Yoano 4 - Mukanda Wa Zambi 1970

Yesu ni pwo wa ku chifuchi cha Samaria

¹ Afariseu yeevwa atu nikwamba ngwo: “Yesu kakupwisa ni kupapachisa tumbaji anji kuhiana Yoano.”

² (Kafwa, Yesu iye mwene kapapachishile niumwe, tumbaji twenyi wika te akupapachisa atu.)

³ Muze Yesu achivwile, yakatuka ku chifuchi cha Yudea, yahiluka ku chifuchi cha Galilea.

⁴ Ha kuya ko, chamutamba kubalikila mu chifuchi cha Samaria.

⁵ Yaheta ku limwe limbo lia mu Samaria, jina lialio Sikare. Chasulangana ni munda uze Yakoba ahanyine kuli mwanenyi Josefe.

⁶ Yikubwa shima lia meya lia Yakoba. Yesu te hahonga mumu ha wenyi, yatwama ku sesa lia shima, tangwa ha muchima.

⁷ Umwe pwo wa ku Samaria yeza ni kutaha meya. Yesu yamwita ngwenyi: “Ngwehe kama meya a kunwa.”

⁸ (Tumbaji twenyi te haaya ku limbo ni kulanda yakulia.)

⁹ Pwo, Kasamaria, yahula Yesu ngwenyi: “Mhmm! Ngwe kuchi yena Kayuda unangwichi yami Kasamaria meya a kunwa?” (Mumu Ayuda ni Asamaria te keeshi kulikata.)

¹⁰ Yesu ngwenyi: “Ehee! Nyi kuwanyingika chawana chize Zambi akuhana kuli atu, nawa nyi kuwanyingika yoze unakwichi meya a kunwa, kachi wamwita, neye makwaha meya a mwono.”

¹¹ Pwo ngwenyi: “Mwata, chikashi kuushi nacho, ni shima kuliajotoka. Kulihi muuwana meya a mwono?

¹² Kaka yetu, Yakoba, watuhele shima lino te akunwina iye mwene, ni ana jenyi, ni yimuna yenyi. Yena uli munene Wahiana Yakoba, nyi?”

¹³ Yesu ngwenyi: “Mweswawo manwa meya wano mevwa nawa pwila, alioze mweswawo manwa meya waze mungumwaha, kechi kevwa nawa pwila nichimwe ndoo ku miaka yeswe.

¹⁴ Mumu meya waze mungumwaha maakavelwoka muli iye ngwe mu shima lia meya a mwono wa miaka yeswe.”

¹⁵ Pwo ngwenyi: “Mwata, ngwehe kama meya wano, hanga chichi kevwa nawa pwila, chibwe chichi keza nawa kuno ni kutaha.”

¹⁶ Yesu ngwenyi: “Yako utambike lunga lie, mba uhiluke nawa kuno.”

¹⁷ Pwo ngwenyi: “Lunga Chishi nenyi.” Yesu ngwenyi: “Hiwamba kanawa ngwe: ‘Lunga Chishi nenyi.’

¹⁸ Mumu wabwile ni malunga atano, ni yoze uli nenyi haliabwila hi lunga lie ko. Chamwenemwene wamba.”

¹⁹ Pwo ngwenyi: “Mwata, ngunamono ngwami, uli mukwa munanyi wa Zambi.

²⁰ Akaka jetu, Asamaria, te kaakuwayila Zambi ha mulundu uno. Alioze yenu Ayuda nwakwamba ngwenu: ‘Ku Yerusaleme kwe kuma kwatela kuwayila Zambi.’ ”

²¹ Yesu ngwenyi: “Mama, ngufuliele ngwami, tangwa mulikeza lize kunuchi kawayila Tata ha mulundu uno hanji ku Yerusaleme.

²² Yenu Asamaria kunwanyingikine chize nwakuwayila. Yetu Ayuda tunanyingika chize twakuwayila, mumu ulamwino wa kuli Ayuda.

²³ Alioze ola muyiza ni hiyeza kulu, yize akwa kuwayila amwenemwene maawayila mu mbunge ni mu umwenemwene, mumu Tata kakuzanga akwa kumuwayila ngwe waze.

²⁴ Zambi kali Mwiku, ni waze akumuwayila chaatamba kumuwayila ni tachi ja Mwiku wa Linanga ni mu umwenemwene.”

²⁵ Pwo ngwenyi: “Ngunanyingika Chilamwina yoze Zambi alakenyene makeza, yoze anavuluka ngwo: Kristu. Muze makeza makatulumbunwina yuma yeswe.”

²⁶ Yesu ngwenyi: “Yami, ngunahanjika ne, nguli Chilamwina yoze.”

²⁷ Ha shimbu lize, tumbaji twa Yesu yaaheta, yaalishimwoka ha kumona kanahanjika ni pwo. Alioze niumwe wa kuli ayo wahamukine kuhula pwo ngwenyi: “Yika unazange?” hanji kuhula Yesu ngwenyi: “Kuchi mba unahanjika nenyi!”

