Yoshua 1 - Mukanda Wa Zambi 1970

Kululika ha kuzauka Yordau

¹ Muze Mose, kavumbi ka Mwene Zambi, hafwa, Mwene Zambi yambila Yoshua, mwana wa Nune, chikwashi cha Mose, ngwenyi:

² “Kavumbi kami Mose hafwa. Haliabwila katuka, yena ni atu wano eswe, zaukenu Yordau, hanga nunjile mu chifuchi chize ngunahe Aisraele.

³ Kuma kweswe kuze munukaliata hinanwaha ko, ngwe chize nalakenyene Mose.

⁴ Njiza yenu muyikabwa chize ku puya ku sude ndoo ku milundu ya Libano ku norde, chize ku lwiji munene Ufrateze ku chivumbuko ndusu mu chifuchi cha Ahite ndoo ku kalunga lwiji Mediterane ku chitokelo.

⁵ Ha matangwa eswe a mwono we niumwe kechi kuhasa ku kukumba. Mungubwa hamwe ni yena ngwe chize nabwile hamwe ni Mose. Chichi kakuhichika hanji kukwehuka nichimwe.

⁶ Takama, hamuka, mumu yena muukatetekela atu wano mu chifuchi chino cha chihinga nalakenyene tushakulu two.

⁷ Takama lume, hamuka, funga kanawa Shimbi jeswe jize kavumbi kami Mose akulongesele. Kanda ulelesa Shimbi niyimwe, mba ukawahe kweswako muukaya.

⁸ Mukanda uno wa Shimbi chatamba kuwalakana matangwa eswe. Uushinginyeka mwalwa ni ufuku, hanga umanunune yeswe yize yinasonewa mo. Mba muukawaha, muukayuka mu milimo ye,

⁹ Chakwambile cho, nyi? Takama, hamuka. Kanda wivwa woma, kanda ulekumuka, mumu yami Mwene Zambi, Zambi ye, nguli ne kweswako mwoya.”

Yoshua yahana Shimbi kuli atu

¹⁰ Mba Yoshua yambila miata ja atu ngwenyi:

¹¹ “Balikenu hakachi ka musumba, lwezenu atu ngwenu: ‘Lulikenu yakulia ya mu jila, mumu kulutwe lia matangwa atatu munukazauka Yordau ni kunjila mu chifuchi cha chihinga chize Mwene Zambi, Zambi yenu, ananwehe.’ ”

¹² Yoshua yambila mavungu ja Rubene, ni Gade, ni Chipinji cha Manase, ngwenyi:

¹³ “Iwulukenu maliji waze Mose, kavumbi ka Mwene Zambi anulwezele ngwenyi: ‘Mwene Zambi, Zambi yenu, makanwaha chifuchi chino cha Yordau nukatwame mo.’

¹⁴ Mapwo ni ana jenu, ni ngombe jenu, maakasala mu chifuchi chino muno musali lia Yordau. Alioze tujita twenu maakalipakata ni kubalika kulutwe lia usoko wo ni kwakwasa mu jita,

¹⁵ ndoo ni muze haatambula chifuchi musali lia Yordau ku chitokelo, chize Mwene Zambi ahele. Muze hahana uhwimino ku mavungu eswe ja Israele, mba munukahiluka ni kutwama mu chifuchi chenu ku chivumbuko cha Yordau, chize Mose, kavumbi ka Mwene Zambi, hananwehe.”

¹⁶ No yaakumbulula Yoshua ngwo “Mutulinga yeswe yize hiwatwamba, mutuya kweswako muututuma.

¹⁷ Mutukwononokena ngwe chize twononokenene Mose matangwa eswe. Mwene Zambi, Zambi ye, abwe hamwe ni yena ngwe chize abwile hamwe ni Mose!

¹⁸ Mweswawo malitachika ni chiyulo che, hanji kukolema Shimbi je, mutumushiha. Takama, hamuka!”