Yoshua 12 - Mukanda Wa Zambi 1970

Mianangana waze Mose akumbile

¹ Mose ni Aisraele te haatambula kulu chifuchi cha ku chivumbuko cha Yordau, chize ku chikulo cha Arnone, ndoo ku mulundu wa Hermone ku norde. Yaakumba mianangana aali.

² Umuwika Sihone, mwanangana wa Aamore, yoze te wakuyula Heshbone Wanangana wenyi te Chihanda cha Gileade, chize ku limbo lia Aroere (hehi ni chikulo cha Arnone) ni limbo lia hakachi ka chikulo, ndoo ku lwiji Jaboke, ku njiza ya Amone;

³ chifuchi cha Yordau chize ku chitende cha Galilea ndoo ku Bete Jeshimote (ku chivumbuko cha chitende cha Kufwa) ni ndoo ku mulundu wa Pisga.

⁴ Yaakumba nawa Oge mwanangana wa chifuchi cha Bashane, te kali umwe yoze wasalile kuli Arefaime; mwe wayulile ku membo ja Ashtarote ni Edrei

⁵ Mu wanangana wenyi mwabwile mulundu wa Hermone, ni limbo lia Saleka ni chifuchi cheswe cha Bashane ndoo ku njiza ya Geshure ni Maka, ni Chihanda cha Gileade ndoo ku njiza ya chifuchi cha mwanangana Sihone wa Heshbone.

⁶ Mose ni Aisraele yaakumba mianangana wano aali. Mose kavumbi ka Mwene Zambi, yahana chifuchi cho ku mavungu ja Rubene ni Gade ni mbunga yimuwika ya Manase.

Mianangana waze Yoshua akumbile

⁷ Yoshua ni Aisraele yaakumba mianangana eswe a ku chitokelo cha Yordau, chize ku limbo lia Balgade ku chikulo cha Libano ndoo ku mulundu wa Halake ku sude hehi ni chifuchi cha Edome. Yoshua yatetela e mavungu ja Aisraele che chifuchi, yaahacho chibwe nicho ku miaka yeswe.

⁸ Te chifuchi cha milundu ni cha mindundena ku chitokelo, ni chikulo cha Yordau ni milundu yacho ni chifuchi cha ku mwanda ku chivumbuko ni chifuchi cha yana ku sude. Chino chabwile chifuchi cha Ahite, ni Aamore, ni Akanana, ni Aperize, ni Ahive, ni Ajebuse.

^9-24 Mianangana eswe waze akumbile kuli Aisraele makumi atatu ni umuwika. Te mianangana ja membo wano: Yeriku, ni Ayi (hehi ni Betele), ni Yerusaleme, ni Hebrone, ni Jarmute, ni Lakishi, ni Eglone, ni Gezere, ni Debire, ni Gedere, ni Horma, ni Arade, ni Libna, ni Adulame, ni Makeda, ni Betele, ni Tapua, ni Hefere, ni Afeke, ni Lasharone, ni Madone, ni Hazore, ni Shimrone Merone, ni Akshafe, ni Tanake, ni Megido, ni Kedeshe, ni Jokneame (mu Karmele), ni Dore, (ku mbumbulu ya kalunga lwiji), ni Goime (mu chifuchi cha Galilea) ni Tirza.