Yoano 18 - Mukanda Wa Zambi 1970

Yudase yakunjika Yesu

¹ Muze halemba chino, Yesu yakatuka ni tumbaji twenyi, yaya musali lia chitwetwe cha Kidrone, kuze te kuli munda. Yesu yanjila mo ni tumbaji twenyi.

² Yudase, yoze wakunjikile Yesu kuli akwa kole jenyi, yanyingika kuma kuze, mumu Yesu ni tumbaji twenyi ayileyile ko yisuho yinji.

³ Yudase yaya ku munda uze hamwe ni mbunga ya tujita ni tufunga twa zuwo lia Zambi. Mahako a lutwe a Zambi ni Afariseu aatumine. Yaaheta ku munda, te ndeya anambata, ni kahia ku masoka mukalekwoka, ni yuma yakwasa nayo jita.

⁴ Yesu yanyingika yuma yeswe yize muyiza hali iye. Kashika yaakundama, yaahula ngwenyi: “Iya nunafupu?”

⁵ No ngwo: “Yesu Kanazare.” Yesu ngwenyi: “Yami uno.” Yudase, yoze wamukunjikile, te kwe ali hamwe no.

⁶ Muze Yesu akumbulwile ngwenyi: “Yami uno,” hazehene yaahiluka unyimenyime, yaalimbuka hashi.

⁷ Yesu yaahula nawa ngwenyi: “Iya nunafupu?” Ayo ngwo: “Yesu Kanazare.”

⁸ Yesu ngwenyi: “Hinanulweza kulu ngwami, yami uno. Nyi yami nunafupu, echenu wano aye kwo.”

⁹ Yamba chino, hanga liji lize ahanjikile iye mwene likamanunuke ngwenyi: “A kuli waze wanguhele chatokesele niumwe.”

¹⁰ Simone Petulu mukwale abwile nawo, yautomona, yabatula litwi lia chindume lia kavumbi ka mwata wa mahako (Jina lia ndungo yoze te Malko.)

¹¹ Alioze Yesu yambila Petulu ngwenyi: “Kala! Tomeka mukwale we mu chindalo. Unanyongo ngwe, chichi kanwa musenge wa lamba uze Tata anguhele, nyi?”

Yaatwala Yesu maha Anase

¹² Ye mbunga ya tujita hamwe ni mukulwana wo ni tufunga twa Ayuda yaakwata Yesu yaamukasa.

¹³ Hatangu yaamutwala maha Anase, Anase te Ukwe wa Kaifa mwata wa mahako ha mwaka uze.

¹⁴ Kaifa wahele Ayuda longeso ngwenyi: “Chinalite mutu umuwika kufwila atu anji.”

Petulu yalikala Yesu

¹⁵ Simone Petulu ni umwe kambaji mukwo yaakaula Yesu. Mwata wa mahako te kananyingika kambaji yoze. Kashika yanjila mu zuwo lia mwata yoze hamwe ni Yesu.

¹⁶ Alioze Petulu yasala haze ku chikolo. Kambaji yoze mukwo yatuhuka, yahanjika ni pwo yoze te wakufunga chikolo, mba yanjisa Petulu.

¹⁷ Mwana pwo, mukwa kufunga chikolo, yahula Petulu ngwenyi: “Ni yena uli kambaji ka mutu yoze, nyi?” Petulu ngwenyi: “Ahaa! Ka kwami.”

¹⁸ Chishika chabwile ko. Kashika ndungo ni tufunga yaawika kahia ka makala, te kaanamana nikwota kahia. Petulu neye kanoto kahia hamwe no.

Mwata wa mahako yasopesa Yesu

¹⁹ Mwata wa mahako yahula Yesu hakutwala kuli tumbaji twenyi ni ha longeso lienyi.

²⁰ Yesu yamukumbulula ngwenyi: “Nahanjikile mwazu mukachi ka atu eswe. Nalongesele tangwa ha tangwa mu mazuwo a kuwayila ni mu zuwo lia Zambi lia Ayuda, kuze te kwakukungulukila Ayuda. Chahanjikile nichimwe ku tenga.

