Yoshua 10 - Mukanda Wa Zambi 1970

Aisraele yaakumba Aamore

¹ Adonizedeke, mwanangana wa Yerusaleme, yevwa ngwo, Yoshua hatambula limbo lia Ayi ni halionona liakulu, hashiha nawa mwanangana walio, ngwe chize alingile ku Yeriku hamwe ni mwanangana walio. Yevwa nawa ngwo, akwa Gibeone haalikunda ni Aisraele, ni kaatwama mukachi ko.

² Akwa Yerusaleme yeevwa woma unji, mumu limbo lia Gibeone te linene ngwe membo ja mianangana. Te kuliahiana limbo lia Ayi, ni malunga a mu limbo lize te tujita a tachi jinji.

³ Mba Adonizedeke yatuma liji kuli mianangana wano: Hohame mwanangana wa Hebrone, ni Pirame mwanangana wa Jarmuta, ni Jafia mwanangana wa Lakishi, ni Debire mwanangana wa Eglone, ngwenyi:

⁴ “Tweyenu nungukwase kulimika ni akwa Gibeone, mumu haalikunda ni Yoshua ni Aisraele.”

⁵ Kashika mwanangana wa Yerusaleme, ni wa Hebrone, ni wa Jarmute, ni wa Lakishi, ni wa Eglone, mianangana wano atano ja Aamore, yaalikungulula, yaajingilika Gibeone, yaasa no jita.

⁶ Malunga ja Gibeone yaatumina Yoshua liji ku musumba wa Gilgale, ngwo: “Kanda nutwehuka kama, yetu ngamba jenu! Tweyenu nikawashi nutukwase! Tulamwinenu tunalembe! Mianangana ja Aamore eswe a ku chifuchi cha milundu haalikungulula ni kwasa jita ni yetu!”

⁷ Chenacho Yoshua ni mbunga yenyi ya tujita, ni akwa hamu eswe yaakatuka ku Gilgale.

⁸ Mwene Zambi yambila Yoshua ngwenyi: “Kanda weevwila woma. Hinakukwasa kulu, muwakumba. Kukushi yoze malimika ni yena.”

⁹ Yoshua ni tujita twenyi yeenda ufuku weswe, chize ku Gilgale ndoo ku Gibeone, yaatungumuna Aamore.

¹⁰ Mwene Zambi yeevwisa Aamore woma kuhiana ku meso ja tujita twa Aisraele. Aisraele yaakumba ku Gibeone, yaahanga ndoo ku jila hakachi ka milundu ku Bete Horone, yaahanga nawa ku sude ndoo ku membo ja Azeka ni Makeda.

¹¹ Muze te Aamore anachina tujita twa Aisraele mukachi ka milundu, Mwene Zambi yaanokesela vula munji wa chiwe chinene chinene mu jila yeswe ndoo ku Azeka. Atu anji afwile ku chiwe, kuhiana waze ashihile kuli Aisraele.

¹² Ha tangwa lize Mwene Zambi akwashile Aisraele kukumba Aamore, Yoshua yahanjika ni Mwene Zambi. Ku meso ja Aisraele yamba ngwenyi: “Yena tangwa, mana lume ha limbo lia Gibeone; yena kakweji, mana ha chikulo cha Ajalone.”

¹³ Mba tangwa yilimana kuluu ha Gibeone, ni kakweji kakatukile ko ndoo Aisraele haakumba akwa kole jo. Chenacho chinasonewa mu mukanda wa Jashare ngwo, tangwa yilimana lume kwilu ha muchima kuluu, kuliapalumukine ko tangwa lieswe lia muundu.

¹⁴ Haanga, chize ku kutanga cha hashi, kanda kubwa kama tangwa ngwe lize muze Mwene Zambi ononokene ku liji lia mutu, yashila Aisraele jita!

¹⁵ Mba Yoshua ni tujita twenyi yaahiluka ku musumba ku Gilgale.

Yoshua yakumba mianangana atano ja Aamore

¹⁶ Mianangana atano ja Aamore, yaachina, yaaswama mu chivwenge cha Makeda.

¹⁷ Atu yaalweza Yoshua ngwo: “Mianangana eswe atano haaswama mu chivwenge cha Makeda.”

¹⁸ Yoshua ngwenyi: “Langumwinenu mawe ku chikolo cha chivwenge. Senu ko tufunga,

¹⁹ alioze yenu akwo tweyenu. Hangenu akwa kole jenu. Waze anachina nwashiha, kanda nwatayiza kuhiluka ku membo jo! Mwene Zambi, Zambi yenu, hanukunjikoo ni kwakumba.”

²⁰ Yoshua ni Aisraele yaashiha akwa kole jo. Alioze amwe akwo yaachinyina mu membo akukoleka.

²¹ Mba tujita eswe a Yoshua yaahiluka kuli iye ku musumba wa Makeda ni uhwimino. Mutu niumwe mu chifuchi wahamukine chibwe kuhanjika liji lia kulimika ni Aisraele.

