Yoano 6 - Mukanda Wa Zambi 1970

Yesu yalisa atu tununu atano

¹ Mwabwamuze Yesu yazauka chitende cha Galilea (Chenacho cha Tiberiade).

² Mbunga yinene yaamukaula, mumu te haamona yilayi yize alingile yakuwuka mieji.

³ Yesu yakanduka ha mulundu, yatwama ho hamwe ni tumbaji twenyi.

⁴ Kubalika, chiwanyino cha Ayuda, te hichabwa hakamwihi.

⁵ Yesu yahetuka, yamona mbunga yinene kaaneza kuli iye, yahula Filipe ngwenyi; “Kulihi mutuhasa kulanda yakulia yinazuku ni kulisa atu wano eswe?”

⁶ (Yachamba ha kweseka Filipe, mumu iye mwene te kananyingika chize malinga.)

⁷ Filipe ngwenyi: “Chibwe kulakaji jaali ja mbongo kutwahashile kulanda najo mbolo jinazuku hanga mutu ni mutu atambule kachihanda.”

⁸ Umwe mukwo wa kuli tumbaji twenyi, Andre, kanuke ka Simone Petulu, yamwamba ngwenyi:

⁹ “Mwana lunga uli hano ni mbolo jitano ja tiriku ni yishi aali. Alioze ngwe kuchi mujikwasa atu abwa haha?”

¹⁰ Yesu yamwamba ngwenyi: “Twamisenu atu eswe.” (Mwambu unji wabwile kuma kuze.) Mba yaatwama. Kwoka cha malunga te tununu atano.

¹¹ Yesu yanda mbolo, yasakwila Zambi, yajanyina waze te anatwama ko, yaaha nawa yishi chizechene. No eswe yaakuta.

¹² Muze eswe haakuta, Yesu yambila tumbaji twenyi ngwenyi: “Tongonenu yibalubalu yize yasala, hanga nichimwe kuchichi katoka.”

¹³ Kashika yaatongona yibalubalu ya mbolo jitano, yaazalisa tupaya kumi ni aali.

¹⁴ Muze atu amwene chilayi chize alingile Yesu, yaamba ngwo: “Mutu yono kali mukwa munanyi wa Zambi yoze chatamba kwiza hano hashi.”

¹⁵ Yesu yanyingika ngwenyi, kanazange kwiza ni kumukwata ni tachi hanga akamupwise mwanangana. Kashika yakatuka ko, yaya ukawenyi ha mulundu.

Yesu yenda ha chitende

¹⁶ Muze tangwa hiliendala chikolo, tumbaji twenyi yaapalumuka ku chitende,

¹⁷ yaanjila mu wato, yaabutuka kuzauka chitende ni kuya ku limbo lia Kafarnaume. Te tangwa hilianjila kulu, alioze Yesu te kanda achiheta.

¹⁸ Meya ha chitende te kaanafuzu, yiikubwa fuji ya tachi.

¹⁹ Muze tumbaji haabulula kilometro jisambano, yaamona Yesu te kanende ha meya ni kukundama ku wato. No yeevwa woma.

²⁰ Alioze Yesu yaamba ngwenyi: “Yami mwene, kanda nwivwa woma!”

²¹ Yeevwa kuwaha ha kumunjisa mu wato, mba susumuku wato hiwaheta ku mubumbulu, kuze te anatalikisa.

Atu yaafupa Yesu

²² Muze hikwacha mbunga yize asalile musali lia chitende, yaamona ngwo, shina wato umuwika uliko. Yaanyingika ngwo, Yesu kanjilile ko mu wato hamwe ni tumbaji twenyi, alioze tumbaji wika anakaya.

²³ Ha shimbu lize, mato akwo, waze akatukile ku limbo lia Tiberiade, yaaheta homa haze alilile mbolo, muze te Mwene Yesu hasakwila Zambi.

²⁴ Muze mbunga haamona ngwo, Yesu chibwe tumbaji twenyi keeshiko, yaanjila mu wato, yaahiluka ku limbo lia Kafarnaume nikumufupa.

Yesu ye mbolo ya mwono

²⁵ Atu waze yaawana Yesu musali, yaamuhula ngwo: “Longeshi, shimbu lika wahetanga kuno?”

