Yishima 9 - Mukanda Wa Zambi 1970

Mana ni uhepuke

¹ Mana hatunga zuwo lienyi, hasonga manguji jalio shimbiali,

² Hashiha yimuna yenyi, halulika vinyu yenyi, hala mesa yenyi.

³ Hatuma tuvumbi twenyi a mapwo akakololoke ha mukandu wa mu limbo ngwo:

⁴ “Tweyenu kuno yenu yizuzuke!” Ni kuli yihepuke kaanambe ngwo:

⁵ “Tweyenu, nulie mbolo yami, nunwe vinyu yize hinalulika.

⁶ Hichikenu yizuzuke, nubwe ni mwono. Kaulenu malinjekela.”

⁷ Nyi muulongesa mukwa kulenya, muusauka. Nyi muukanjisa chingulungulu, mulilimuna.

⁸ Mukwa kulenya kanda umukanjisa nichimwe; kuchina makuvutwokela ha chikuma chize. Alioze nyi walongesa mukwa mana, makusa vumbi.

⁹ Fumba mukwa mana, mba maliwezela mana. Longesa mukwa ululi mba maliwezela yinyingi.

¹⁰ Nyi unambe kubwa mukwa mana Chuma chitangu chatamba kulemesa Mwene Zambi. Nyi muunyingika mwe Zambi munangi, muubwa ni malinjekela.

¹¹ Mana maweza miaka ku mwono we.

¹² Nyi muubwa ni mana, muubwa mukwa kufumbula, alioze nyi mulitunoo, muumona lamba.

¹³ Uhepuke uli ngwe pwo mukwa zungo, chizuzuke keshi sonyi.

¹⁴ Kakutwama ku chikolo cha zuwo lienyi, hanji ha chitwamo cha wanangana mu limbo,

¹⁵ ni kukololoka kuli waze anabalieka, kuli waze anayi mu majila jo, ngwenyi:

¹⁶ “Tweyenu yenu yihepuke!” Kuli yizuzuke mamba ngwenyi:

¹⁷ “Meya a kwiya cho kuyema. Mbolo ya kwiya cho kuyema.”

¹⁸ Alioze ayo keeshi kunyingika ngwo, atu waze akuya ku zuwo lienyi kaakufwa, nawa ngwo, waze haalakenya kulu kaali muma lia afu.