Yoano 2 - Mukanda Wa Zambi 1970

Umbachiso mu Kana

¹ Muze matangwa aali haabalika yikubwa umbachiso mu limbo lia Kana mu chifuchi cha Galilea. Naye ya Yesu te kwe ali.

² Mukwa ulungi yalakenya nawa Yesu ni tumbaji twenyi ku umbachiso uze.

³ Muze vinyu hiyahwa, naye yamwamba ngwenyi: “Vinyu keeshi nayo.”

⁴ Alioze Yesu ngwenyi: “Mama, kuwahashile kungulweza. Ola yami kanda yiheta.”

⁵ Naye ya Yesu yambila tuvumbi ngwenyi: “Cheswacho manwamba, Chilingenu.”

⁶ Yikubwa milondo yisambano ya mawe. Yenayo te Ayuda akulikwasa nayo ha kusana meya, nikulita ni ndako jo ja kulibemesa ha kuwayila Zambi. Mulondo ni mulondo te mwakunjila makumi nake ndoo kulakaji ni makumi aali a litro.

⁷ Yesu yaamba ngwenyi: “Zalisenu milondo ayi ni meya.” No yaayizalisa.

⁸ Mba Yesu ngwenyi: “Haliabwila switenu, mutwalilenu mukwa lutwe wa umbachiso.” No yaamutwalilo.

⁹ Mukwa lutwe wa umbachiso yapaka meya waze haalumuka vinyu. Kanyingikine ko kuze yakatukile. (Alioze tuvumbi waze aswichile meya yaanyingika kanawa.) Mwe mukwa lutwe wa umbachiso yatambika sandungi.

¹⁰ Mba yamwamba ngwenyi: “Atu eswe kaakuhana vinyu yibema hatangu. Muze atu haanwa chinji, mba maahana yize hi yibema ko. Alioze yena hiwafunga vinyu yibema ndoo haliabwila!”

¹¹ Chino che chilayi chitangu chize alingile Yesu. Yachilinga mu Kana mu chifuchi cha Galilea ni kulweza uhenya wenyi. Mba tumbaji twenyi yaamufuliela.

¹² Mwabwamuze Yesu yaya ku limbo lia Kafamaume hamwe ni naye, ni anakwo, ni tumbaji twenyi; yatwama ko amwe matangwa.

Yesu yabemesa zuwo lia Zambi

¹³ Yesu yaya ku Yerusaleme mumu chiwanyino cha Ayuda cha kwiwuluka Kubalika te hichabwa hakamwihi.

¹⁴ Mu zuwo lia Zambi lia Ayuda yawana mo atu waze abwile ni kulanjisa ngombe, ni mapanga, ni membe. Yawana mo nawa akwa kusumbakenya mbongo, kaanatwama ku mesa jo.

¹⁵ Mba yahosa fimbo (shikote) ya ngoji, yatuhwisa tushitu eswe, mapanga ni ngombe, yalimbula mesa ja akwa kusumbakenya mbongo, yamwanga mbongo jo hashi,

¹⁶ yambila waze te analanjisa membe ngwenyi: “Twalenu yuma yino haze. Kanda nupwisa zuwo lia Tata ngwe chitanda!”

¹⁷ Tumbaji twenyi yeewuluka chize chasonewene mu Mukanda wa Zambi ngwo: “Aa Zambi, nakwivwa kahia chaa mu mbunge mumu ha zuwo lie.”

¹⁸ Ayuda yaamuhula ngwo: “Chilayi chika muuhasa kulinga ha kutulweza ngwe uli ni chiyulo cha kulinga yuma yino?”

¹⁹ Yesu yaakumbulula ngwenyi: “Ononenu zuwo lino lia Zambi, mba ha matangwa atatu mungukalimika nawa.”

²⁰ Ayuda yaamwamba ngwo: “Miaka makumi awana ni yisambano atungile zuwo lino, alioze yena muukalimika ha matangwa atatu, nyi?”

²¹ Alioze zuwo lize ambile Yesu te mujimba wenyi.

²² Muze Yesu hahinduka ku kufwa, tumbaji twenyi yeewuluka chize ambile, mba yaafuliela Mukanda wa Zambi ni maliji waze ahanjekele Yesu.

Yesu kananyingika mbunge ja atu eswe

²³ Shimbu lize te Yesu ali mu Yerusaleme ku chiwanyino cha Kubalika, anji amufulielele mumu ha yilayi yize alingilelingile.

²⁴ Alioze Yesu kalihanyine ko kuli ayo, mumu yanyingika atu eswe kanawa.

²⁵ Te kafupile niumwe kumulweza ndako ja atu, mumu yanyingika kanawa yize yili mu mbunge ja atu.