Yoano 11 - Mukanda Wa Zambi 1970

Kufwa cha Lazaru

¹ Umwe mutu, wa ku Betania, jina lienyi te Lazaru, yayiza. Betania che chihunda cha Maria ni yayo Marta.

² (Maria yono mwe wawayishile molu ja Mwene Yesu ni maji, mba yajikusumuna ni kambu jenyi. Ndumbwenyi Lazaru mwe wayijile.)

³ Mandumbu waze aali yaatuma mutu ni kwambulwila Yesu ngwo: “Mwene, sepa lie kanayiji.”

⁴ Muze Yesu hevwa sango jize, yamba ngwenyi: “Musongo uno hi wa kufwa ko, alioze wakulweza uhenya wa Zambi, hanga atu akachichimieka nawo Mwana Zambi.”

⁵ Te Yesu kakuzanga Marta, ni mwanakwo, ni Lazaru.

⁶ Muze hevwa ngwo, Lazaru kanayiji, yatwama ko matangwa aali.

⁷ Mba yambila tumbaji twenyi ngwenyi: “Tuhilukenu ku chifuchi cha Yudea.”

⁸ Tumbaji ngwo: “Longeshi, shimbu linoliene Ayuda anakamba kukwasa mawe, hindu unazange kuhiluka ko nawa, nyi?”

⁹ Yesu ngwenyi: “Mwalwa ukwete ola kumi ni jaali, cheka? Nyi mutu menda mwalwa, kahashile kuhukana, mumu kanamono pangu lia hashi.

¹⁰ Alioze, nyi menda ufuku, mahukana, mumu keshi pangu.”

¹¹ Muze Yesu hamba maliji wano, yawezaho ngwenyi: “Sepa lietu Lazaru haya tulo, alioze ngunayi ngukamuhindwise.”

¹² Tumbaji ngwo: “Mwene, nyi mu tulo ali, kumakahinduka.”

¹³ Te Yesu kanambe ngwenyi, Lazaru hafwa, alioze tumbaji yaanyonga ngwo, kanahanjika hakutwala ku tulo.

¹⁴ Kashika Yesu yahanjika mwazu ngwenyi: “Lazaru hafwa.

¹⁵ Ngunawahilila mumu chabwile ko hanga nukangufuliele, alioze tatuyenu ko.”

¹⁶ Mba Tomase (yoze akuvuluka ngwo mwana wa pasa) yambila tumbaji akwo ngwenyi: “Ni yetu nawa, tuyenu ko, tukafwe hamwe ni Longeshi.”

Yesu we uhindukilo ni we mwono

¹⁷ Muze Yesu haheta, yawana Lazaru anakamufunda kulu, te matangwa awana haabalika.

¹⁸ Betania kali hakamwihi ni Yerusaleme, ngwe kilometro jitatu.

¹⁹ Ayuda anji ejile maha Marta ni Maria hanga akaasangulwise hakutwala ku kufwa cha ndumbwo.

²⁰ Muze Marta hevwa ngwo, Yesu heza, yaya ni kumubatwiza, alioze Maria yasala mu zuwo.

²¹ Marta yambila Yesu ngwenyi: “Mwene, nyi te unakabwa kama kuno, kachi ndumbwami kafwile!

²² Alioze ngunanyingika ngwami, chibwe haliabwila Zambi makwaha yeswe yize muumwita.”

²³ Yesu ngwenyi: “Ndumbwe kumahinduka ku kufwa.”

²⁴ Marta ngwenyi: “Ngunanyingika makahinduka ku kufwa ha uhindukilo wa afu ha tangwa liakusula.”

²⁵ Yesu ngwenyi: “Yami nguli we uhindukilo ni we mwono. Yoze wakungufuliela, chibwe afwe, kumabwa ni mwono,

²⁶ Ni yoze uli ni mwono, ni kakungufuliela, kechi kafwa nichimwe. Unachifuliela, nyi?”

²⁷ Marta ngwenyi: “Ewa Mwene, hingunafuliela ngwami, yena mwe Chilamwina yoze Zambi alakenyene, mwe Mwana Zambi yoze chatamba kwiza hano hashi.”

Yesu yalila

²⁸ Muze hamba yuma yino, Marta yaya ni kutambika mwanakwo Maria, yamwambila ku tenga ngwenyi: “Longeshi kwali akuze. Kanakutambika.”

²⁹ Kashika Maria yakatuka, yanyangumuka nikawashi ni kuya kuli Yesu.

³⁰ (Yesu te kanda achinjila mu chihunda, alioze yabwa kuma kuze amubatwijilile Marta).

³¹ Muze Ayuda, waze te ali mu zuwo hamwe ni Maria ni kumusangulwisa, haamumona nikutuhuka nikawashi, yaamukaula. Yaanyonga ngwo, kanayi ku fuka ni kulilila ko.

