Yona 3 - Mukanda Wa Zambi 1970

Yona yononokena Mwene Zambi

¹ Mwene Zambi yahanjika nawa kuli Yona,

² yamwamba ngwenyi: “Yako ku Ninive, limbo linene, wambujole kuli atu liji lize ngunakulweze.”

³ Mba Yona yononokena liji lia Mwene Zambi, yaya ku Ninive, limbo linene lize akwenda matangwa atatu.

⁴ Yanjila mu limbo, muze henda tangwa limuwika, yambujola kuli atu ngwenyi: “Matangwa makumi awana asala ko hanga onone Ninive!”

⁵ Aninive yaafuliela liji lia Mwene Zambi. Yaabatula ngwo, mutu mweswe ajile kulia, atu eswe, chize kuli pichi ndoo kuli yiswale, azale mianji ha kusoloka ngwo, haalumuka ku mbunge.

⁶ Muze mwanangana wa Ninive hachivwa, yakatuka ha chitwamo chenyi, yazula mahina jenyi a wanangana, yazala mwanji, yatwama mu uto.

⁷ Yahana Shimbi kuli Aninive ngwenyi: “Yami mwanangana ni akwa lutwe jami, tunanwehe Shimbi ngwetu: mutu kanda alia nichimwe. Chibwe yimuna a mu chihunda, anene ni akepe, kanda alia chibwe kunwa ka.

⁸ Atu eswe azale mianji ni yimuna eswe aajike mianji. Mutu mweswe chamutamba kulemba ni umwenemwene kuli Zambi ni kwecha ungulungulu ni ungalwe.

⁹ Iya Unanyingika, hanji Zambi malumuna manyonga jenyi, ni kwecha kutenuka, hanga kutuchi kukuwa!”

¹⁰ Zambi yamona chize atu haalinga; yamona ngwenyi, heecha yibi yo. Mba yalumuna manyonga jenyi, hikaamwesene ko lamba ngwe chize ahalile.