Yoano 12 - Mukanda Wa Zambi 1970

Maria yawayisa Yesu maji a vumba libema

¹ Te hikwasala matangwa asambano ni chiwanyino cha kwiwuluka Kubalika, Yesu yaya ku Betania kuze te atwama Lazaru, yoze ahindwishile ku kufwa.

² Kwenako amulingililile yakulia ya chingoloshi. Marta yaavumbika, Lazaru yabwa wa ku mbunga ya atu waze te ali ku mesa hamwe ni Yesu.

³ Maria yanda Chipinji cha litro cha maji a vumba libema a ndando yinji, a kulinga ni nardu. Yaakwita ku molu ja Yesu mba yajikusumuna ni kambu jenyi. Zuwo lieswe yilinuka ni vumba lia maji waze.

⁴ Umwe wa kuli tumbaji twa Yesu, Yudase Kakeriote, yoze makamukunjika kuli akwa kole jenyi, yahula ngwenyi:

⁵ “Kuchi kevwe kalanjishile maji wano ni kulakaji jitatu ja mbongo, ni kujaha yiswale?”

⁶ Kambileko chino mumu wanyongene yiswale, alioze mumu yabwa mwiji. Iye te mwe wakusweka mushete wa mbongo jo, yalialia jize asele mo.

⁷ Alioze Yesu yamba ngwenyi: “Mwechenu kwenyi! Hafunga maji wano ndoo ku tangwa lia kufunda chami.

⁸ Yiswale munukabwa no matangwa eswe, alioze kunuchi kabwa ni yami matangwa eswe.”

Makulwana ja Ayuda yaatwama Lazaru punga

⁹ Mbunga yinene ya Ayuda yeevwa ngwo, Yesu ku Betania ali. No yaaya kwe kuze, hi mumu hali Yesu wika ko, alioze nawa ha kutala Lazaru, yoze Yesu ahindwishile ku kufwa.

¹⁰ Kashika mahako a lutwe a Zambi yaatwama punga hanga ashihe nawa Lazaru,

¹¹ mumu Ayuda anji ehukile akwa lutwe jo ni kufuliela Yesu mumu hali Lazaru.

Yesu mwe Mwanangana yanjila mu Yerusaleme

¹² Muze hikwacha, mbunga yize ejile ku chiwanyino cha kwiwuluka Kubalika yeevwa ngwo, Yesu kaneza ku Yerusaleme.

¹³ No yaanda mitango ya ngaji, yaatuhuka mu limbo ni kumubatwiza, yaakololoka ngwo: “Vulie! Zambi awahise yoze uneza mu jina lia Mwene. Zambi awahise Mwanangana wa Israele!”

¹⁴ Yesu yawana mwana chimbulu, yatwama ho, ngwe hichinasonewa mu Mukanda wa Zambi ngwo:

¹⁵ “Kanda wivwa woma, limbo lia Zione! Tala Mwanangana we kaneza, kanatwama hali mwana chimbulu.”

¹⁶ Hatangu tumbaji twenyi kaanyingikine yuma yize, alioze muze Yesu hanjila mu uhenya wenyi, yeewuluka ngwo, kuma yuma yino yasonewene mu Mukanda wa Zambi hakutwala kuli Yesu, nawa ngwo, atu alingile yuma yino mumu hali iye.

¹⁷ Mbunga yize te ali hamwe ni Yesu muze atambikile Lazaru atuhuke mu fuka ni kumuhindwisa ku kufwa, yaambujola yize amwene.

¹⁸ Kashika mbunga yeeza ni kumubatwiza-mumu te heevwa hakutwala ku chilayi chize alingile.

¹⁹ Afariseu yaalihanjikisa ngwo: “Nunamono ngwenu, kutwahashile kulinga nichimwe. Talenu, atu eswe haabutuka kumukaula.”

Agresia yaafupa Yesu

²⁰ Amwe Agresia yaabwa mukachi ka waze ayile ku Yerusaleme mu kuwayila ha chiwanyino.

²¹ Yaakundama kuli Filipe (wa ku Betsaida limbo lia mu Galilea), yaamulembejeka ngwo: “Mwata tunazange kumona Yesu.”

²² Filipe yaya ni kuchambulwila Andre, mba eswe aali yaaya ni kwambulwila Yesu.

²³ Yesu ngwenyi: “Ola hiyaheta yize Mwana Mutu matambula uhenya Wahiana.

²⁴ Chamwenemwene ngunanwambulwila ngwami, lunona wa tiriku kahashile kwima mihuko shina maholoka hashi akafwe. Nyi wafwa, mba mema mihuko yinji.

²⁵ Yoze mazanga mwono wenyi, mautokesa. Alioze yoze mavutwokela mwono wenyi hano hashi, makaufunga ndoo ku miaka yeswe.

