Yona 4 - Mukanda Wa Zambi 1970

Utenu wa Yona ni keke ya Zambi

¹ Alioze Yona yevwa kubihia, yatenuka.

² Yamba ngwenyi: “Mwene Zambi, cheka naliangile kwamba muze nabwile mu chifuchi chami, ngwami, kuuchi kwonona Aninive, nyi? Kashika nanyongene kuchinyina ku chifuchi cha Espanye! Te ngunanyingika ngwami, yena uli Zambi ya zango ni keke, matangwa eswe uli chihumikiji kanda mukwa utu, wakwalumuna nikawashi manyonga, wakwecha kumwesa lamba.

³ Kashika Mwene Zambi, ngweche kwami ngufwe. Ngunamono ngwe chibema kufwa, chibi kutwama ni mwono.”

⁴ Mwene Zambi yakumbulula ngwenyi: “Kutenuka chino chili chibema nyi?”

⁵ Yona yatuhuka ku chivumbuko cha limbo, yatwama kwenyi hashi nee. Yazembeka kamwe kachikulika, yatwama mu chihuhumuke chacho, yashimbwila amone yize muyibwa mu Ninive.

⁶ Mba Mwene Zambi yatatwisa lwitwi a mwehe Yona chihuhumuke hanga atwame kanawa. Yona yawahilila ni mwe lwitwi.

⁷ Alioze muze hikwacha Zambi yatuma umwe katutu alie mwe lwitwi, mwe lwitwi yoma.

⁸ Muze tangwa hiliavumbuka, Zambi yatuma fuji ya chivukuminya ya ku chivumbuko, mba Yona yalezumuka mumu ha kusasaminya cha tangwa ha mutwe wenyi, yazanga kwenyi kufwa. Ngwenyi: “Changutamba ngufwe lume, hi kutwama ko ni mwono.”

⁹ Alioze Mwene Zambi yamwamba ngwenyi: “Kuma chinalite kutenuka mumu lwitwi homa, nyi?” Yona ngwenyi: “Chinalite ngutenuke hanga ngufwe kwami!”

¹⁰ Mwene Zambi ngwenyi: “Lwitwi yono hasoka, hatatuka ha tangwa limuwika, ha tangwa lia muchaali homa kwenyi. Yena kuwalingile ko Chuma nichimwe hakutwala ku lwitwi yono, hindu unamuvwila chinyengo!

¹¹ Alioze Ninive lili limbo linene, lili ni ana 120,000 waze keeshi milonga, ni yimuna yinji. Kuma yami kuchangutambile kweevwila keke, nyi?”