Yoshua 13 - Mukanda Wa Zambi 1970

Chifuchi chize chasalila ha kukumba

¹ Yoshua yabwa kashinakaji. Mwene Zambi yamwamba ngwenyi: “Hiwabwa kashinakaji, alioze chifuchi chinene chasala ko ha kukumba:

² Chifuchi cheswe cha Afilistia ni cha Ageshure,

³ ni chifuchi cheswe cha Aavime mu sude. (Chifuchi cheswe chize ku lwiji Shihore, ku njiza ya Egiptu, ndoo ku njiza ya Ekrone ku norde kakuchalwila ku chifuchi cha Akanana; mianangana ja Afilistia te atwama mu membo ja Gaza, ni Ashdode, ni Ashkelone, ni Gate, ni Ekrone.)

⁴ Te hikwasala chifuchi cheswe cha Akanana ni yivwenge ya Meare (te yili ya Asidone), ndoo ku limbo lia Afeke ku njiza ya Amore;

⁵ ni chifuchi cha Agebale, ni chifuchi cheswe cha Libano ku chivumbuko, chize ku limbo lia Balgade lize lili ku sude lia mulundu wa Hermone, ndoo ku jila Hamate mukachi ka milundu.

⁶ Chino chili chifuchi cheswe cha Asidone, waze te atwama ha mindundena hakachi ka milundu ya Libano ni Misrefote Maime. Mungukahuma mavungu wano eswe ku meso ja Aisraele. Yena chatamba kutetela Aisraele chihinga cho, ngwe chize ngunakakulweza.

⁷ Kashika haliabwila teta chifuchi chino mukachi ka mavungu akwo livwa ni mbunga yimuwika ya Manase, hanga chibwe nicho.”

Kuteta cha chifuchi cha ku chivumbuko cha Yordau

⁸ Mavungu ja Rubene, ni Gade, ni mbunga yimuwika ya Manase haatambula kulu chifuchi chize aahele kuli Mose, kavumbi ka Mwene Zambi. Chabwile ku sali lia chivunbuko lia lwiji Yordau.

⁹ Chifuchi cho te kuchaheta ku limbo lia Aroere (ku sesa lia chikulo cha Arnone) ni limbo lia hakachi ka chikulo ni chifuchi cheswe cha ku tunda ku limbo lia Medeba ndoo ku limbo lia Dibone.

¹⁰ Chifuchi cho te kuchaheta ndoo ku njiza ya chifuchi cha Aamone, yichilitanda mu membo eswe waze ayulile mwanangana wa Aamore, yoze te watwama ku Heshbone.

¹¹ Yichilitanda mu chifuchi cha Gileade, ni ya Geshure ni Maka, ni mulundu weswe wa Hermone, ni chifuchi cheswe cha Bashane ndoo ku Saleka.

¹² Yichilitanda nawa mu wanangana wa Oge, mutu wa kusula wa Arefaime, yoze te wakuyula ku Ashtarote ni ku Edrei. Mose te hakumba kulu atu wano eswe, yaahuma.

¹³ Chibwe chocho Aisraele kaahumine ko Ageshure ni Amaka; kaakutwama mukachi ka Aisraele ndoo ni musono.

¹⁴ Mose, vungu lia Alevi kaahele ko chifuchi, ngwe chize amulwezele kuli Mwene Zambi. Chihinga cho te Chihanda cha milambu yize ayo akwochela Mwene Zambi, Zambi ya Aisraele.

Chifuchi cha chihinga cha Rubene

¹⁵ Mose yateta Chihanda cha chifuchi ku majiko ja vungu lia Rubene.

¹⁶ Chifuchi cho te kuchaheta ndoo ku limbo lia Aroere (ku sesa lia chikulo cha Arnone) ni ku limbo lia hakachi ka chikulo chize. Yichilitanda mu chana cheswe cha Medeba,

¹⁷ ni limbo lia Heshbone, ni membo eswe a ku tunda: Dibone, ni Bamote Bale, ni Bete Balmeone,

¹⁸ ni Jahaze, ni Kedemote, ni Mefate,

¹⁹ ni Kiriataime, ni Sibma, ni Zeretshahare, ha mundundena mu chikulo,

²⁰ ni Betepeore, ni mukandu wa mulundu wa Pisga, ni Bete Jeshimote.

²¹ Yichilitanda nawa mu membo eswe a ku tunda, ni mu wanangana weswe wa Sihone, mwanangana wa Aamore, yoze te wakuyula ku Heshbone. Mose yakumba mwe mwanangana Sihone hamwe ni akwa kuyula a mu chifuchi cha Midiane: Evi, ni Rekeme, ni Zure, ni Hure, ni Reba. Wano eswe te kaakuyula che chifuchi mu wanangana wa Sihone.

²² Mukachi ka atu waze ashihile kuli Aisraele mwabwile nawa mukwa munanyi Balame, mwana wa Beore.

²³ Lwiji Yordau te ye njiza ya ku chitokelo cha vungu lia Rubene. Wano e membo ni yihunda yize atetele vungu lia Rubene, nikulita ni majiko jo.

Chifuchi cha chihinga cha Gade

²⁴ Mose yateta nawa Chihanda cha chifuchi ku majiko ja vungu lia Gade.

²⁵ Chifuchi cho te chikwete limbo lia Jazere ni membo eswe a mu chifuchi cha Gileade, ni Chihanda cha chifuchi cha Aamone ndoo ku limbo lia Aroere, chize chili ku chivumbuko cha limbo lia Raba.

²⁶ Chifuchi cho yichilitanda chize ku Heshbone ndoo ku Ramate Mizpa, ni Betonime, chize ku Mahanaime ndoo ku njiza ya Lodebare.

²⁷ Ni mu chikulo cha Yordau membo ja Bete Harame, ni Betnimra, ni Sukote, ni Safona, te a ku Chihanda cha chifuchi cha mwanangana Sihone wa ku Heshbone. Lwiji Yordau te njiza ya ku chitokelo cha vungu lia Gade ndoo ku chitende cha Galilea ku norde.

²⁸ Wano e membo ni ye yihunda yize atetele vungu lia Gade, nikulita ni majiko jo.

Chifuchi cha chihinga cha Manase ku chivumbuko cha Yordau

²⁹ Mose yateta nawa Chihanda cha chifuchi ku majiko a mbunga yimuwika ya Manase.

³⁰ Chifuchi cho te kuchaheta ndoo ku limbo lia Mahanaime, yichilitanda mu chifuchi cheswe cha Bashane, wanangana weswe wa Oge, mwanangana wa Bashane, ni yihunda yeswe makumi asambano ya mwata Jaire mu Bashane.

³¹ Yichilitanda ku Chihanda cha Gileade, ni ku membo ja Ashtarote ni Edrei, membo anene a mu wanangana wa Oge mu Bashane. Yize yeswe yayihana ku Chihanda cha vungu lia Makire, mwana wa Manase, nikulita ni majiko jo.

³² Chenacho Mose atetele chifuchi cha ku chivumbuko cha Yordau ni Yeriku, muze abwile mu puya ya Moabe.

³³ Alioze vungu lia Alevi, Mose kaahele ko chifuchi, mumu ngwenyi, chihinga cho chili Chihanda cha milambu yize ayo akulambula kuli Mwene Zambi, Zambi ya Aisraele.