²⁶ Yesu ngwenyi: “Chamwenemwene ngunanwambe ngwami, nunangufupu mumu nwalile mbolo ni nwakuchile, hi mumu ko nwamwene yilayi yami.

²⁷ Kanda nulingila mbolo yize yakubola, alioze lingilenu mbolo yize yakunyongonona, yize yakupwisa atu ni mwono wa miaka yeswe. Mbolo yino Mwana Mutu makanwaha yo, mumu Tata Zambi hanamuse chinyingi chakulweza ngwenyi, iye mwene hanamutongola.”

²⁸ No yaamuhula ngwo: “Kuchi chatutamba kulinga mba tulinge yitanga yize akuzanga Zambi?”

²⁹ Yesu ngwenyi: “Yuma yize akuzanga Zambi yenayi ayi, kufuliela yami yoze hanatumu.”

³⁰ Ayo ngwo: “Chilayi chika muulinga, mba hanga tukufuliele? Chika wakulinga?

³¹ Tushakulu twetu alile mbolo yize mana, mu puya, ngwe hichinasonewa mu Mukanda wa Zambi ngwo: ‘Yaaha yakulia yo, mbolo yize yahulumukine mwilu.’ ”

³² Yesu ngwenyi: “Chamwenemwene ngunanwabulwila ngwami, hi Mose ko wanuhele mbolo ya mwilu, alioze Tata wakunwaha ye mbolo yamwenemwene ya mwilu.

³³ Mumu mbolo yize Zambi akuhana yili yoze hanahulumuka mwilu. Kakupwisa akwa hashi ni mwono.”

³⁴ Ayo ngwo: “Mwata, twehe kama matangwa eswe mbolo yize.”

³⁵ Yesu ngwenyi: “Yami nguli ye mbolo yize yakupwisa atu ni mwono. Yoze meza kuli yami, kechi kevwa zala chibwe hakepe. Yoze mangufuliela kechi kevwa nawa pwila nichimwe.

³⁶ Alioze ngunanwambe ngwami, hinunangumono, hindu kunushi kufuliela.

³⁷ Mweswawo Tata anangwehe kumeza kuli yami; mweswawo meza kuli yami chichi kulituna ye,

³⁸ mumu hingunahulumuka mwilu ha kulinga yize anapale yoze wangutumine, hi yize ngunapale yami mwene ko.

³⁹ Uno we upale wa yoze wangutumine ngwo, hanga chichi katokesa niumwe wa kuli waze hanangwehe, alioze mungukaahindwisa ha tangwa liakusula,

⁴⁰ Mumu Tata kakuzanga ngwenyi, eswe waze haanamono Mwana, ni akumufuliela, abwe ni mwono wa miaka yeswe. Ni yami mungukaahindwisa ha tangwa liakusula.”

⁴¹ Ayuda yaabutuka kulinyenyeta hakutwala kuli Yesu, mumu wambile ngwenyi: “Yami nguli ye mbolo yize yahulumukine mwilu.”

⁴² No yaamba ngwo: “Awu hi Yesu ko mwana wa Josefe, nyi? Tato ni naye tunaanyingika. Mba kuchi anambe ngwenyi: ‘Hingunahulumuka mwilu’?”

⁴³ Yesu ngwenyi: “Litwaminenu kulinyenyeta hakachi kenu.

⁴⁴ Niumwe mahasa kwiza kuli yami, shina Tata yoze wangutumine mamukoka. Ni yami mungukamuhindwisa ha tangwa liakusula.

⁴⁵ Akwa munanyi a Zambi haanasoneka liji lino ngwo: ‘Zambi makalongesa atu eswe.’ Mutu mweswe mevwa liji lia Tata, ni matambula longeso lienyi kumeza kuli yami.

⁴⁶ Chino kuchambile ngwo, umwe hanamono Tata. Shina yoze hanahulumuka mwilu mwe hanamono Tata.

⁴⁷ “Chamwenemwene ngunanwambulwila ngwami, yoze wakufuliela, mwono wa miaka yeswe ali nawo.

⁴⁸ Yami nguli mbolo yize yakupwisa atu ni mwono.

⁴⁹ Tushakulu twenu alile mbolo yize mana, mu puya, alioze haanafu.