²¹ Kuchi mba unanguhula yami? Hula waze anakevwa yize ngunakaalongesa. Ayo kaananyingika kanawa yuma yize ngunakaalongesa.”

²² Muze Yesu hamba maliji wano, kafunga umuwika yoze te uliko yamulamba mbangala, ngwenyi: “Haa! Chenacho unakumbulula mwata wa mahako, nyi?”

²³ Yesu ngwenyi: “Nyi nahanjika chibi tulweze chibi chize. Alioze nyi nahanjika kanawa, kuchi hiwangulamba?”

²⁴ Mba Anase yamutuma chizechene wakukasa maha Kaifa, mwata wa mahako.

Petulu yalikala nawa Yesu

²⁵ Simone Petulu kwe abwile nikwota kahia. Waze te anasulangana nenyi yaamuhula ngwo: “Ni yena uli umwe wa kuli tumbaji twa mutu yoze, nyi?” Alioze yalikala ngwenyi: “Ahaa! Ka kwami.”

²⁶ Umwe hakachi ka tuvumbi twa mwata wa mahako te uliko, usoko wa mutu yoze Petulu abatwile litwi. Yahula Petulu ngwenyi: “Nakumonanga nenyi mu munda, cheka?”

²⁷ Alioze Petulu yalikala nawa. Hazehene ndemba yatambika.

Yesu ku meso ja Pilatu

²⁸ Chichamene cheswe Ayuda yaamuchiza maha Kaifa, yaamutwala ku zuwo lia mukwa kuyula. Ayuda kaanjilile ko mu zuwo lia mukwa kuyula, kuchina maajilula chijila hakutwala ku kulia cha kwiwuluka Kubalika.

²⁹ Kashika mukwa kuyula, Pilatu, yatuhuka, yaahula ngwenyi: “Chikuma chika nunasumina mutu yono?”

³⁰ Yaakumbulula ngwo: “Nyi te kalingile yibi, kachi kutwakukunjikile ye.”

³¹ Pilatu ngwenyi: “Yeenu nenyi yenwene, mubatwilenu nikulita ni Shimbi jenu.” Ayuda ngwo: “Yetu kutushi chiyulo cha kushiha mutu.”

³² (Chenacho chikamanunune liji lize ahanjikile Yesu ha kulweza kufwa chize makafwa.)

³³ Pilatu yahiluka mu zuwo, yatambika Yesu, yamuhula ngwenyi: “Mwe mwanangana wa Ayuda yena, nyi?”

³⁴ Yesu ngwenyi: “Liji lino yena mwene unaliambe, nyi? hanji akwo akwambulwilanga lio hakutwala kuli yami?”

³⁵ Pilatu ngwenyi: “Yami nguli Kayuda, nyi? Vungu lie ni mahako a lutwe a Zambi, enoo akukunjika kuli yami. Kuchi unakalinga?”

³⁶ Yesu ngwenyi: “Wanangana wami hi wa hano hashi ko. Nyi Wanangana wami muubwa wa hano hashi, kachi tuvumbi twami maalitachika hanga keechi kungukunjika kuli Ayuda. Alioze Wanangana wami hi wa hano hashi ko.”

³⁷ Pilatu kashika yahula ngwenyi: “Kuma, yena uli mwanangana, nyi?” Yesu ngwenyi: “Kuwamba, nguli mwanangana. Ha chikuma chino nasemukinyine ni nejilile hano hashi, hanga ngukashindakenye ha umwenemwene. Yoze wa ku umwenemwene, kakwivwa yize nakwamba.”

³⁸ Pilatu yamuhula ngwenyi: “Umwenemwene Chuma chika?” Muze hamba maliji wano, Pilatu yatuhuka nawa haze kuli Ayuda, yaamba ngwenyi: “Chamwene chitela nichimwe cha kuhishila mutu yono.

Pilatu yakunjika Yesu ku kufwa

³⁹ Alioze nikulita ni ndako yenu, nakunutuswila, ha chiwanyino cha Kubalika, mukwa zuwo lia lamba umuwika. Nunazange ngunutuswile mwanangana wa Ayuda, nyi?”

⁴⁰ No eswe yaakololoka ngwo: “Ka, hi iye ko. Tunazange Baraba.” (Baraba te muhuza.)