Yoano 1 - Mukanda Wa Zambi 1970

Liji yilialumuka mutu

¹ Ha Ubutukilo, muze te Zambi kanda achitanga yuma, Liji liabwile kulu. Lie Liji liabwile hamwe ni Zambi, ni Liji liabwile Zambi.

² Ha Ubutukilo Liji liabwile kulu hamwe ni Zambi.

³ Zambi yatanga yuma yeswe ku ndundo jalio. Katangile nichimwe Chuma shina ni Liji.

⁴ Liji lize liabwile chishina cha mwono, we mwono wapangulwishile atu.

⁵ Pangu liapangukile mu milima, ni milima kuyalikumbile ko.

⁶ Zambi yatuma kanganda kenyi, jina lienyi te Yoano.

⁷ Mwenawo wejile ngwe chela hanga ashindakenye hakutwala ku Pangu, yeza hanga eswe afuliele pangu mumu ha longeso lienyi.

⁸ Yoano te hi Pangu ko, alioze yashindakenye hakutwala ku pangu.

⁹ Mba yikwiza pangu liamwenemwene hano hashi mu kupangulwisa atu eswe.

¹⁰ Lie Liji liabwile hano hashi, ni Zambi yatanga hashi ku ndundo jalio, hindu akwa hashi kaalinyingikine ko.

¹¹ Yiliza ku chifuchi chalio, alioze atu jalio kaalitambwile ko.

¹² Alioze akwo yaalitambula, yaalifuliela. Kashika yiliaaha chiyulo cha kubwa ana ja Zambi.

¹³ No kaabwile ko ana ja Zambi nikulita ni chisemewa cha hano hashi, alioze tato Zambi.

¹⁴ Lie Liji yilialumuka mutu, yatwama mukachi ketu, mukwa utu ni umwenemwene. Yitumona uhenya wenyi unji, uhenya uze mwe Mwana hanatambula kuli Tato.

¹⁵ Yoano yashindakenya hakutwala kuli iye, yakololoka ngwenyi: “Yono mwe nambile ngwami: ‘Kaneza kunyima liami. Kananguhiana yami, mumu wabwile kulu kulutwe liami shimbu te kanda nguchisemuka.’ ”

¹⁶ Nikulita ni kulumbama cha utu wenyi, hanatuwahisa ni yiwape yeka ni yeka.

¹⁷ Zambi hanatwehe Shimbi ku kwoko lia Mose, alioze utu ni umwenemwene hiyineza muli Yesu Kristu.

¹⁸ Mutu niumwe hanamono Zambi niumwe mwaka, alioze mwe Mwana, yoze uli ngwe chize abwa Zambi, yoze watwama hamwe ni Zambi Tata, mwenawo hanamusolola.

Longeso lia Yoano Chipapachisa

¹⁹ Ayuda a mu Yerusaleme yaatuma mahako a Zambi ni Alevi ni kuhula Yoano ngwo: “Yena iya?”

²⁰ Neye kalitunyine ko ha kukumbulula, alioze yatayiza pundu ku meso ja atu ngwenyi: “Yami hi nguli ko Chilamwina yoze Zambi alakenyene.”

²¹ Yaamuhula nawa ngwo: “Mba yena iya? Eliya, nyi?” Yoano ngwenyi: “Ka kwami.” Ayo ngwo: “Yena mwe mukwa munanyi wa Zambi, nyi?” Neye yaakumbulula ngwenyi: “Ka.”

²² Kashika yaamuhula ngwo: “Yena iya mba? Hanga tukambulwile waze anakatutuma. Yena mwene, kuchi wakulivuluka?”

²³ Yoano ngwenyi: “Yami nguli ‘mutambi wa mutu yoze wakukololoka mu puya, ngwami: Lulikenu jila ya Mwene!’ ” (Ngwe chize ambile Izaya, mukwa munanyi wa Zambi.)

²⁴ Atu waze atumiwine kuli Afariseu,

²⁵ yaamuhula ngwo: “Nyi hi uli ko Chilamwina yoze Zambi alakenyene, chibwe Eliya, chibwe mwe mukwa munanyi wa Zambi, kuchi mba wakupapachisa atu?”

²⁶ Yoano ngwenyi: “Yami ngunapapachisa ni meya, alioze umuwika uli mukachi kenu yoze kunwanyingikine.

²⁷ Kaneza kunyima liami, alioze yami chatelele nichimwe kujitula sapato jenyi.”

²⁸ Yino yeswe yabwile ku chihunda cha Betania musali lia lwiji Yordau, kuze te Yoano akupapachishila atu.