²⁸ Mwe pwo yahichika mulondo wenyi wa meya, yahiluka ku limbo yambulwila atu ngwenyi:

²⁹ “Tweyenu nutale mutu yoze wangwambulwilanga yeswe yize nalingile. Yono hi Chilamwina ko yoze Zambi alakenyene, nyi?”

³⁰ No yaatuhuka mu limbo yaaya kuli Yesu.

³¹ Shimbu lize tumbaji yaaliumba kuli Yesu ngwo: “Longeshi, lienu kama.”

³² Alioze Yesu ngwenyi: “Yakulia nguli nayo yize kunwanyingikine.”

³³ Tumbaji yaalihula ngwo: “Umwe wamunehenanga yakulia, nyi?”

³⁴ Yesu yaamba ngwenyi: “Yakulia yami yino: Kwononokena upale wa yoze wangutumine ni kumanununa milimo yize anguhele kulinga.

³⁵ Nwakwamba ngwenu: ‘Kwasala tukweji awana, mba mwaka wa kubatula mihuko muuheta,’ nyi? Alioze ngunanwambe ngwami, talenu ku minda, mihuko hiyahia, mwaka hiwaheta kulu ni kuyibatula.

³⁶ Yoze wakubatula mihuko kakutambula fweto yenyi, ni kakukungika mbuto mumu ha mwono wa miaka yeswe. Chenacho yoze wakutumba ni yoze wakubatula kaakuwahilila hamuwika.

³⁷ Mumu chishima chize akuta chili chamwenemwene ngwo: ‘Umuwika kakutumba, mukwo kakubatula mihuko.’

³⁸ Hingunanutumu kubatula mu minda yize kunwalimine. Akwo haanalimi, ni yenu hinunayuku ku milimo yo.”

³⁹ Anji a kuli Asamaria a mu limbo lize yaafuliela Yesu mumu pwo yoze washindakenyene ngwenyi: “Kangwambanga yize yeswe te nakulinga.”

⁴⁰ Mba muze Asamaria ahetele kuli Yesu, yaamulembejeka hanga atwame hamwe no. Neye yatwama ko matangwa aali.

⁴¹ Anji kuhiana yaamufuliela mumu ha yize ambile iye mwene.

⁴² No yaambila pwo ngwo: “Haliabwila twafuliela, hi ha yize ko wambululanga yena, alioze mumu hitwamwivwa yetwene. Tunanyingika ngwetu, chamwenemwene kali mwe Chilamwina cha akwa hashi.”

Vesu yawuka mwana wa mukwa kuyula

⁴³ Kulutwe lia matangwa aali, Yesu yakatuka ko, yaya ku Galilea,

⁴⁴ mumu Yesu iye mwene yashindakenya ngwenyi: “Mukwa munanyi keeshi kumulemesa mu chifuchi chenyi mwene.”

⁴⁵ Muze ahetele ku Galilea, akwa chifuchi yaamutambula kanawa, mumu ni ayo ene nawa te kanayi ku Yerusaleme, ku chiwanyino cha kwiwuluka Kubalika, ni yaamona yeswe yize Yesu alingile ku chiwanyino chize.

⁴⁶ Yesu yahiluka ku limbo lia Kana mu Galilea, kuze alumwinyine meya kubwa vinyu. Yikubwa umwe mukwa kuyula mu limbo lia Kafarnaume, mwanenyi te kali ni misongo.

⁴⁷ Ha kwivwa ngwo, Yesu hakatuka ku Yudea, heza ku Galilea, mwe mukwa kuyula yaya kuli Yesu nikuliumba ngwenyi: “Tweya kama ku Kafarnaume hanga uwuke mwanami, kanambe kufwa.”

⁴⁸ Yesu yamwamba ngwenyi: “Nyi kunwamwene yilayi ni yikomokeso, kunuchi kufuliela.”

⁴⁹ Mukwa kuyula yamukumbulula ngwenyi: “Mwene, tweya ku mahiami, shimbu mwanami kanda achifwa.”

⁵⁰ Yesu ngwenyi: “Yako kwe, mwane kumahinduka.” Mutu yafuliela yuma yize amwambile Yesu, yaya kwenyi.

⁵¹ Muze te achili mu jila, tuvumbi twa ku zuwo lienyi yeeza ni kumwambulwila ngwo: “Mwane hahinduka.”

⁵² Neye yaahula ngwenyi: “Ha ola yika mwana anakabutuka kwivwa kanawa?” Ayo ngwo: “Kachiki kanakamukatuka zau ha ola yitangu ya chingoloshi.”

⁵³ Mba tato yewuluka ngwenyi, ha ola yizeyene Yesu anakamba ngwenyi: “Mwane kumahinduka.” Kashika iye ni akwa zuwo lienyi eswe yaafuliela.

⁵⁴ Chino che chilayi cha muchaali chize alingile Yesu muze hakatuka ku Yudea ni haheta ku Galilea.