Yona 2 - Mukanda Wa Zambi 1970

Yona yalemba

¹ Yona amuze mu jimo lia yishi yalemba kuli Mwene Zambi, Zambi yenyi, ngwenyi:

² “Aa Mwene Zambi, mu lamba liami, nakutambikile, ni yena yiungukumbulula. Muma lia afu yingukololoka ungukwase, yiungubanjika.

³ Yiungumbila muma mwajotoka, ha mashima ja kalunga lwiji, mukachi ka meya, ndundo jeswe ja miavu ye yijingushata.

⁴ Yingunyonga ngwami, hiwanguhuma ku meso je, chichi kamona nawa nichimwe zuwo lie lia chijila.

⁵ Yingushimbama, meya yaanguswenya. Yingubwa mu kalunga lwiji, yisesu ya mu meya yiingujingilika ku mutwe.

⁶ Yingupalumuka ndoo kuze kwabutukila milundu, muma muze yajilo yamo muyingwajilila mo ndoo ku miaka yeswe. Alioze yena, Mwene Zambi, Zambi yami, yiunguchiza muma mwajotoka, yiungupwisa ni mwono.

⁷ Aa Mwene Zambi, muze nalezumukine yingulemba kuli yena, yiungubanjika mu zuwo lie lia chijila.

⁸ Waze akukombelela mahamba amokomoko haanehuka yena chikwashi cho.

⁹ Alioze yami mungukuhalisa ni miaso, mungukulambula mulambu ni kumanununa chize nakulakenyene. Shina yena Mwene Zambi muuhasa kungulamwina!”

¹⁰ Mba Mwene Zambi yambila yishi hanga akasajile Yona ku tunda. Yichibwa Chenacho.