Yoano 10 - Mukanda Wa Zambi 1970

Chishima cha kafunga ni mapanga

¹ “Chamwenemwene ngunambe ngwami: Yoze keshi kunjila ku chikolo cha tanga lia mapanga, alioze manjilila ku sali lieka, mwenawo mwiji kanda muhuza.

² Alioze yoze wakunjilila ku chikolo, mwe kafunga ka mapanga.

³ Mukwa kufunga chikolo mamwazulwila. Mapanga meevwa liji lia kafunga muze maatambika ha majina, maatuhwisa haze.

⁴ Ni muze haatuhwisa eswe haze, kafunga maatetekelela ni mapanga maamukaula, mumu kaananyingika liji lienyi.

⁵ Alioze mapanga keechi kukaula chilambala, mumu kanyingikine liji lienyi.”

⁶ Yesu yaatela, chishima chino, alioze kuchaalumbunukinyine ko.

Yesu mwe kafunga mubema

⁷ Kashika Yesu yaamba nawa ngwenyi: “Chamwenemwene ngunanwambulwila ngwami, yami nguli chikolo cha tanga lia mapanga.

⁸ Eswe waze aliangile kwiza kulutwe liami kaali eji ni mihuza, alioze mapanga keevwile ko.

⁹ Che chikolo cha tanga yami. Yoze manjila kuli yami, mamulamwina. Neye manjila ni matuhuka, mawana yakulia yenyi.

¹⁰ Mwiji kakwiza shina lume ha kwiya, ni kushiha, ni kwonona. Yami nejile hanga atu abwe ni mwono; mwono wakulumbama.

¹¹ “Yami nguli Kafunga mubema. Kafunga mubema kanakunjika mwono wenyi hali mapanga jenyi.

¹² Mutu yoze wakulingila lume mbongo, hi kafunga ko, hi mwenya mapanga ko. Mumu, muze mamona kangunga kaneza, mahichika mapanga, machina. Ha chino, kangunga makwata mapanga ni kwamwanga.

¹³ Machina, mumu kali mukwa kulingila mbongo. Keshi kunyonga mapanga.

^14-15 Yami nguli kafunga mubema. Ngwe chize Tata kanangunyingika, nyi yami ngunanyingika Tata, chimuwika ni yami ngunanyingika mapanga jami, ni mapanga jami kaanangunyingika. Ngunakunjika mwono wami mumu hali mapanga jami.

¹⁶ Mapanga akwo nguli no waze keeshi mu tanga lino. Changutamba kwaneha nawa. Maakevwa liji liami, mba maakabwa chendo chimuwika ni kafunga umuwika.

¹⁷ “Tata kakunguzanga, mumu ngunakunjika mwono wami ha kuuwanda nawa.

¹⁸ Mutu niumwe mahasa kuchiza mwono wami, alioze ngunaukunjika nikulita ni chize ngunazange yami mwene. Chiyulo nguli nacho cha kuukunjika ni chiyulo nguli nacho cha kuutambula nawa. Chenacho Tata anguhele Shimbi ha kulinga.”

¹⁹ Ayuda yaalihandununa nawa mumu ha maliji wano.

²⁰ Anji mukachi ko yaamba ngwo: “Mwiku wa luchisa akwete, kanazaluka, kuchi kevwe nunamwivu?”

²¹ Akwo yaamba ngwo: “Mukwa mwiku wa luchisa kahashile kuhanjika chocho. Mwiku wa luchisa muuhasa kulawisa tupuputa, nyi?”

Ayuda yaalituna Yesu

²² Ha mwaka wa chishika atu yaalinga mu Yerusaleme chiwanyino cha Kujilila Zuwo lia Zambi lia Ayuda.

²³ Yesu yendangana mu chisambwe cha Solomone mu zuwo lia Zambi.

²⁴ Ayuda yaamukunguluka, yaamuhula ngwo: “Ndoo mwiji muka muutupwisa ni chisweswe? Nyi mwe Chilamwina yoze Zambi alakenyene yena, twambulwile cho mwazu.”

²⁵ Yesu ngwenyi: “Hingunanwambulwila cho kulu, hindu kunwangufulielele. Yitanga yize nakulinga mu jina lia Tata kuyakungushindakenya.

²⁶ Alioze kunushi kufuliela, mumu hi nuli a ku mapanga jami ko.

²⁷ Mapanga jami kaakwivwa liji liami, ni yami ngunaanyingika, no kaakungukama.

²⁸ Nakwapwisa ni mwono wa miaka yeswe. Keechi kafwa nichimwe ndoo ku miaka yeswe. Mutu niumwe kechi kaachangumuna ku kwoko liami.

²⁹ Tata yoze wanguhele o, kali munene Wahiana eswe. Mutu niumwe makaachangumuna ku kwoko lienyi.

³⁰ Tata ni yami tuli umuwika.”

³¹ Ayuda yaanda nawa mawe hanga amwase.

³² Yesu yaamba ngwenyi: “Yitanga yinji hingunalingi ku meso jenu mu chiyulo cha Tata. Ku yitanga yize yeswe, ha chitanga chika nunazange kungwashila mawe?”

³³ Ayuda ngwo: “Kutwazangile ku kwasa mawe ha chitanga chimwe chibema, alioze mumu wakushililika Zambi. Yena uli mutu lume, alioze wakulipwisa ngwe Zambi.”

³⁴ Yesu ngwenyi: “Hichinasonewa mu Shimbi jenu, Zambi ngwenyi: ‘Nuli mazambi.’

³⁵ Tunanyingika ngwetu, yuma yize Mukanda wa Zambi unambe yakulinduluka matangwa eswe, ni Zambi hanavuluka atu waze ahanyine liji lienyi ngwenyi: ‘mazambi’.

³⁶ Alioze yami, Tata wanguhele kubwa munangi, Tata wangutumine hano hashi. Ngwe kuchi munuhasa kwamba ngwenu, nakushililika Zambi? Mumu nambile ngwami: ‘Nguli Mwana Zambi,’ nyi?

³⁷ Nyi Chishi kulinga yitanga ya Tata, kanda nungufuliela.

³⁸ Alioze, nyi nakuyilinga, chibwe kunushi kungufuliela, ngufulielenu mumu ha yitanga yami, hanga nunyingike ngwenu, Tata kali muli yami ni yami nguli muli Tata.”

³⁹ Ayuda yaazanga nawa kumukwata, alioze Yesu yaseunuka.

⁴⁰ Yesu yaya nawa musali lia Yordau, kuze te Yoano akupapachishila, yatwama ko.

⁴¹ Atu anji ejilejile kuli iye, yaambamba ngwo: “Yoano kalingile chilayi nichimwe, alioze yize yeswe ambile hakutwala kuli mutu yono yili yamwenemwene.”

⁴² Atu anji afulielele Yesu kwe kuze.