Yoano 20 - Mukanda Wa Zambi 1970

Fuka liawashi

¹ Mu lumingu, chichamene cheswe, shimbu te kuchili milima, Maria Kamandala yeza ku fuka, yawana liwe haalilangumuna ko,

² yazomboka fuji kuli Simone Petulu ni kuli kambaji mukwo yoze te akuzanga Yesu, yaamba ngwenyi: “Hachiza Mwene ku fuka, kutwanyingikine kuze amusanga.”

³ Petulu ni kambaji yoze yaakatuka, yaaya ku fuka.

⁴ Eswe aali yaazomboka hamuwika, alioze kambaji yoze mukwo yazomboka kuhiana, yahanga kuheta ku fuka,

⁵ yahetama nikutala, yamona mahina atoma akunangika hashi, alioze kanjilile mo.

⁶ Simone Petulu yaheta kasula, yanjila mu fuka, yamona mahina atoma akunangika hashi,

⁷ ni hina lize ajingile ku mutwe wa Yesu. Kuliabwile ko hamuwika ni mahina akwo, alioze te liakuvunga ha ukawalio.

⁸ Hohene, kambaji yoze waliangile kuheta ku fuka, neye yanjila, yamona yuma yize yeswe, mba yafuliela.

⁹ (Te tumbaji kanda achinyingika yuma yize yasonewene mu Mukanda wa Zambi ngwo, Yesu chamutamba kuhinduka ku kufwa.)

¹⁰ Hazehene tumbaji waze aali yaahiluka ku mahio.

Yesu yasolokela Maria Kamandala

¹¹ Maria te kanamana haze, nikulila hehi ni fuka. Muze te analili, yahetama, yatala mu fuka,

¹² yamona tunganda a mwilu aali, te kaanazala mahina atoma, nikutwama kuze asele Yesu, umuwika ku mutwe, mukwo ku molu.

¹³ Tunganda twa mwilu yaamuhula ngwo: “Mama, yika unalilila?” Neye ngwenyi: “Hachiza Mwene wami, Chanyingikine kuze amutwala.”

¹⁴ Muze hamba maliji wano, yatewuluka, yamona Yesu te kanamana, alioze kanyingikine ngwenyi, awu Yesu.

¹⁵ Yesu yamuhula ngwenyi: “Mama, yika unalilila? Iya unafupu?” Maria yanyonga ngwenyi, yono mwe njimi. Ha chino, yamwamba ngwenyi: “Mwata, nyi yena wamutwalanga kweka, ngulweze kuze wamusanga. Mba munguya ni kumwanda.”

¹⁶ Yesu ngwenyi: “Maria!” Maria yatewulukila kuli Yesu, yamwamba mu liji lia hebreu ngwenyi: “Raboni!” (Kulumbunuka ngwo: “Longeshi.”)

¹⁷ Yesu yamwamba ngwenyi: “Kanda ungukwata, mumu kanda nguchizezuka kuli Tata. Alioze yako wambulwile akwetu ngwe: ‘Ngunazezuka kuli Tata kanda Tatenu, kuli Zambi yami kanda Zambi yenu.’ ”

¹⁸ Mba Maria Kamandala yaya ni kwambulwila tumbaji twenyi ngwenyi: “Hinamona Mwene.” Yaambulwila yuma yeswe yize amwambile Yesu.

Yesu yasolokela tumbaji twenyi

¹⁹ Chingoloshi cha lumingo yoze, tumbaji te kaanalikungulula mu limwe zuwo. Yajilo yeswe te yakukasa ni sapi, mumu yeevwila Ayuda woma. Yesu yeza, yamana mukachi ko, yamba ngwenyi: “Uhwimino kuli yenu!”

²⁰ Muze te hamba maliji wano, yaalweza moko jenyi ni lumbu lienyi: Tumbaji yaawahilila ha kumona Mwene.

²¹ Yesu yaamba nawa ngwenyi: “Uhwimino kuli yenu! Ngwe chize Tata wangutumine ni yami nawa ngunanutumu.”

²² Muze te hamba maliji wano, yaahwimina mwiku ngwenyi: “Tambulenu Mwiku wa Linanga.

²³ Atu waze munukakonekena milonga yo, Zambi neye haakonekena yo kulu. Waze kunuchi kakonekena, Zambi neye kechi kwakonekena.”

Yesu ni Tomase

²⁴ Kambaji umuwika hakachi ka kumi ni aali, Tomase (yoze te akuvuluka ngwo, Pasa), kabwile ko hamwe no muze Yesu ejile.

²⁵ Tumbaji akwo yaamwambulwila ngwo: “Hitwamona Mwene.” Alioze Tomase yaakumbulula ngwenyi: “Nyi Chamwene chimbandwa mu moko jenyi, nyi chasele munwe wami mu chimbandwa cha mbambo, hanji nyi chasele kwoko liami mu lumbu lienyi, chichi kufuliela.”

²⁶ Lumingu umuwika kulutwe, tumbaji twa Yesu yaalikungulula nawa mu zuwo. Tomase yabwa hamwe no. Yajilo te yakukasa ni sapi. Alioze Yesu yeza, yamana mukachi ko, yamba ngwenyi: “Uhwimino kuli yenu!”

²⁷ Mba yambila Tomase ngwenyi: “Njisa munwe we hano. Tala moko jami. Sako kwoko lie mu lumbu liami. Kanda uyambashana, alioze fuliela lume!”

²⁸ Tomase ngwenyi: “Mwene wami, Zambi yami!”

²⁹ Yesu ngwenyi: “Mumu hiwangumona kashika hiwafuliela, nyi? Kawaha waze anafuliela chibwe kangumwene!”

Chikuma cha mukanda uno wa Yoano

³⁰ Yesu yalinga yilayi yinji yikwo ku meso ja tumbaji twenyi, hindu kuyasonewene mu mukanda uno.

³¹ Alioze yino yasonewene hanga nufuliele ngwenu, Yesu mwe Chilamwina yoze Zambi alakenyene, mwe Mwana Zambi, ni hanga, ku ufulielo uno, munuhasa kubwa ni mwono mumu ha jina lienyi.