Yoano 3 - Mukanda Wa Zambi 1970

Yesu ni Nikodemu

¹ Yikubwa umwe mutu jina lienyi te Nikodemu, wa ku mbunga ya Afariseu, umwe mukwa kuyula wa Ayuda.

² Mwenawo yeza kuli Yesu te ufuku, yamwamba ngwenyi: “Longeshi, tunanyingika ngwetu, Zambi hanakutumu ha kulongesa, mumu mutu niumwe mahasa kulinga yilayi yize wakulinga yena, shina Zambi abwe hamwe nenyi.”

³ Yesu ngwenyi: “Chamwenemwene ngunakwambulwila ngwami, niumwe mahasa kumona Wanangana wa Zambi, shina masemuka kwilu.”

⁴ Nikodemu yamuhula ngwenyi: “Ngwe kuchi mutu, nyi habwa kulu mukulwana, mahasa kuhiluka mu jimo lia naye akasemuke cha muchaali?”

⁵ Yesu ngwenyi: “Chamwenemwene ngunakwambulwila ngwami, niumwe mahasa kunjila mu Wanangana wa Zambi, shina masemuka ku meya ni ku Mwiku wa Linanga.

⁶ Chize chakusemuka kuli mutu, chili cha uutu; chize chakusemuka kuli mwiku, chili cha mwiku.

⁷ Kanda ulishimwoka ha chize hinakwamba ngwami, yenu eswe chanutamba kusemuka kwilu.

⁸ Fuji yakuhehukila kuze yinazange. Ni yena wakwivwa zungo liayo, alioze kuushi kunyingika kuze yineza ni kuze yinayi. Chimuwika ni yoze wakusemuka ku Mwiku wa Linanga.”

⁹ Nikodemu yamuhula ngwenyi: “Ngwe kuchi muchihasa kubwa?”

¹⁰ Yesu ngwenyi: “Yena uli longeshi munene wa Aisraele, hindu kuwanyingikine yuma yino, nyi?

¹¹ Chamwenemwene ngunakwambulwila ngwami, twakuhanjika yize twanyingika, ni twakwambujola yize twamwene, hindu yenu kunushi kutayiza shindakenyo yetu.

¹² Kunushi kungufuliela muze nakuhanjika ni yenu hakutwala ku yuma ya hashi, mba ngwe kuchi munungufuliela nyi munguhanjika ni yenu hakutwala ku yuma ya mwilu?

¹³ Niumwe hanazezuka mwilu shina Mwana Mutu yoze hanahulumuka kwilu.”

¹⁴ Ngwe chize Mose wazundwile kapela wa utale ha mutondo mu puya, chimuwika nawa chatamba kuzundula Mwana Mutu,

¹⁵ hanga mweswawo mamufuliela akabwe ni mwono wa miaka yeswe.

¹⁶ Mumu Zambi yazanga akwa hashi kuhiana. Kashika yatuma mwe Mwanenyi umuwika, hanga mweswawo mamufuliela kechi kafwa, alioze akabwe ni mwono wa miaka yeswe.

¹⁷ Mumu Zambi katumine ko Mwanenyi akahise akwa hashi, alioze akaalamwine.

¹⁸ Yoze wakufuliela mwe Mwana kechi kahia, alioze yoze keshi kufuliela hahia kulu, mumu kafulielele ko mwe Mwana umuwika wa Zambi.

¹⁹ Uno we uhiso: pangu hilineza hano hashi, alioze atu yaazanga milima kuhiana pangu, mumu akulinga yibi.

²⁰ Mweswawo wakulinga yibi kakuvutwokela pangu, keshi kwiza ku pangu, mumu kali ni woma ngwenyi, yitanga yenyi yibi muyisoloka.

²¹ Alioze yoze wakulinga umwenemwene kakwiza ku pangu hanga yitanga yenyi yikasoloke ngwo, hanayilingi ha kwononokena Zambi.

Yesu ni Yoano Chipapachisa

²² Kulutwe lia yuma yino, Yesu yaya hamwe ni tumbaji twenyi ku chifuchi cha Yudea, yatwama ko shimbu limwe hamwe no, yapapachisa atu.

²³ Yoano neye yapapachisa atu ku Enone hakamwihi ni Salimi, mumu kuze kwabwile meya anji. Atu te kaakwiza kuli iye, mba yaapapachisa.

²⁴ (Ha matangwa waze te kanda achisa Yoano mu zuwo lia lamba.)

²⁵ Mba tumbaji akwo a Yoano yaabutuka kuhamika ni Kayuda umuwika hakutwala ku ndako ya kusana cha kuwayila cho.

²⁶ No yaaya kuli Yoano ni kumwamba ngwo: “Longeshi, unewuluka mutu yoze wabwile hamwe ni yena musali lia Yordau, te wakutulweza sango jenyi. Haliabwila kakupapachisa atu, ni eswe kaakuya kuli iye.”

²⁷ Yoano yakumbulula ngwenyi: “Mutu niumwe mahasa kubwa ni chimwe Chuma, nyi kamuhele cho kwilu.

²⁸ Yenwene nuli yela ja maliji waze nambile ngwami: ‘Yami hi nguli ko Chilamwina yoze Zambi alakenyene alioze Zambi hanangutumu kulutwe lienyi.’

²⁹ Nandungi kali wa sandungi, alioze chijinjikili cha sandungi kakumana hakamwihi ni sandungi ni kumwivwa. Kakuwahilila ha kwivwa liji lienyi. Chenacho nawa uwahililo wami haliabwila hiwamanunuka.

³⁰ Chatamba kumulemesa, alioze yami chatamba kungukehesa.”

Yoze uneza kwilu

³¹ Yoze unakatuka kwilu kali helu lia eswe. Yoze unakatuka hashi kali mukwa hashi, ni kakuhanjika yuma ya hashi. Yoze unakatuka kwilu kanahiana eswe,

³² kakushindakenya yize amwene ni yize evwile, alioze niumwe wakutayiza shindakenyo yenyi.

³³ Yoze wakutayiza sango jenyi kanase chinyingi ngwenyi, Zambi kali umwenemwene.

³⁴ Yoze atumine Zambi kakuhanjika maliji a Zambi, mumu Zambi keshi kuhana Mwiku wenyi ni njongo.

³⁵ Mwe Tata kakuzanga Mwanenyi, ni hanakunjika chiyulo cheswe mu kwoko lenyi.

³⁶ Yoze wakufuliela mwe Mwana, mwono wa miaka yeswe ali nawo. Yoze keshi kwononokena Mwana, kechi kamona mwono, alioze Zambi kakumuvwila ufwatulo.