Yoano 19 - Mukanda Wa Zambi 1970

¹ Mba Pilatu yambila tujita hanga anehe Yesu. No yaamulamba fimbo (shikote),

² yaayinda chipangula cha mbimbo, yaachisa ku mutwe wa Yesu, yaamujika hina lichila,

³ yaamukundama nikumwamba ngwo: “Vulie, mwanangana wa Ayuda!” Yaamulamba mbangala.

⁴ Pilatu yatuhuka nawa, yambila mbunga ngwenyi: “Talenu, ngunanunehena yo haze, hanga nunyingike ngwenu, Chamwene chitela nichimwe cha kuhishila mutu yono!”

⁵ Mba Yesu yatuhuka, te kanazala chipangula cha mbimbo ni hina lichila. Pilatu yamba ngwenyi: “Talenu mutu yono!”

⁶ Alioze ha kumumona, mahako a lutwe a Zambi ni tufunga yaakololoka ngwo: “Muhate ha kulusu! Muhate ha kulusu!” Pilatu ngwenyi: “Yeenu nenyi yenwene, numumbate ha kulusu, mumu Chamwene chitela chize nunamusumina.”

⁷ Ayuda ngwo: “Shimbi tuli nayo. Ye Shimbi yinambe ngwo, chamutamba kufwa, mumu hanalipwisa Mwana Zambi.”

⁸ Pilatu, muze hevwa maliji wano, yevwa woma unji Wahiana,

⁹ yahiluka mu zuwo, mba yahula Yesu ngwenyi: “Kulihi unakatuka?” Alioze Yesu kamukumbulwile liji nilimwe.

¹⁰ Pilatu ngwenyi: “Kuusolo kungukumbulula, nyi? Kuwanyingikine ngwe, chiyulo nguli nacho cha kukutusula ni cha kukuhachila ha kulusu, nyi?”

¹¹ Yesu ngwenyi: “Kuuchi kubwa ni chiyulo nichimwe hali yami, nyi kakuhele cho mwilu. Kashika mutu yoze unakangukunjika kuli yena halinga yibi yahiana.”

¹² Ha maliji wano, Pilatu yafupa jila ya kumutusula. Alioze Ayuda yaakololoka ngwo: “Nyi watusula mutu yono, hi uli sepa lia mwanangana wa Aroma ko. Yoze wakulipwisa mwanangana kali mukwa kole wa mwanangana wa Aroma.”

¹³ Muze hevwa maliji wano, Pilatu yatuhwisa Yesu haze, mba yatwama ha chitwamo cha ubatwilo, jina liacho: “Yize ya Mawe.” (Mu hebreu linalumbunuka ngwo: “Gabata.”)

¹⁴ Te hasala tangwa limuwika ndoo ku chiwanyino cha Kubalika ha ola ya hamuchima. Pilatu yambila Ayuda ngwenyi: “Talenu mwanangana wenu!”

¹⁵ Alioze yaakololoka ngwo: “Mushihe, mushihe, muhate ha kulusu!” Pilatu yaahula ngwenyi: “Chinalite nguhate mwanangana wenu ha kulusu, nyi?” Mahako a lutwe a Zambi yaakumbulula ngwo: “Kutushi mwanangana mukwo shina mwanangana wa Aroma!”

¹⁶ Hohene Pilatu yaakunjika Yesu hanga amuhate ha kulusu. Kashika tujita yaanda Yesu, yaaya nenyi.

Tujita yaahata Yesu ha kulusu

¹⁷ Yesu yatuhuka mu limbo ni kumbata kulusu lienyi, yaya kuma kuze akuvuluka ngwo: “Homa lia Balanga lia Mutwe.” (Mu hebreu ngwo: “Golgota.”)

¹⁸ Kwenako ahachilile Yesu ha kulusu. Yaahata nawa atu akwo aali ha makulusu, umuwika ku chindume, mukwo ku chimeso, Yesu mukachi ko.

¹⁹ Pilatu yasonekesa Chisoneko ni kuchisa ha kulusu: “Yesu Kanazare, mwe Mwanangana wa Ayuda.”

²⁰ Ayuda anji atangile Chisoneko chize, mumu homa haze ahachilile Yesu ha kulusu habwile hakamwihi ni limbo. Chisoneko chize chasonewene mu limi lia hebreu, ni lia roma, ni lia greke.

²¹ Mahako a lutwe a Zambi yaambila Pilatu ngwo: “Kanda usoneka ngwe: ‘Mwe Mwanangana wa Ayuda,’ alioze Soneka ngwe: ‘Mutu yono wambile ngwenyi, nguli Mwanangana wa Ayuda.’ ”

²² Pilatu ngwenyi: “Chize hinasoneka, hichasonewa.”