³² Muze Maria haheta kuze te ali Yesu, yamumona, yafulamana ku meso jenyi, yaliumba ngwenyi: “Mwene, nyi te unakabwa kama kuno, kachi ndumbwami kafwile ko!”

³³ Muze Hamona Maria kanalili, ni e Ayuda waze ejile nenyi, Yesu yevwa chinyengo ni kulibikala mu mbunge.

³⁴ Mba Yesu yaahula ngwenyi: “Kulihi nunakamufunda?” Ayo ngwo: “Mwene, tweya umone.”

³⁵ Yesu yabutuka kulila.

³⁶ Ayuda yaamba ngwo: “Talenu chize te akumuzanga!”

³⁷ Alioze amwe hakachi ko yamba ngwo: “Mutu awu walawishile meso ja kapuputa, nyi? Te kahashile kulinga Chuma hanga Lazaru kechi kufwa, nyi?”

Yesu yahindwisa Lazaru ku kufwa

³⁸ Yesu yevwa nawa chinyengo chinji, yaya ku fuka, te lia chivwenge. Ku chikolo atu yaasa ko liwe.

³⁹ Yesu yamba ngwenyi: “Chizenu liwe.” Alioze Marta, ndumbwa mufu, ngwenyi: “Mwene, hakupuka kulu vumba, mumu kali kulu mu fuka matangwa awana!”

⁴⁰ Yesu ngwenyi: “Chakwambile ngwami, nyi muufuliela, muumona uhenya wa Zambi, nyi?”

⁴¹ No yaachiza liwe. Yesu yatala kwilu, mba yamba ngwenyi: “Tata ngunakusakwila mumu wakunguvwila.

⁴² Ngunanyingika ngwami, matangwa eswe wakungwivwa, alioze hinachamba mumu hali atu waze anangukunguluka, hanga afuliele ngwo, yena wangutumine.”

⁴³ Muze hamba maliji wano, yakololoka ni liji linene ngwenyi: “Lazaru, tuhuka mo!”

⁴⁴ Mufu yatuhuka, molu ni moko akukasa ni mahina, ni huma liakujinga ni chitambala. Yesu yaamba ngwenyi: “Mujitulenu, mwechenu aye.”

Akwa lutwe yaatwama Yesu punga

⁴⁵ Ayuda anji a kuli waze ejile maha Maria amwene yize alingile Yesu, mba yaamufuliela.

⁴⁶ Alioze amwe hakachi ko yaaya ni kwambulwila Afariseu, yaalumbunwina yuma yeswe alingile Yesu.

⁴⁷ Hohene Afariseu ni mahako a lutwe yaakungulula Mbunga ya Ngaji ja Ayuda ni kwamba ngwo: “Kuchi mutulinga? Mumu mutu yono kakulinga yilayi yinji!

⁴⁸ Nyi mutumwecha ni kulinga ngwe chino, atu eswe maamufuliela. Ha chino miata ja Aroma maakahulumuka ni kubuzula zuwo lietu lia Zambi ni vungu lietu!”

⁴⁹ Umwe hakachi ko, jina lienyi te Kaifa, mwata wa mahako ha mwaka uze, yamba ngwenyi: “Yenu kunwanyingikine nichimwe!

⁵⁰ Kunwanyingikine ngwenu, chinalite mutu umuwika kufwila atu hanga vungu heswe kanda lifwa, nyi?”

⁵¹ (Chino kachambile ko ku tachi jenyi mwene, alioze mumu te kali mwata wa mahako a lutwe ha mwaka uze. Kashika yambulula shimbu kanda ngwenyi, Yesu makafwila vungu lia Ayuda,

⁵² hindu hi vungu lia Ayuda wika ko, alioze hanga akakungulwile nawa mu mbunga yimuwika atu ja Zambi eswe waze haanamwangana.)

⁵³ Mba chize ku tangwa lize, makulwana ja Ayuda yaafupa mana a kushiha Yesu.

⁵⁴ Kashika Yesu kalisolwele ko nawa ku meso ja atu anji mukachi ka Ayuda, alioze yaya ku chifuchi cha kusulangana ni puya, mu limbo lia Efraime Kwenako atwamine ni tumbaji twenyi.

⁵⁵ Chiwanyino cha Kubalika cha Ayuda e hichabwa hakamwihi. Atu anji a mu chifuchi yaaya ku Yerusaleme ha kulibemesa mumu ha Kubalika.

⁵⁶ Atu yaafupafupa Yesu. Muze akungulukile mu zuwo lia Zambi, yaalihulahula ngwo: “Kuchi nunashinginyeka, kumeza ku chiwanyino, nyi ka?”

⁵⁷ Mahako a lutwe a Zambi ni Afariseu te haahana Shimbi ngwo: “Mweswawo mamona kuze ali Yesu, eze atulweze, hanga tuhase kumukwata.”