Yoano 14 - Mukanda Wa Zambi 1970

Yesu ye jila yakuya kuli Tata

¹ Yesu yambila tumbaji twenyi ngwenyi: “Mbunge jenu kanda jilibikala. Fulielenu Zambi, fulielenu nawa yami.

² Mu zuwo lia Tata muyili yibatulo yinji. Ngunayi mu kunululikila muhela. Chahashile kunwambulwila cho, nyi hi chamwenemwene ko.

³ Muze hinanululikila muhela, mungukeza nawa. Mungukanwanda yami mwene, hanga ni yenu nukabwe kuze yami nguli.

⁴ Nunanyingika jila yakuheta kuma kuze ngunayi.”

⁵ Tomase yamukumbulula ngwenyi: “Mwene, kutwanyingikine kuze unayi. Ngwe kuchi tunahase kunyingika jila?”

⁶ Yesu ngwenyi: “Yami nguli ye jila, ni we umwenemwene, ni we mwono. Niumwe meza kuli Tata shina ni yami.

⁷ Nyi nunangunyingika yami, nunanyingika nawa Tata. Chize ku haliabwila munumunyingika, hinwamumona.”

⁸ Filipe yamwamba ngwenyi: “Mwene, tulweze kama mwe Tata, mba tuhutuke.”

⁹ Yesu ngwenyi: “Filipe, shimbu libwa haha nguli hamwe ni yenu, hindu kuwangunyingikine, nyi? Mutu yoze hangumona, hamona nawa mwe Tata. Mba kuchi unambe ngwe: ‘Tulweze kama mwe Tata’?

¹⁰ Kuushi kufuliela ngwe, yami nguli muli Tata ni Tata muli yami, nyi? Maliji eswe hingunahanjika nenu, hi a yami mwene ko. Alioze Tata yoze uli muli yami mwe wakulinga yitanga yenyi.

¹¹ Ngufulielenu muze ngunambe ngwami, yami nguli muli Tata, ni Tata muli yami. Alioze nyi ka, ngufulielenu mumu ha ye yitanga.

¹² Chamwenemwene ngunanwambulwila ngwami, yoze unangufuliela, neye makalinga yitanga yize nakulinga. Makalinga yitanga yinene yahiana yino, mumu ngunayi kuli Tata.

¹³ Mungukalinga yuma yeswe yize munuketa mu jina liami, hanga uhenya wa Tata ukasoloke muli mwe Mwana.

¹⁴ Nyi munungwita chimwe Chuma mu jina liami, mungukachilinga.”

Yesu yalakenya kutuma Mwiku wa Linanga

¹⁵ “Nyi nwakunguzanga, munufunga Shimbi jami.

¹⁶ Mungukaliumba kuli Tata hanga anwehe Chikwashi mukwo, hanga akabwe hamwe ni yenu miaka yeswe, we Mwiku wamwenemwene.

¹⁷ Akwa hashi kaahashile kuutambula, mumu kaahashile kuumona, chibwe kuunyingika. Alioze yenu nunaunyingika, mumu kuuli hamwe ni yenu, ni muukabwa muli yenu.

¹⁸ “Chichi kanuhichika ana ashiwa. Mungukeza nawa kuli yenu.

¹⁹ Ha shimbu likepe akwa hashi keechi kangumona nawa, alioze yenu, munukangumona, mumu yami nguli ni mwono, ni yenu nawa munukabwa ni mwono.

²⁰ Ha tangwa lize, munukanyingika ngwenu, nguli muli Tata, ni yenu muli yami, ni yami muli yenu.

²¹ “Yoze wakufunga Shimbi jami ni wakujononokena, mwenawo wakunguzanga. Tata mazanga yoze wakunguzanga, ni yami nawa mungumuzanga ni mungulisolola kuli iye.”

²² Yudase (hi Kakeriote ko) yamuhula ngwenyi: “Mwene, kuchi muulisolola kuli yetu, alioze hi kuli akwa hashi ko?”

²³ Yesu ngwenyi: “Yoze wakunguzanga, mononokena longeso liami. Tata mamuzanga, mba Tata ni yami mutukeza ni kutwama muli iye.

²⁴ Yoze keshi kunguzanga, keshi kwononokena maliji jami. Longeso lize nwakungwivwa, hi lia yami ko, alioze lia Tata yoze wangutumine.

²⁵ “Hinanwambulwila yuma yino shimbu nguchili hamwe ni yenu.

²⁶ Mwe Chikwashi, Mwiku wa Linanga, yoze Tata makatuma mu jina liami, makanulongesa yeswe, makanwiwulula yuma yeswe yize hinanwambulwila.

²⁷ “Uhwimino ngunanuhichikila. Uhwimino wami ngunanwehe. Chanuhele wo ngwe chize akwa hashi akuhana. Kanda nulibikala, kanda nwivwa woma.

²⁸ Hinwevwa chize hinamba ngwami: ‘Ngunayi, alioze munguhiluka kuli yenu.’ Nyi nwakunguzanga, munuwahilila ha kunyingika ngwenu, ngunayi kuli Tata, mumu Tata kali munene Wahiana yami.

²⁹ Hinanwambulwila cho shimbu kanda, hanga muze yuma yino muyikabwa, nukafuliele.

³⁰ Chichi kuhanjika nawa chinji hamwe ni yenu, mumu Mwata wa hashi hano kaneza. Keshi chiyulo nichimwe hali yami,

³¹ alioze chatamba akwa hashi kunyingika ngwo, nakuzanga Tata, kashika nakulinga yize yeswe angwambile Tata ha kuyilinga. “Katukenu, tuyenu.”