Yoshua 11 - Mukanda Wa Zambi 1970

Yoshua yakumba akwa Jabine

¹ Muze sango ja kukumba cha Aisraele jahetele kuli mwanangana Jabine wa ku limbo lia Hazore, yatuma liji kuli mwanangana Jobabe wa ku limbo lia Madone, ni kuli mianangana a ku Shimrone ni Akshafe,

² ni kuli mianangana waze te atwama ku milundu ku norde, ni ku chikulo cha Yordau ku sude ya chitende cha Galilea, ni ku mikandu, ni ku mbumbulu ya kalunga lwiji, hehi ni Dore.

³ Yatuma nawa liji kuli Akanana ku sali ni sali lia Yordau: kuli Aamore, ni Ahite, ni Aperize, ni Ajebuse a ku milundu, ni Ahive waze atwama ku mulundu wa Hermone, mu chifuchi cha Mizpa.

⁴ No yeeza ni tujita two eswe, chihuji chinene ngwe masekeseke a ku mbumbulu ya kalunga lwiji. Yaabwa nawa ni tuvwalu ni matemba anji.

⁵ Mianangana waze eswe yaalichinga, yaasa musumba wo ku lwiji Merome, hanga akase jita ni Aisraele.

⁶ Mwene Zambi yambila Yoshua ngwenyi: “Kanda weevwila woma. Tala, hamene ha ola ngwe yino, mungukaakunjika eswe mu moko jenu, akushiha kulu. Munukalemeka tuvwalu two ni kwocha matemba jo.”

⁷ Mba Yoshua ni tujita twenyi yaatungumuna ku lwiji Merome, yaasa no jita.

⁸ Mwene Zambi yakwasa Aisraele kukumba akwa kole jo. Aisraele yaahanga ndoo ku Misrefote Maime ni Sidone ku norde, ni ndoo ku chikulo cha Mizpa ku chivumbuko. Yaasa jita ndoo kukwasalile chibwe katota mukele.

⁹ Yoshua yalinga ngwe chize amwambile kuli Mwene Zambi, yabatwola mijiba ya tuvwalu ni yoocha matemba jo.

¹⁰ Mba Yoshua yahiluka, yatambula Hazore, yashiha mwanangana wo. (Ha matangwa waze Hazore te kahiana tachi mawanangana eswe a mu chifuchi).

¹¹ Yashiha ko atu eswe, kukwasalile ko niumwe, ni lie limbo yaliocha.

¹² Yoshua yatambula membo eswe ni e mianangana jamo, yashiha mo atu eswe, ngwe chize amulwezele kuli Mose, kavumbi ka Mwene Zambi.

¹³ Alioze membo a ha milundu Aisraele kwoochele ko, yoocha lume Hazore.

¹⁴ Aisraele yaanda yuma yeswe yibema ni ngombe a ku membo waze. Alioze yaashiha atu eswe, kukwasalile niumwe ni mwono.

¹⁵ Mwene Zambi te hanahana Shimbi kuli kavumbi kenyi Mose. Mose neye yajihana kuli Yoshua, Yoshua neye yajononokena. Yalinga yuma yeswe ngwe chize Mwene Zambi alwezele Mose.

Chifuchi chize atambwile Yoshua

¹⁶ Chenacho Yoshua atambwile chifuchi cheswe cha milundu ni mindundena ya ku norde ni ku sude, ni chifuchi cheswe cha Goshene, ni chifuchi cha mu yana ku sude ya Goshene, ni chikulo cha Yordau.

^17-18 Yatambula chifuchi cheswe chize chakatuka ku mulundu wa Halake, hehi ni chifuchi cha Edome ku sude, ndoo ku limbo lia Balgade ku norde, mu chikulo cha Libano ku sude ya mulundu wa Hermone. Yoshua yasa jita ni mianangana a yifuchi yize matangwa anji, alioze yakumba eswe, yaashiha.

¹⁹ Shina lume akwa limbo lia Gibeone, kuze te kwatwama amwe Ahive, enoo alikunjikile kuli Aisraele. Alioze membo akwo eswe yaatambula mu jita.

²⁰ Mwene Zambi yaakalisa mbunge akase jita ni Aisraele, hanga Aisraele aanongese, kwevwila keke ka. Chenacho Mwene Zambi ambilile Mose.

²¹ Ha matangwa waze Yoshua yaya, yamona vungu lia Anake, atu asuku asuku, waze te atwama mu chifuchi cha milundu, mu membo ja Hebrone, ni Debire, ni Anabe, ni mu chifuchi cha milundu ya Ayuda ni Aisraele. Yoshua yaanongesa liakulu ni e membo jo.

²² Akwa Anake niumwe kasalile ko mu chifuchi cha Aisraele, shina lume mu membo ja Gaza, ni Gate, ni Ashdode mwe mwasalile amwe.

²³ Yoshua yatambula chifuchi cheswe ngwe chize Mwene Zambi ambile Mose Yoshua yachihana kuli Aisraele kubwa nicho, yaatetela cho kubwa chihinga cho, Chihanda chimuwika ku vungu ni vungu. Mba mu chifuchi yimuhola lume kuluu.