²³ Muze tujita haahata Yesu ha kulusu, yaanda mahina jenyi, yaateta mu yihanda yiwana, kajita ni kajita yatambula Chihanda chimuwika. Yaanda nawa chikuto chenyi, chize te kuchishi kunuka, chakutunga cheswe Chihanda chimuwika chize kwilu ndoo hashi.

²⁴ Tujita yaalihanjekesa ngwo: “Kanda tubula chikuto chino, alioze tutenu chela tumone chaya muchibwa.” Chenacho Chisoneko cha mu Mukanda wa Zambi chamanunukine, ngwo: “Yaalitetela mahina jami hakachi ko. Yaata chela ha chikuto chami.” Chenacho alingile tujita.

²⁵ Hakamwihi ni kulusu lia Yesu yikubwa naye, ni mwanakwo ya naye, ni Maria, pwo lia Klopase, ni Maria Kamandala.

²⁶ Yesu yamona naye ni kambaji yoze te azanga kali hehi nenyi. Yambila naye ngwenyi: “Mama, tala mwane.”

²⁷ Mba yambila kambaji yoze ngwenyi: “Tala noko.” Chize lume ku tangwa lize, kambaji yoze yatambula naye nikutwama nenyi.

Kufwa cha Yesu

²⁸ Mwabwamuze Yesu yanyingika ngwenyi, yuma yeswe hiyahwa. Ha kumanununa Chisoneko cha mu Mukanda wa Zambi, yamba ngwenyi: “Pwila ngunevu.”

²⁹ Yikubwa chikashi chinazala ni vinagre. Tujita yaanjisa chisapo mu vinagre, yaasa chisapo ku songo lia lumbungu, yaamusa ku kanwa lia Yesu.

³⁰ Muze hatambula vinagre, Yesu yamba ngwenyi: “Yeswe hiyamanunuka!” Mba yahetamisa mutwe, yasutula mwono wenyi.

Tujita yaatuwa mupachi lia Yesu

³¹ Ayuda kaazangile ko mijimba ya atu yisale ha makulusu ha tangwa lia kuhwima. Tangwa lize lia kulutwe te tangwa linene lia kuhwima. Kashika yaamwita Pilatu hanga akamakune molu ja atu waze te ali ha makulusu, akaachize ho.

³² Mba tujita yeeza ni kumakuna molu ja mutu mutangu ni wa muchaali waze ahachilile ha makulusu hamwe ni Yesu.

³³ Alioze ha kuheta kuli Yesu, yamuwana te hafwa kulu. Kashika kaamumakwine ko molu.

³⁴ Alioze umwe wa kuli tujita yamutuwa mupachi ni kunga lienyi. Hazehene yimutuhuka manyinga ni meya.

³⁵ Mutu yoze wamwene yuma yino yayishindakenya, ni shindakenyo yenyi yili yamwenemwene. Iye mwene kananyingika ngwenyi, kanahanjika yamwenemwene, hanga ni yenu nufuliele.

³⁶ Yino yabwile hanga Chisoneko cha mu Mukanda wa Zambi chikamanunuke ngwo: “Keechi kamakuna chifwaha chenyi nichimwe.”

³⁷ Chisoneko chikwo chinambe ngwo: “Maakatala yoze atuwile kunga.”

Kufunda cha Yesu

³⁸ Yikubwa umwe mutu wa ku limbo lia Arimatea, jina lienyi te Josefe. (Mwenawo kambaji ka Yesu, alioze ku tenga mumu te kakuvwila Ayuda woma.) Yaya ni kwita mujimba wa Yesu kuli Pilatu hanga auchize ha kulusu. Pilatu yamutayiza. Mba Josefe yaya ni kuuchiza.

³⁹ Nikodemu, yoze wejile kuli Yesu ha ufuku, yaya nenyi. Te kanambata maji a vumba libema akuchinga ni mira ni aloa. Kulema cha maji, kilo ngwe makumi atatu.

⁴⁰ Eswe aali yaanda mujimba wa Yesu, yaauvunga mu mahina atoma hamuwika ni maji a vumba libema, nikulita ni ndako ya Ayuda muze akufunda atu.

⁴¹ Kuma kuze ahachile Yesu ha kulusu yikubwa munda. Mwe mu munda yimubwa fuka liaha muze te kanda achifunda mo kama mutu niumwe.

⁴² No yaafunda Yesu mu fuka lize, mumu tangwa lize lia kulutwe te tangwa lia kuhwima lia Ayuda, ni mumu te fuka lili hakamwihi.