²⁶ Nyi umwe mazanga kunguvumbika, chamutamba kungukaula, hanga kavumbi kami nawa makabwa kuze yami nguli. Tata makalemesa yoze wakunguvumbika.”

Yesu yambulula kufwa chenyi

²⁷ “Haliabwila mbunge yami hiyalibikala. Kuchi mungwamba? Ngwambe ngwami: ‘Tata, ngulamwine kama ha yize muyinguwana ha ola yino,’ nyi kuchi? Ka, ha chikuma chino nejilile, ha kumona ola yino ya lamba.

²⁸ Tata, lemesa jina lie!” Hohene yeevwa liji mwilu ngwo: “Hingunalilemesa kulu, ni mungulilemesa nawa.”

²⁹ Mbunga yize te anatwama ko yevwa liji. No yaamba ngwo: “Kota kukulunguza cha vula!” Akwo ngwo: “Kota kanganda ka mwilu wahanjika nenyi!”

³⁰ Alioze Yesu ngwenyi: “Liji lino kuliahanjikile mumu hali yami, alioze mumu hali yenu.

³¹ Haliabwila ye ola ya ubatwilo wa akwa hashi, haliabwila Mwata wa hashi hano mambiliwa haze.

³² Mba yami, muze makanguzundula kwilu, mungukakoka atu eswe.”

³³ (Ku maliji wano yaalweza kufwa chenyi chize makafwa.)

³⁴ Mbunga yaamukunguluka, yaamba ngwo: “Hitunevu mu Shimbi jetu ngwo, Chilamwina yoze Zambi alakenyene makatwama ndoo ku miaka yeswe. Mba kuchi muuhasa kwamba ngwe, chatamba kuzundula Mwana Mutu? Mwana Mutu yono iya?”

³⁵ Yesu ngwenyi: “Pangu lili mukachi kenu, alioze ha shimbu likepe wika. Endenu shimbu nuchili ni pangu, hanga ufuku kuuchi kanuwana. Mumu mutu yoze menda mu milima keshi kunyingika kuze maya.

³⁶ Tayizenu pangu shimbu nuchili nalio, hanga nukabwe atu ja pangu.” Muze Yesu hamba yuma yino, yakatuka, yaswama.

Ayuda kaafulielele ko Yesu

³⁷ Chibwe halinga yilayi yinji ku meso jo, hindu kaafulielele ko,

³⁸ hanga liji lize ahanjikile Izaya, mukwa munanyi wa Zambi likamanunuke ngwenyi: “Mwene, iya Wafulielele sango jetu? Kuli iya Mwene hanalweze tachi jenyi?”

³⁹ Kaahashile ko kufuliela mumu Izaya yamba nawa ngwenyi:

⁴⁰ “Zambi hanapupuchisa meso jo, hanakalisa mbunge jo, hanga meso jo keechi kamona, hanga mbunge jo kujichi kwivwa, kuchina matewuluka kuli yami hanga ngwawuke.”

⁴¹ Izaya yamona uhenya wa Yesu, kashika yachamba hakutwala kuli iye.

⁴² Chibwe chocho, hakachi ka akwa kuyula ja Ayuda anji amufulielele. Alioze mumu hali Afariseu kaamutayijile ko ku meso ja atu, kuchina maakatwisa ku zuwo lia kuwayila lia Ayuda,

⁴³ mumu yaazanga lufuma wa atu kuhiana lufuma wa Zambi.

Ubatwilo ku maliji a Yesu

⁴⁴ Yesu yakololoka ngwenyi: “Yoze wakungufuliela, hi yami wika ko akufuliela, alioze kakufuliela nawa yoze wangutumine.

⁴⁵ Yoze unangumono, kanamono nawa yoze wangutumine.

⁴⁶ Yami hinguneza hashi ngwe pangu, hanga yoze mangufuliela, kechi kenda mu milima.

⁴⁷ Nyi umwe mevwa maliji jami, alioze kechi kwoononokena, hi yami ko mungukamubatwila. Mumu chejile ngukahise akwa hashi, alioze hanga ngukaalamwine.

⁴⁸ Yoze Wakungumona ni keshi kutayiza maliji jami, kali ni yoze mamuhisa. Liji lize nalongesele lie mulikamuhisa ha tangwa lia kusula.

⁴⁹ Mumu chalongesele ni chiyulo cha yami mwene, alioze Tata yoze wangutumine, iye mwene hanangwehe chize Changutamba kwamba ni kulongesa.

⁵⁰ Ngunanyingika ngwami, Shimbi jize Tata akuhana jikwete mwono wa miaka yeswe. Chize nakwamba, nakuchamba ngwe chize Tata anguhele Shimbi.”