Yona 1 - Mukanda Wa Zambi 1970

Zambi yatuma Yona, neye yalituna

¹ Limwe tangwa Mwene Zambi yahanjika kuli Yona mwana wa Amitai.

² Yamwamba ngwenyi: “Yako ku Ninive, limbo lize linene, waalweze yibi yo, mumu hinamona ungulungulu wa atu jamo.”

³ Alioze mwe Yona, kayile ko ku Ninive, yaya kweka achine Mwene Zambi. Yaya ku limbo lia Jope, yawana ko ulungu uze te unambe kuya ku chifuchi cha Espanya. Yalanda mukanda wenyi, yanjila hamwe ni akwa ulungu ni kuya ku Espanya, kuze anyongene ngwenyi, mahasa kuswama ku meso ja Mwene Zambi.

⁴ Alioze Mwene Zambi yatuma fuji ya tachi ha kalunga lwiji, kangonga yabwa munene, ulungu yiwamba kubalwoka.

⁵ Akwa ulungu yeevwa woma, yaakololoka. Mutu mweswe yalemba kuli zambi yenyi amukwase. Kashika, mumu ha utoji, yaambila yuma mu meya hanga ulungu ulele. Alioze Yona te hapalumuka muchima lia ulungu, haya tulo.

⁶ Mwata wa ulungu yamuwana, yamwamba ngwenyi: “Mukwetu, mumu yika yena unabombo? Hinduka ulembe kuli Zambi ye hanga atukwase. Hanji matuvwila kama keke, atulamwine.”

⁷ Akwa ulungu yaalihanjikisa ngwo: “Tala, tutenu chela hanga tumone yoze unatukokela mulonga uno ni kutunjisa mu utoji.” Yaalinga Chenacho, yaatongola Yona.

⁸ Mba yaamwamba ngwo: “Kuma yena mwe unatukokela yino yeswe nyi? Haliabwila tulweze! Yika unalingi kuno? Ku chifuchi chika unakatuka? Uli wa ku vungu lika?”

⁹ Yona yakumbulula ngwenyi: “Nguli Kahebreu. Nakuwayila Mwene Zambi, Zambi ya mwilu, yoze watangile hashi ni kalunga lwiji.”

¹⁰ Yona yaweza ho nikwalumbunwina chize hachina Mwene Zambi. Akwa ulungu yeevwa woma kuhiana, yaamwamba ngwo: “Chuma chino wali nga chili chibi!”

¹¹ Shimbu maachihanjika kangonga yoka kuhiana, mba akwa ulungu yaamuhula ngwo: “Kuchi mutukulinga mba fuji yihole kama?”

¹² Yona ngwenyi: “Ngumbilenu kwami mu meya, mba fuji yihole. Mumu ngunanyingika ngwami, yami naneha mulonga uno, kashika nwanjila mu utoji wa kangonga yono.”

¹³ Hindu akwa ulungu yeeseka kufundula ni tachi jo jeswe. Alioze kaahashile ko mumu kangonga yoka kuhiana.

¹⁴ Mba yaakololoka kuli Mwene Zambi ngwo: “Aa Mwene Zambi, tunakulembe, kanda utumwesa kama lamba nyi mutu yono wafwa! Aa Mwene Zambi, yino yeswe yena mwene wayilinga.”

¹⁵ Mba yaanda Yona, yaamumbila mu meya. Ha shimbu lizeliene meya yaahola lume kuluu.

¹⁶ Akwa ulungu yeevwa woma, yaafuliela Mwene Zambi, yamulambula milambu, yaalakenya kumulingila.

¹⁷ Muze haambila Yona mu kalunga lwiji, Mwene Zambi yambila yishi munene amumine. Yona yabwa mu jimo lia yishi matangwa atatu.