²² Mba Yoshua yamba ngwenyi: “Chizenu mawe ku chivwenge, nungunehene mianangana waze atano.”

²³ No yaachiza mawe ku chivwenge. Mba mianangana a mu Yerusaleme, ni Hebrone, ni Jarmute, ni Lakishi, ni Eglone yaatuhuka,

²⁴ Tufunga yaatwala kuli Yoshua. Neye yakungulula malunga Aisraele eswe, yahana Shimbi kuli miata a tujita waze ayile hamwe nenyi eze nikuliata ha kota ja mianangana waze. No yaalinga Chenacho.

²⁵ Mba Yoshua yaakolesa ngwenyi: “Kanda nulekumuka hanji kwivwa woma. Takamenu, hamukenu, mumu Chenacho Mwene Zambi makalinga kuli akwa kole jenu eswe.”

²⁶ Mba Yoshua yashiha e mianangana, yaazezeleka ku mitondo yitano. Mijimba yo yiisala ko ndoo chingoloshi.

²⁷ Ha kunjila cha tangwa Yoshua yahana Shimbi, mba tujita yaasunwisa ni kwambila mu chivwenge muze te aswamine. Yaashita ko mawe anene anene. Kwenako ali ndoo ni musono.

Yoshua yatambula chifuchi cha Aamore

²⁸ Ha tangwa lizeliene Yoshua yatambula limbo lia Makeda, yakwata nawa mwe mwanangana walio. Yashiha akwa limbo eswe, kukwasalile ko niumwe ni mwono. Yalinga ni mwanangana wa Makeda ngwe chize alingile ni mwanangana wa Yeriku.

²⁹ Mba Yoshua ni tujita twenyi yaakatuka ku Makeda, yeeza ku limbo lia Libna, yaasa no jita.

³⁰ Mwene Zambi yakunjika limbo lize mu moko ja Aisraele hamwe ni mwe mwanangana walio. Yaashiha atu eswe, niumwe wasalile ko ni mwono. Yaalinga ni mwanangana wa Libna ngwe chize alingile ni mwanangana wa Yeriku.

³¹ Yoshua ni tujita twenyi yaakatuka ku Libna, yaaya ku limbo lia Lakishi, yaasa no jita, yaakumba.

³² Mwene Zambi yakunjika Lakishi mu moko ja Aisraele ha tangwa lia muchaali lia jita. No yaashiha atu eswe waze te atwama mo, niumwe wasalile mo ni mwono, yaalinga ngwe chize alingile ku Libna.

³³ Mwanangana Horame, wa ku limbo lia Gezere, yeza ni kukwasa akwa Lakishi. Alioze Yoshua yamushiha hamwe ni tujita twenyi, niumwe wasalile ko ni mwono.

³⁴ Hohene Yoshua ni tujita twenyi yaakatuka ku Lakishi yaaheta ku limbo lia Eglone, yaaliseleka.

³⁵ Yaalitambula tangwa lizeliene, yaashiha atu eswe waze abwile mo, ngwe chize alingile ku Lakishi.

³⁶ Mba Yoshua ni tujita twenyi yaakanduka ha milundu ku limbo lia Hebrone, yaaliseleka,

³⁷ yaalitambula. Yaashiha mwe mwanangana ni atu eswe waze abwile mu limbo ni mu yihunda yakusulangana. Yoonona atu ja mu limbo, ngwe chize alingile ku Eglone, niumwe wasalile mo ni mwono.

³⁸ Yoshua ni tujita twenyi yaahiluka ku limbo lia Debire, yaasa no jita.

³⁹ Yaakumba hamwe ni mwe mwanangana, ni ye yihunda ya kusulangana. Yaashiha ko atu eswe. Yoshua yalinga ku Debire, ni mwe mwanangana walio, ngwe chize alingile ku Hebrone ni ku Libna ni mianangana jo.

⁴⁰ Yoshua yatambula chifuchi cheswe ni mianangana eswe: ku milundu, ni mu yana ya ku chivumbuko, ni ku mikandu ya ku chitokelo, ni mu chifuchi cha ku sude. Kukwasalile niumwe, yaashiha atu eswe, nikulita ni Shimbi ya Mwene Zambi, Zambi ya Aisraele.

⁴¹ Yoshua yatambula chifuchi cheswe chize ku Kadeshe Barnea ku sude ndoo ku limbo lia Gaza ku mbumbulu ya kalunga lwiji, ni chifuchi cheswe cha Goshene, ndoo ku Gibeone ku norde.

⁴² Yoshua yakumba mianangana wano eswe ni chifuchi cho cheswe ha chisuho chimuwika, mumu Mwene Zambi, Zambi ya Aisraele, yaashila jita.

⁴³ Mwabwamuze Yoshua ni tujita twenyi yaahiluka ku musumba wo ku Gilgale.