Yoano 8 - Mukanda Wa Zambi 1970

Pwo yoze wakwachikile mu utanji

¹ Alioze Yesu yaya ku mulundu wa Olive.

² Muze hikwabatwoka ngwangwangwa, Yesu yahiluka ku zuwo lia Zambi lia Ayuda. Atu eswe yaamukunguluka. Neye yatwama mba yabutuka kwalongesa.

³ Alongeshi a Shimbi ni Afariseu yaamunehena pwo yoze wakwachikile mu utanji, yaamumika ku meso ja atu eswe,

⁴ yaambila Yesu ngwo: “Longeshi, pwo yono kaakwachikanga ha shimbu lizeliene te analingi utanji.

⁵ Mose hanatwehe Shimbi ya kushiha mapwo ngwe yono ni mawe. Yena kuchi unambe?”

⁶ Yaamba chino ha kumweseka hanga amusume mulonga. Alioze Yesu yahetama hashi ni kusoneka ni munwe.

⁷ Muze anyongonwene kumuhula. Yesu yahetuka nikwamba ngwenyi: “Mweswe hakachi kenu kanda achivulumuna kama aliange kumwasa liwe.”

⁸ Mba yahetama nawa nikusoneka hashi.

⁹ Muze heevwa maliji wano, yaatuhuka umuwika umuwika, hatangu makulwana. Yesu yasala ukawenyi ni pwo yoze te unamana ku meso jenyi.

¹⁰ Yesu yahetuka nawa, yamuhula ngwenyi: “Mama, alihio, niumwe kakuhishile, nyi?”

¹¹ Yakumbulula ngwenyi: “Ewa, niumwe, Mwene.” Yesu ngwenyi: “Ni yami chakuhishile nichimwe. Yako kwe, alioze kanda uvulumuna nawa.”]

Yesu lie pangu lia hashi

¹² Yesu yaamba nawa ngwenyi: “Lie pangu lia hashi yami. Yoze wakungukaula mabwa ni pangu lia mwono, kechi kenda nichimwe mu milima.”

¹³ Afariseu yaamwamba ngwo: “Wakulishindakenya yena mwene. Yize wakuhanjika atu keechi kuyalula.”

¹⁴ Yesu ngwenyi: “Chibwe nakulishindakenya yami mwene, hindu shindakenyo yami yili yamwenemwene, mumu ngunanyingika kuze nakatukile ni kuze ngunayi. Alioze yenu kunwanyingikine kuze nakatukile ni kuze ngunayi.

¹⁵ Yenu nwakubatula nikulita ni ndako ja atu, yami Chishi kubatwila niumwe.

¹⁶ Alioze chibwe ngubatule, hindu ubatwilo wami muulita, mumu hi nguli ukawami ko, alioze Tata yoze wangutumine kali hamwe ni yami.

¹⁷ Hichinasonewa mu Shimbi jenu ngwo: ‘Nyi atu aali kaanashindakenya shindakenyo yimuwika, shindakenyo yize yili yamwenemwene.’

¹⁸ Nakulishindakenya yami mwene, ni Tata yoze wangutumine kakungushindakenya nawa.”

¹⁹ No yaamuhula ngwo: “Yolihi Tatenu?” Yesu ngwenyi: “Kunwanyingikine chibwe yami chibwe Tata. Nyi nwangunyingika, kachi mununyingika nawa Tata.”

²⁰ Yesu yaalongesa maliji wano mu zuwo lia Zambi, homa haze te hatwama mishete ya chawana. Mutu niumwe wamukwachile, mumu te ola yenyi kanda yichiheta.

Kunwahashile kuya kuze yami ngunayi

²¹ Yesu yaamba nawa ngwenyi: “Yami ngunayi kwami. Munukangufupa, alioze munukafwa mu milonga yenu. Kuze ngunayi kunwahashile kwiza ko.”

²² Ayuda yaalihanjikisa ngwo: “Makalishiha, nyi? Mumu kanambe ngwenyi: ‘Kuze ngunayi kunwahashile kwiza ko.’ ”

²³ Yesu ngwenyi: “Yenu nuli akwa hashi hano, alioze yami mwilu ngunakatuka. Nuli akwa hashi, alioze yami hi nguli mukwa hashi ko.

²⁴ Kashika hinanwamba ngwami, munukafwa mu milonga yenu. Mumu munukafwa mu milonga yenu, shina munufuliela ngwenu, ‘Yami Nguli Yoze Nguli.’ ”

²⁵ Yaamuhula ngwo: “Yena iya?” Yesu ngwenyi: “Nguli yoze hingunanwambulwila kulu chize ku kabutu.

²⁶ Yuma yinji nguli nayo ya kwamba ni kubatula hakutwala kuli yenu. Yoze wangutumine kakuhanjika umwenemwene. Nakuhanjika kuli akwa hashi yize lume nalilongesele kuli iye.”

²⁷ Keevwile ko ngwo, kanahanjika hakutwala kuli Tata.

²⁸ Kashika Yesu yaamba ngwenyi: “Muze hinwazundula mwe Mwana Mutu, mba munukanyingika ngwenu, ‘Yami Nguli Yoze Nguli.’ Munukanyingika ngwenu, Chishi kulinga nichimwe ukawami. Nakuhanjika lume yize Tata angulongesele.

²⁹ Yoze wangutumine kali hamwe ni yami. Kanguhichikile ko ukawami, mumu nakulinga yize yakumuwahila matangwa eswe.”

³⁰ Muze Yesu ahanjekele yuma yino, anji amufulielele.