⁵⁰ Alioze mbolo yize yakuhulumuka mwilu, mweswe mayilia kechi kafwa.

⁵¹ Yami nguli mbolo yize yakupwisa atu ni mwono, hingunahulumuka mwilu. Nyi mutu malia mbolo yino, kumabwa ni mwono wa miaka yeswe. Mbolo yize mungumwaha, musunya wami, nakuuhana hanga akwa hashi abwe ni mwono.”

⁵² Ha chino, Ayuda yaalihamika kuhiana ngwo: “Ngwe kuchi mutu yono mahasa kutwaha musunya wenyi mu kuulia?”

⁵³ Yesu ngwenyi: “Chamwenemwene ngunanwambulwila ngwami, nyi kunwalile musunya wa Mwana Mutu, nawa nyi kunwanwine manyinga jenyi, kunuchi kubwa ni mwono.

⁵⁴ Yoze malia musunya wami ni manwa manyinga jami, mwono wa miaka yeswe ali nawo. Ni yami mungukamuhindwisa ha tangwa liakusula.

⁵⁵ Mumu musunya wami che kulia chamwenemwene, nyi manyinga jami che kunwa chamwenemwene.

⁵⁶ Yoze wakulia musunya wami ni wakunwa manyinga jami, kakulinunga ni yami, ni yami ni iye.

⁵⁷ Tata yoze wangutumine mwono akwete, ni yami nguli ni mwono mumu hali iye. Chimuwika nawa, yoze mangulia kumabwa ni mwono mumu hali yami.

⁵⁸ Yino ye mbolo yize yahulumukine mwilu, hi yize ko alile tushakulu twenu waze afwile. Yoze wakulia mbolo yino makabwa ni mwono wa miaka yeswe.”

⁵⁹ Yesu yahanjika maliji wano muze alongesele mu zuwo lia kuwayila lia Ayuda mu limbo lia Kafarnaume.

Maliji a mwono wa miaka yeswe

⁶⁰ Muze evwile maliji wano, anji a kuli tumbaji twenyi yaamba ngwo: “Maliji wano akalu. Iya mahasa kweevwa?”

⁶¹ Yesu yanyingika ngwenyi, tumbaji twenyi kaanalinyenyeta ha chikuma chino. Kashika yaahula ngwenyi: “Chino chinanutalingisa, nyi?

⁶² Mba kuchi munukanyonga muze munukamona Mwana Mutu ni kuzezuka kuze abwile hatangu?

⁶³ Mwiku wakupwisa atu ni mwono, alioze musunya kuushi kufumbula nichimwe. Maliji waze hinahanjika kuli yenu kaakuhana mwiku ni kupwisa atu ni mwono.

⁶⁴ Alioze amwe mukachi kenu kunushi kungufuliela.” (Yamba chino, mumu chize ku Ubutukilo yanyingika waze keechi kumufuliela, ni yoze makamukunjika kuli akwa kole jenyi.)

⁶⁵ Yamba nawa ngwenyi: “Kashika nanwambanga ngwami, niumwe mahasa kwiza kuli yami, shina Tata mamwaha cho.”

⁶⁶ Ha chino, anji a kuli tumbaji twenyi yaakatuka. Kaaliendelele ko nawa nenyi.

⁶⁷ Mba Yesu yambila tumbaji kumi ni aali ngwenyi: “Ni yenu nawa nunazange kuya, nyi?”

⁶⁸ Simone Petulu yamukumbulula ngwenyi: “Mwene, kuli iya mutuya? Yena uli ni maliji waze akupwisa atu ni mwono wa miaka yeswe.

⁶⁹ Haliabwila hitwafuliela ni hitwanyingika ngwetu, yena mwe Munangi wakatukile kuli Zambi.”

⁷⁰ Yesu ngwenyi: “Nanutongwele kumi ni aali, nyi? Alioze umuwika mukachi kenu kali wa Sakwonga!”

⁷¹ Yesu yamba maliji wano hakutwala kuli Yudase, mwana wa Simone Kakeriote. Mumu Yudase, chibwe wabwile wa ku mbunga ya tumbaji kumi ni aali, hindu te makakunjika Yesu kuli akwa kole jenyi.