Yoano 9 - Mukanda Wa Zambi 1970

Yesu yawuka mutu wasemukine kapuputa

¹ Muze te Yesu anabalika kumwe kuma, yamona mutu wasemukine kapuputa.

² Tumbaji twenyi yaamuhula ngwo: “Longeshi, mumu yika mutu yono wasemukine kapuputa, ha milonga yenyi mwene hanji ya yisemi jenyi?”

³ Yesu ngwenyi: “Hi ha milonga yenyi mwene ko, chibwe ya yisemi jenyi. Kali kapuputa ha kusolola yitanga ya Zambi muli iye.

⁴ Chatutamba kumanununa yitanga ya yoze wangutumine shimbu kuchili mwalwa. Ufuku uneza kuze niumwe mahasa kulinga milimo.

⁵ Shimbu nguchili hashi nguli pangu lia hashi.”

⁶ Muze hamba maliji wano, Yesu yafwila mate hashi yalinga ndambo ni mate waze, yakwitakwita meso ja kapuputa ni ndambo yize,

⁷ yamwamba ngwenyi: “Yako usane ku meso mu shima lia Silome.” (Kulumbunuka ngwo: “Hatumiwa.”) Kapuputa yaya, yasana ku meso, yahiluka ni kumona.

⁸ Enyembo ni waze amumwene hatangu nikuunjila yaamba ngwo: “Mutu awu hi yoze ko te wakutwama nikuunjila, nyi?”

⁹ Akwo yaamba ngwo: “Yomwene.” Akwo ngwo: “Ka, hi iye ko, alioze kalifwa nenyi.” Mwe mutu ngwenyi: “Yami mwene.”

¹⁰ No yaahula ngwo: “Ngwe kuchi alawisanga meso je?”

¹¹ Neye ngwenyi: “Mutu yoze anavuluka ngwo Yesu, mwe walinganga ndambo, yakwita meso jami, yangwamba ngwenyi: ‘Yako usane mu shima lia Silome’. Nayanga, ni muze hinasana, yingulaule ku meso.”

¹² No yaamuhula ngwo: “Kulihi ali mutu yoze?” Neye ngwenyi: “Chanyingikine.”

Afariseu yaahula kapuputa

¹³ Atu yaatwalila Afariseu mutu yoze wabwile kapuputa.

¹⁴ Te tangwa lia kuhwima lia Ayuda muze Yesu alingile ndambo ha kulawisa meso ja mutu yoze.

¹⁵ Kashika Afariseu yaamuhula nawa chize habutuka kumona. Neye yaakumbulula ngwenyi: “Kangukwitanga ndambo ha meso, yingusana, mba haliabwila ngunamono.”

¹⁶ Amwe a kuli Afariseu yaamba ngwo: “Mutu yoze walinganga Chuma chino hi wa kuli Zambi ko, mumu keshi kufunga Shimbi ya tangwa lia kuhwima.” Alioze akwo ngwo: “Ngwe kuchi mutu mahasa kulinga yilayi yino nyi kali Chivulumunyi?” Yaalihandununa ha chikuma chino.

¹⁷ Afariseu yaahula nawa kapuputa ngwo: “Yena kuchi unambe hakutwala kuli mutu yoze wakulawisanga meso?” Iye ngwenyi: “Kali mukwa munanyi wa Zambi.”

¹⁸ Alioze, muze kanda achitambika yisemi jenyi, te kaasolo kufuliela ngwo, yono mwe wabwile kapuputa, alioze haliabwila kanamono.

¹⁹ Afariseu yaahula yisemi jenyi ngwo: “Yoze mwe mwanenu, nyi? Nunashindakenya ngwenu, mwenawo wasemukine kapuputa, nyi? Ngwe kuchi mba haliabwila kanamono?”

²⁰ Yisemi ngwo: “Tunanyingika ngwetu, kali mwanetu, ni tunanyingika ngwetu, wasemukine kapuputa.

²¹ Alioze kutwanyingikine chize anamono haliabwila. Kutwanyingikine yoze wamulawisa meso. Muhulenu, hakola kulu, kumakumbulula iye mwene.”

²² Yisemi jenyi yaamba chino mumu yeevwila Ayuda woma. Mumu Ayuda alitesele kulu kutuhiwsa ku zuwo lia kuwayila mweswe mutu matayiza ngwenyi, Yesu mwe Chilamwina yoze Zambi alakenyene.

²³ Kashika yisemi yaamba ngwo: “Hakola kulu, muhulenu.”

²⁴ Afariseu yaatambika chisuho cha muchaali yoze wabwile kapuputa, yaamwamba ngwo: “Hanjika umwenemwene ku meso ja Zambi. Tunanyingika ngwetu, mutu yono kali Chivulumunyi.”

²⁵ Neye ngwenyi: “Chanyingikine nyi kali Chivulumunyi nyi ka. Chuma chimuwika ngunanyingika ngwami, nabwile kapuputa, haliabwila ngunamono.”

²⁶ Yaamuhula ngwo: “Kuchi akulinganga? Ngwe kuchi akulawisanga meso?”

²⁷ Neye ngwenyi: “Nanulwezanga kulu, alioze kunwanguvwile. Kuchi kevwe nunazange kwivwa nawa chisuho chikwo? Kota ni yenu nawa nunazange kubwa tumbaji twenyi, nyi?”

²⁸ Yaamutuka ni kumwamba ngwo: “Katuka! Yena uli kambaji ka mutu yoze, yetu tuli tumbaji twa Mose.

²⁹ Tunanyingika ngwetu, Zambi hanahanjika ni Mose, alioze yono, kutwanyingikine chibwe kuze anakatuka.”

³⁰ Neye ngwenyi: “Chino chikomokeso! Kuma, kunwanyingikine kuze anakatuka, nyi? Hindu hangulawisa meso.

³¹ Tunanyingika ngwetu, Zambi keshi kwivwa yivulumunyi. Alioze kakwivwa yoze wakumulemesa ni kulinga yize anazange.

³² Kanda twivwa kama ngwo, umwe mutu hanalawisa meso ja yoze wasemukine kapuputa.

³³ Nyi mutu yono hi wa kuli Zambi ko, kachi kahashile kulinga nichimwe.”

³⁴ Yaamukumbulula ngwo: “Yena wasemukine pundu mu shili, unazange kutulongesa, nyi?” Mba yaamuhanga liakulu ku zuwo lia kuwayila.

Upuputa hakutwala ku yuma ya Zambi

³⁵ Yesu yevwa ngwo, Afariseu haamuhanga. Mba muze hamuwana nawa, yamuhula ngwenyi: “Yena unafuliela Mwana Mutu, nyi?”

³⁶ Neye ngwenyi: “Ngwambulwile yo, hanga ngumufuliele.”

³⁷ Yesu yamwamba ngwenyi: “Unakamumona kulu: Mwenawo unahanjika nenyi haliabwila.”

³⁸ Mwe mutu ngwenyi: “Mwene, ngunafuliela.” Mba yafulamana ku meso ja Yesu.

³⁹ Yesu yamba ngwenyi: “Ha ubatwilo nejilile hano hashi, hanga tupuputa amone, ni hanga waze akumona alumuke tupuputa.”

⁴⁰ Amwe Afariseu, waze te ali hamwe nenyi, yeevwa maliji wano, yaamuhula ngwo: “Kuma ni yetu nawa tuli tupuputa, nyi?”

⁴¹ Yesu ngwenyi: “Nyi te nuli tupuputa, kachi kunushi ni uhiso, alioze mumu nunambe ngwenu: ‘Twakumona,’ kashika nuli ni uhiso ndoo haliabwila.”