Yoano 15 - Mukanda Wa Zambi 1970

Yesu che chibuta chamwenemwene cha vinyu

¹ “Yami che chibuta chamwenemwene cha vinyu, Tata mwe njimi wa vinyu.

² Kakubatula mutango weswe muli yami uze kuushi kwima mihuko. Kakuselela mutango weswe uze wakwima mihuko. Kakuubemesa hanga ukeme mihuko yahiana.

³ Longeso lize nanulongesele, hilinanubemesa kulu.

⁴ Nyongononenu kulinunga ni yami, ngwe chize nakunyongonona kulinunga ni yenu. Mutango kuwahashile kwima mihuko ukawawo, shina muulinunga ni chibuta cha vinyu. Chimuwika nawa, yenu kunwahashile kwima mihuko nyi kunushi kunyongonona kulinunga ni yami.

⁵ “Che chibuta cha vinyu yami, yenu nuli mitango. Yoze manyongonona kulinunga ni yami, ni yami ni iye, mwenawo mema mihuko yinji, mumu kunwahashile kulinga nichimwe shina ni yami.

⁶ Yoze keshi kunyongonona kulinunga ni yami maakamumbila haze ngwe mutango, mba muuma. Mitango yize hiyinomu, kakuyitongona ni kuyimbila mu kahia, mba muyiwema.

⁷ Nyi mununyongonona kulinunga ni yami, ni maliji jami mabwa muli yenu, munwita cheswe Chuma nunazange, munukachitambula.

⁸ Uhenya wa Tata muusoloka nyi munwima mihuko yinji. Chenacho munukabwa tumbaji twami.

⁹ Nakunuzanga ngwe chize Tata akunguzanga yami. Nyongononenu mu zango liami.

¹⁰ Nyi munufunga Shimbi jami, mununyongonona mu zango liami, ngwe chize nakufunga Shimbi ja Tata ni nakunyongonona mu zango lienyi.

¹¹ “Yuma yino hinamba, hanga nubwe ni uwahililo wami, ni hanga nuwahilile kuhiana.

¹² Yino ye Shimbi yami, ngwami, lizangenu ni akwenu ngwe chize yami nakunuzanga.

¹³ Zango liahiana lili lino: mutu akunjike mwono wenyi hali masepa jenyi.

¹⁴ Nuli masepa jami, nyi munulinga Shimbi yize ngunanwehe.

¹⁵ Chichi kanuvuluka nawa ngwami, tuvumbi, mumu kavumbi keshi kunyingika chize mwata wenyi akulinga. Ngunanuvuluka ngwami, masepa, mumu hingunanunyingikisa yeswe yize nevwile kuli Tata.

¹⁶ Yenu kunwangutongwele, alioze yami nanutongwele. Nanusele hanga nukeme mihuko yize muyikalinduluka. Chenacho Tata makanwaha cheswacho munuketa mu jina liami.

¹⁷ Chino ngunanwambe ngwami, lizangenu ni akwenu.”

Akwa hashi kaakuvutwokela Yesu ni atu jenyi

¹⁸ “Nyi akwa hashi maanuvutwokela, nyingikenu ngwenu, hatangu haananguvutwokela yami.

¹⁹ Nyi nwabwa akwa hashi, kachi akwa hashi maakanuzanga mumu nuli nioo. Alioze hingunanutongola, hingunanuchiza hakachi ko, hi nuli akwa hashi ko. Kashika akunuvutwokela.

²⁰ Iwulukenu maliji waze nanwambile ngwami: ‘Ndungo niumwe mahiana mwata wenyi.’ Nyi haananguhungumiona, ni yenu nawa maakanuhungumiona. Nyi haanonokena longeso liami, maakononokena nawa longeso lienu.

²¹ Alioze maakanulinga yeswe ayize mumu ha jina liami, mumu kaanyingikine yoze wangutumine.

²² Nyi chejile ni kwalongesa, kachi keeshi mulonga. Alioze haliabwila keeshi kaliongelo ha milonga yo.

²³ Yoze Wakunguvutwokela, kakuvutwokela nawa Tata.

²⁴ Nyi chilingile yitanga ku meso jo yize mutu niumwe kayilingile, kachi keeshi mulonga. Alioze haliabwila haanamono yitanga yami, hindu kaakutuvutwokela yami ni Tata.

²⁵ Alioze yuma yino yeswe chatamba yibwe hanga Chisoneko cha Shimbi jo chikamanunuke ngwo: ‘Anguvutwokelele, alioze chikuma kaabwile ko nacho.’

²⁶ “Chikwashi makeza, Mwiku wamenemwene, yoze unakatuka kuli Tata. Mungukanutumina yo wa kuli Tata. Makashindakenya hali yami.

²⁷ Ni yenu nawa, munukashindakenya hali yami, mumu nwabwile hamwe ni yami chize ku kabutu.”