mwene Zambi, angutumine ku Kadeshe Barnea ni kwendesa chifuchi chino. Yingumunehena sango jibema.

⁸ Alioze waze ayile hamwe ni yami, yeevwisa atu jetu mwongo. Alioze yami yingufuliela ni kwononokena maliji ja Mwene Zambi, Zambi yami.

⁹ Kashika Mose yangulakenya ngwenyi: ‘Chamwenemwene chifuchi chize hiwaliata muchikabwa chihinga cha yena ni ana je ku miaka yeswe.’

¹⁰ Alioze haliabwila talenu, miaka makumi awana ni yitano hiyabalika chize ku tangwa lize Mwene Zambi alwezele Mose maliji waze. Ha matangwa waze Aisraele endanganyine mu puya, ni Mwene Zambi hanangufungu ni mwono ndoo ni musono. Achingutalenu! Hinabwa ni miaka makumi nake ni yitano,

¹¹ hindu ngunatakama ngungungu, ngwe ha matangwa waze Mose angutumine ni kwendesa chifuchi. Nguchili ni tachi jami ni kwasa jita hanji kulinga cheswacho ngunazange.

¹² Kashika haliabwila, ngwehenu chifuchi cha milundu chize Mwene Zambi angulakenyena, yami ni atu jami, ha tangwa lize twalumbunwine sango ja che chifuchi. Twanulwezele ngwetu, vungu lia atu asuku asuku waze te akuvuluka ngwo, Anake, atwama mu membo a kukoleka. Ngunanyongo Mwene Zambi mangukwasa ni kwatuhwisa mu chifuchi, nikulita ni liji lienyi.”

¹³ Yoshua yawahisa Kaleba mwana wa Jefune, yamwaha limbo lia Hebrone kubwa chihinga chenyi.

¹⁴ Chenacho ndoo ni musono Hebrone chili chifuchi cha mbala cha vungu lia Kaleba, mwana wa Jefune mukwa Kenize, mumu wononokenene Mwene Zambi, Zambi ya Aisraele.

¹⁵ Hatangu, Hebrone te kakulivuluka ngwo, limbo lia Arba. (Arba te mwata munene Wahiana mukachi ka Anake.) Haliabwila chifuchi hichinabu ni uhwimino.