Yoano 16 - Mukanda Wa Zambi 1970

¹ “Hinanwambulwila chino hanga kunuchi katalinga mu ufulielo wenu.

² Atu maakanukatwisa mu mazuwo jo a kuwayila. Tangwa mulikeza muze yoze makanushiha, makanyonga ngwenyi, kanalingila Zambi.

³ Yuma yino maakayilinga mumu kaanyingikine Tata chibwe yami.

⁴ Alioze hingunanwambulwila yuma yino hanga, muze mwaka wakuyilinga muukeza, munukewuluka ngwenu, hingunanwambulwila cho kulu.” “Yuma yino chanwambulwile yo ha kabutu, mumu yami nabwile hamwe ni yenu.

Milimo ya Mwiku wa Linanga

⁵ Haliabwila ngunayi kuli Tata yoze wangutumine. Mutu niumwe hakachi kenu unanguhula ngwenyi: ‘Kuli unayi?’

⁶ Alioze nunevu chinyengo kuhiana mumu hinanwambulwila yuma yino.

⁷ Alioze ngunanwambulwila umwenemwene ngwami, chinalite hali yenu, yami nguye. Mumu, nyi Chayile, Chikwashi kechi keza kuli yenu. Alioze, nyi naya, mungukanutumina ye.

⁸ Muze makeza, makakumika akwa hashi ha shili, ni ha ululi, ni ha ubatwilo wa Zambi.

⁹ Akwa hashi kaakupiasuka ha chikuma cha shili, mumu keeshi kungufuliela.

¹⁰ Kaakupiasuka ha chikuma cha ululi, mumu ngunayi maha Tata ni kunuchi kungumona nawa.

¹¹ Kaakupiasuka ha chikuma cha ubatwilo, mumu Zambi hanahisa kulu Mwata wa hashi hano.

¹² “Yuma yikwo yinji nguli nayo yakunwambulwila, alioze kunwahashile kuyivwa haliabwila.

¹³ Muze Mwiku wamwenemwene muukeza, muukanusongwela umwenemwene weswe. Kuuchi kahanjika mu chiyulo cha uyowene, alioze muukahanjika yize yeswe muukevwa, muukanunyingikisa yuma yize muyikeza ho.

¹⁴ We Mwiku wa Linanga muukangulemesa, mumu muukatambula ya yami ni kunwambulwila yo.

¹⁵ Yize yeswe Tata ali nayo, yili ya yami. Kashika nanwambanga ngwami, Mwiku wamwenemwene muukatambula yize ya yami ni kunwambulwila yo.”

Chinyengo muchikalumuka uwahililo

¹⁶ “Kwasala hakepe kunuchi kungumona mba ha shimbu likepe munukangumona nawa.”

¹⁷ Amwe a kuli tumbaji twenyi yaalihula ngwo: “Kanambe ngwenyi: ‘Kwasala hakepe kunuchi kungumona, mba ha shimbu likepe munukangumona nawa.’ Kanambe nawa ngwenyi: ‘Mumu ngunayi kuli Tata.’

¹⁸ Kulumbunuka kuchi? Chize anambe ngwenyi: ‘ha shimbu likepe,’ kulumbunuka kuchi?”

¹⁹ Yesu yanyingika ngwenyi, tumbaji kaanazange kumuhula. Kashika yamba ngwenyi: “Nanwambanga ngwami: ‘Kwasala hakepe kunuchi kungumona, mba ha shimbu likepe munukangumona nawa.’ Nunalihula ha chikuma chino mukachi kenu, nyi?

²⁰ Chamwenemwene ngunanwambulwila ngwami, mu nukalinyenga, alioze akwa hashi maakawahilila. Munukanenganyana, alioze chinyengo chenu muchikalumuka uwahililo.

²¹ Muze pwo himasema mwana, mabwa ni chinyengo mumu ola yenyi ya lamba hiyaheta. Alioze muze mwana hasemuka, mavulama lamba lienyi, mawahilila mumu mwana hasemuka.

²² Chimuwika ni yenu. Haliabwila nunevu chinyengo, alioze munukangumona nawa, mba munukawahilila, uwahililo uze mutu niumwe mahasa kuuchiza.

²³ “Muze tangwa lize hiliaheta, kunuchi kanguhula nawa Chuma nichimwe. Chamwenemwene ngunanwambulwila ngwami, Tata makanwaha yuma yeswe yize munuketa mu jina liami.

²⁴ Ndoo haliabwila kanda nuchita Chuma nichimwe mu jina liami. Etenu, mba munukatambula; hanga nukabwe ni uwahililo kuhiana.”

Yesu hanakumbu yibi ya hano hashi

²⁵ “Hingunanwambulwila yuma yeswe ni yishima. Tangwa mulikeza muze chichi kahanjika ni yishima, alioze mungukanwambulwila pundu yuma yeswe yakutwala kuli Tata.

²⁶ Muze tangwa lize hiliaheta, munuketa kuli Tata yuma yeswe mu jina liami, hindu Chambile ngwami, yami mungukanwichila yo,

²⁷ mumu Tata iye mwene kakunuzanga. Kakunuzanga mumu nwakuzanga yami, ni mumu nwakululiela ngwenu, nakatukile kuli Zambi.

²⁸ Nakatukile kuli Tata, hinguneza hano hashi. Haliabwila, ngunakatuka hashi hano ha kuya kuli Tata.”

²⁹ Mba tumbaji twenyi yaamwamba ngwo: “Tala, haliabwila unahanjika mwazu, hi ni yishima ko.

³⁰ Haliabwila tunanyingika ngwetu, Unanyingika yuma yeswe. Mutu kechi kukuhula nawa. Ha chino tunafuliela ngwetu, kuli Zambi wejile.”

³¹ Yesu ngwenyi: “Nunafuliela haliabwila, nyi?

³² Ola muyiheta, hiyaheta kulu, yize munukamwangana umuwika umuwika, mutu mweswe ku zuwo lienyi. Munukanguhichika ukawami, hindu Chishi ukawami, mumu Tata kali hamwe ni yami.

³³ Hinanulweza yuma yino yeswe hanga nukabwe ni uhwimino ha kulinunga ni yami. Munukabwa ni lamba linji hano hashi, alioze hamukenu, hingunakumbu hashi.”