Yoano 13 - Mukanda Wa Zambi 1970

Yesu yasanyisa molu ja tumbaji twenyi

¹ Te hikwasala tangwa limuwika ni chiwanyino cha kwiwuluka Kubalika. Yesu yanyingika ngwenyi, ola yenyi hiyaheta yakukatuka hashi ni kuhiluka kuli Tato. Matangwa eswe yazanga atu jenyi waze te atwama hano hashi, yaazanga ndoo ku songo.

² Yesu ni tumbaji twenyi te kaanali ha chingoloshi. Sakwonga hanyongesa kulu Yudase, mwana wa Simone Kakeriote, akunjike Yesu kuli akwa kole jenyi.

³ Yesu yanyingika ngwenyi, Tato hanamwehe chiyulo cheswe, yanyingika ngwenyi, hanakatuka kuli Zambi ni mahiluka nawa kuli Zambi.

⁴ Yesu yakatuka ku mesa, yazula mahina jenyi a helu, yanda chitambala cha kukusumwina meya (twaya), yalijichika cho mu zalilo.

⁵ Mba yatehuna meya mu mbashila, yabutuka kusanyisa molu ja tumbaji ni kuyikusumuna ni chitambala chize te analijichika mu zalilo.

⁶ Yaheta kuli Simone Petulu. Mwe Simone yamuhula ngwenyi: “Mwene, yena muusanyisa molu jami, nyi?”

⁷ Yesu ngwenyi: “Kuwanyingikine chize ngunalingi haliabwila, alioze kulutwe muukanyingika.”

⁸ Petulu ngwenyi: “Ka! Kuuchi kusanyisa molu jami nichimwe!” Yesu ngwenyi: “Nyi chichi kukusanyisa, kuuchi kubwa kambaji kami nichimwe.”

⁹ Simone Petulu ngwenyi: “Mwene, nyi chocho, kanda ungusanyisa molu wika, alioze ngusanyise ni moko ni mutwe!”

¹⁰ Yesu ngwenyi: “Yoze hasana mujimba weswe keshi kuzanga kusana nawa shina molu, mumu habema kulu mweswe. Yenu nunabeme, alioze hi eswe ko.”

¹¹ (Yesu yanyingika yoze te mamukunjika kuli akwa kole jenyi. Kashika yamba ngwenyi: “Kunwabemene eswe.”)

¹² Muze Yesu hasanyisa molu jo, yazala nawa mahina jenyi a helu, yatwama ku mesa, mba yaamba ngwenyi: “Nunanyingika chize hinanulinga, nyi?

¹³ Nwakunguvuluka ngwenu: ‘Longeshi’ ni ‘Mwene.’ Nwakwamba kanawa, mumu Chenacho nguli.

¹⁴ Nyi yami mwe Mwene kanda Longeshi hinanusanyisa molu, ni yenu nawa chatamba kulisanyisa molu umwe ni mukwo.

¹⁵ Hinanwaha chilweza hanga nukalinge ngwe chize hinanulinga yami.

¹⁶ Chamwenemwene ngunambe ngwami, ndungo niumwe unahiana mwata wenyi, chibwe kanganda niumwe unahiana yoze wakumutuma.

¹⁷ Haliabwila hinwanyingika Chuma chino. Munuwahilila nyi munuchilinga!

¹⁸ “Chambile yenu eswe. Ngunanyingika waze natongwele. Alioze yuma yize yasonewene mu Mukanda wa Zambi chatamba kumanunuka. Ngwo: ‘Yoze wakulia mbolo hamwe ni yami, hangwalumukina.’

¹⁹ Hinalianga kunwambulwila cho shimbu kanda, hanga muze muchikabwa nukanyingike ngwenu, ‘Yami Nguli Yoze Nguli,’

²⁰ Chamwenemwene ngunanwambulwila ngwami, mutu yoze matambula yoze ngunatumu, mangutambula yami. Ni mutu yoze mangutambula, matambula yoze wangutumine.”

Yesu yambulula ngwenyi: Yudase mamukunjika kuli akwa kole jenyi

²¹ Muze Yesu hamba yuma yino, yalibikala. Mba yamba ngwenyi: “Chamwenemwene ngunanwambulwila ngwami, umwe hakachi kenu mangukunjika kuli akwa kole jami.”

²² Tumbaji yaalitalatala ni kuyambashana mutu yoze te anambila.

²³ Umwe wa kuli tumbaji, yoze Yesu azangile, te kanasulangana ni Yesu.

²⁴ Simone Petulu yatenya kambaji yoze hanga ahule Yesu ngwenyi, iya anambila.

²⁵ Kambaji yoze yashachila hali Yesu nikumuhula ngwenyi: “Mwene, iya mwenawo?”

²⁶ Yesu ngwenyi: “Mutu yoze mungutachila lupapa ni kumwaha yo, mwenawo.” Mba Yesu yanda lupapa, yamutata, yamwaha Yudase mwana wa Simone Kakeriote.

²⁷ Muze Yudase hatambula lupapa, hazehene Sakwonga yamunjila. Yesu yamwamba ngwenyi: “Chize unambe kulinga, Chilinge nikawashi!”

²⁸ (Niumwe wa kuli waze te ali ku mesa Unanyingika chikuma chize amwambilile liji lize.

²⁹ Yudase te mwe wakumbata je mbongo. Kashika tumbaji amwe yaanyonga ngwo, Yesu kanazange kumwamba hanga aye ni kulanda yize anahono ha chiwanyino, hanji te kanamuhula hanga ahe yiswale yimwe yuma.)

³⁰ Yudase yatambula lupapa, yatuhuka hazehene. Te hikwabwa ufuku.

Shimbi yaha

³¹ Muze Yudase hatuhuka, Yesu yamba ngwenyi: “Haliabwila uhenya wa Mwana Mutu hiwasoloka, uhenya wa Zambi hiwasoloka muli iye.

³² Nyi uhenya wa Zambi hiwasoloka muli iye, Zambi neye makasolola muli iye mwene uhenya wa Mwana Mutu, ni makausolola ha shimbu likepe.

³³ Ana jami, shimbu likepe wika yami mungubwa hamwe ni yenu. Munukangufupa, alioze haliabwila ngunanwambulwila yuma yize hingunambulwila Ayuda, ngwami, kunwahashile kwiza kuma kuze yami munguya.

³⁴ Ngunanwehe Shimbi yaha ngwami, lizangenu ni akwenu. Ngwe chize nakunuzanga yami, ni yenu nawa lizangenu.

³⁵ Nyi munulizanga ni akwenu, eswe maakanyingika ngwo, nuli tumbaji twami.”

Yesu ngwenyi: “Yena Petulu, muulikala yami.”

³⁶ Simone Petulu yamuhula ngwenyi: “Mwene, kuli unayi?” Yesu ngwenyi: “Haliabwila kuwahashile kungukaula kuze ngunayi, alioze kulutwe muukangukaula.”

³⁷ Petulu yamuhula ngwenyi: “Mwene, ngwe kuchi chahashile kukukaula haliabwila? Ngunalulika kufwa mumu hali yena!”

³⁸ Yesu ngwenyi: “Kuma unalulika kufwa hamwe ni yami, nyi? Chamwenemwene ngunakwambulwila ngwami, shimbu ndemba kanda achitambika, kumuulikala yami katatu ngwe, kuwangunyingikine.”