Yesu Mwana Panga wa Zambi

²⁹ Muze hikwacha, Yoano yamona Yesu kaneza kuli iye. Yamba ngwenyi: “Talenu mwe Mwana Panga wa Zambi yoze unachiza shili ya akwa hashi.

³⁰ Yono mwe nambile ngwami, mutu uneza kunyima liami, alioze kananguhiana yami, mumu wabwile kulu kulutwe liami shimbu kanda nguchisemuka.

³¹ Yami te chamunyingikine, alioze nejile ni kupapachisa ni meya hanga ngumunyingikise kuli Aisraele.”

³² Yoano yashindakenya nawa ngwenyi: “Namwene Mwiku wa Linanga nikuhulumuka ngwe liembe ni kutwama hali iye.

³³ Hatangu te chamunyingikine, alioze Zambi, yoze wangutumine kupapachisa ni meya, yangwamba ngwenyi: ‘Muumona Mwiku wa Linanga nikuhulumuka ni kutwama hali umwe mutu. Mwenawo makapapachisa atu ni Mwiku wa Linanga.’ ”

³⁴ Yoano ngwenyi: “Nachimwene, ni ngunashindakenya ngwami, kali mwe Mwana Zambi.”

Tumbaji atangu a Yesu

³⁵ Muze hikwacha, Yoano te kanamana nawa kuzekwene hamwe ni aali a kuli tumbaji twenyi.

³⁶ Yamona Yesu kanabalika, yamba ngwenyi: “Talenu mwe Mwana Panga wa Zambi!”

³⁷ Tumbaji aali a Yoano waze evwile liji lienyi, yaabutuka kukaula Yesu.

³⁸ Yesu yatewuluka, yaamona kaanamukaula, yaahula ngwenyi: “Yika nunafupu?” No yaakumbulula ngwo: “Kulihi watwama, Rabi?” (Liji lino linalumbunuka ngwo: “Longeshi.”)

³⁹ Yesu yaakumbulula ngwenyi: “Tweyenu nutale.” No yaaya, kashika yaamona kuze te atwama, yaabwa ko hamwe nenyi tangwa lize. (Yikubwa ngwe ola ya muchiwana ya chingoloshi.)

⁴⁰ Umuwika wa kuli tumbaji waze aali te Andre, mwanakwo wa Simone Petulu.

⁴¹ Andre yawana hatangu yayo Simone, yamwamba ngwenyi: “Hitwamona Mesiya.” (Hanji Kristu, kulumbunuka ngwo, Chilamwina yoze Zambi alakenyene.)

⁴² Mba yatwala Simone kuli Yesu. Yesu yamutala, yamwamba ngwenyi: “Yena uli Simone, mwana wa Yoano. Atu maakakuvuluka ngwo: Sefase.” (Hanji Petulu, kulumbunuka ngwo, Liwe.)

Yesu yatambika Filipe ni Natanele

⁴³ Muze hikwacha, Yesu yanyonga kuya ku chifuchi cha Galilea, yatakana ni Filipe, yamwamba ngwenyi: “Ngu kaule!”

⁴⁴ (Filipe te wa ku Betsaida, lie limbo lia Andre ni Petulu.)

⁴⁵ Mba Filipe yawana Natanele, yamwamba ngwenyi: “Hitwamona mutu yoze asonekene Mose mu mukanda wa Shimbi, ni akwa munanyi ja Zambi mu mikanda yo ngwo, makeza. Kali Yesu, mwana wa Josefe wa ku Nazare.”

⁴⁶ Natanele yamuhula ngwenyi: “Chuma chibema muchihasa kukatuka ku Nazare, nyi?” Filipe ngwenyi: “Tweya utale.”

⁴⁷ Muze te Yesu anamono Natanele himamukundama, yamba hakutwala kuli iye ngwenyi: “Talenu Kaisraele wamwenemwene, keshi kalimbalimba!”

⁴⁸ Natanele yamuhula ngwenyi: “Ngwe kuchi unangunyingika?” Yesu ngwenyi: “Nakumonanga muze wabwanga mushi lia mutondo mukuyu, shimbu te Filipe kanda achikutambika.”

⁴⁹ Mba Natanele yamwamba ngwenyi: “Longeshi, mwe Mwana Zambi yena! Mwe Mwanangana wa Israele!”

⁵⁰ Yesu yamuhula ngwenyi: “Unafuliela mumu hinakwamba ngwami, nakumonanga mushi lia mukuyu, nyi? Muukamona yuma yinene yahiana yino!”

⁵¹ Yesu yawezaho ngwenyi: “Ngunanwambulwila ngwami, chamwenemwene, munukamona lilu linazuluka ni tunganda a Zambi kaanazezuka ni kuhulumuka hali Mwana Mutu!”