Akwa kutusuka ni ndungo

³¹ Kashika Yesu yambila Ayuda waze amufulielele ngwenyi: “Nyi munwononoka ku longeso liami, chamwenemwene munubwa tumbaji twami.

³² Mununyingika umwenemwene, ni umwenemwene muunutusula.”

³³ Yamukumbulula ngwo: “Tuli a ku vungu lia tata Abrahama, haanga kanda tubwa kama ndungo ja mutu niumwe. Ngwe kuchi muuhasa kwamba ngwe: ‘munutusuka’?”

³⁴ Yesu ngwenyi: “Chamwenemwene ngunanwambulwila ngwami, mutu mweswe wakuvulumiona kali ndungo ya shili.

³⁵ Ndungo keshi kutwama mu zuwo lia mwene wenyi matangwa eswe, alioze mwana wakutwama mo matangwa eswe.

³⁶ Nyi mwe Mwana manutusula, kachi munutusuka chamwenemwene.

³⁷ Ngunanyingika ngwami, nuli a ku vungu lia Abrahama, alioze nwakuzanga kungushiha, mumu kunushi kutayiza longeso liami.

³⁸ Yami ngunahanjika yize angulwezele Tata, alioze yenu nwakulinga yize anwambile tatenu.”

³⁹ Yaamukumbulula ngwo: “Tata yetu kali Abrahama.” Yesu yaakumbulula ngwenyi: “Nyi chamwenemwene nuli ana ja Abrahama, kachi munulinga yitanga yize alingile.

⁴⁰ Alioze haliabwila nwakufupa kungushiha yami muze nakunwambulwila umwenemwene uze nevwile kuli Zambi. Abrahama kalingile ko nichimwe ngwe chino.

⁴¹ Nwakulinga yitanga yize alingile tatenu.” Ayo ngwo: “Kutwasemukine ku utanji. Tata umuwika tukwete, mwe Zambi.”

⁴² Yesu ngwenyi: “Nyi chamwenemwene Zambi mwe Tatenu, kachi mununguzanga, mumu nakatukile kuli Zambi, ni Flaliabwila nguli hano. Chalijilile yami mwene, alioze iye wangutumine.

⁴³ Kuchi kevwe kunushi kwivwa yize nakunwamba? Mumu nuli akalu ha kwivwa liji liami.

⁴⁴ Nuli ana ja Tatenu Sakwonga. Nwakuzanga kulinga yize akuzanga Tatenu. Iye wabwile mukwa kushiha atu chize ku Ubutukilo. Kabwile ko mu umwenemwene nichimwe, mumu muli iye umwenemwene kuushimo. Muze akuhanjika mahuza, kakuhanjika nikulita ni ndako jenyi, mumu kali mukwa mahuza ni tato ya mahuza.

⁴⁵ Alioze yami nakuhanjika umwenemwene, kashika kunushi kungufuliela.

⁴⁶ Iya hakachi kenu mahasa kungukumika ngwenu, hingunavulumuna? Nyi ngunahanjika umwenemwene, kuchi kevwe kunushi kungufuliela?

⁴⁷ Yoze wa kuli Zambi kakwivwa maliji ja Zambi, alioze yenu hi nuli a Zambi ko, kashika kunushi kwivwa.”

Yesu ni Abrahama

⁴⁸ Ayuda yaamuhula ngwo: “Kutwahanjikile kanawa ngwetu, uli Kasamaria, ni mwiku wa luchisa ukwete, nyi?”

⁴⁹ Yesu ngwenyi: “Mwiku wa luchisa Chishi nawo. Nakulemesa Tata, alioze yenu nwakungulelesa.

⁵⁰ Chishi kufupa ulemu wa yami mwene. Kwali yoze wakungufupila wo, neye kakubatula kanawa.

⁵¹ Chamwenemwene ngunanwambulwila ngwami, yoze wakwononokena liji liami kechi kafwa nichimwe ndoo ku miaka yeswe.”

⁵² Ayuda ngwo: “Eyoo! Haliabwila hitwanyingika pundu ngwetu, mwiku wa luchisa ukwete! Abrahama hanafu, ni akwa munanyi a Zambi haanafu, hindu yena unambe ngwe: ‘Yoze mononokena liji liami kechi kafwa nichimwe ndoo ku miaka yeswe.’

⁵³ Abrahama, tata yetu, hanafu. Unashinginyeka uli munene Wahiana iye, nyi? Akwa munanyi ja Zambi haanafu. Yena wakulipwisa ngwe iya?”

⁵⁴ Yesu ngwenyi: “Nyi mungulilemesa yami mwene, ulemu wami muubwa wamokomoko. Yoze wakungulemesa mwe Tata, yoze nwakwamba ngwenu: ‘mwe Zambi yetu.’

⁵⁵ Kunwamunyingikine nilimwe tangwa, alioze yami ngunamunyingika. Nyi mungwamba ngwami, chamunyingikine, mungubwa mukwa mahuza ngwe yenu. Alioze ngunamunyingika, ni nakwononokena liji lienyi.

⁵⁶ Tatenu Abrahama yawahilila ni kunyonga ngwenyi, mamona tangwa liami. Yalimona, yawahilila.”

⁵⁷ Ayuda ngwo: “Yena kanda uchibwa ni miaka makumi atano. Kuma hiunamono Abrahama, nyi?”

⁵⁸ Yesu ngwenyi: “Chamwenemwene ngunanwambulwila ngwami, muze te Abrahama kanda achisemuka, ‘Yami Nguli.’ ”

⁵⁹ No yaanda mawe hanga amwase. Alioze Yesu yaswama, yatuhuka mu zuwo lia Zambi.