Yishima 8 - Mukanda Wa Zambi 1970

Chichimiekenu Mana

¹ Banjikenu! Mana kakukololoka. Malinjekela kakutambika.

² Kakumana ha manangamo hehi ni jila, Kakumana ha makano ja majila.

³ Ku chikolo cha limbo, hehi ni yajilo, kakutambika ngwo:

⁴ “Nakusanyika, yenu malunga, nakutambika yenu atu eswe.

⁵ Nuli yizuzuke, nyi? Lilongesenu kubwa akwa mana. Nuli yihepuke, nyi? Lilongesenu nubwe akwa malinjekela.

⁶ Ivwenu maliji jami abema; yuma yeswe yize ngunambe yili yibema.

⁷ Yize ngunakwambe yili yamwenemwene; Nakuvutwokela mahuza.

⁸ Yeswe yize nakwamba yili yamwenemwene, Kumushi nichimwe chahenga hanji chibi.

⁹ Kuli mukwa malinjekela yuma yeswe yinalumbunuka; kuli mukwa yinyingi, yuma yeswe yinalulama.

¹⁰ Tongola kufumba chami hi prata ko, tongola chinyingi hi oru yibema ko.

¹¹ “Yami nguli Mana, ngunahiana kubema mawe a ndando yinji, yuma yize wakuzanga kukushi nichimwe chinalifu ni yami.

¹² Yami nguli Mana, nguli ni malinjekela. Nguli ni yinyingi, nakubatula milonga kanawa.

¹³ Kulemesa Mwene Zambi chinalumbunuka ngwo, kuvutwokela ungulungulu; nakuvutwokela kulengumuka ni kulizata, majila abi ni maliji a mahuza.

¹⁴ Nguli ni yinyingi ni chiyulo, nguli ni malinjekela ni tachi.

¹⁵ Nakukwasa mianangana kuyula, ni akwa kuyula kuhana Shimbi jibema.

¹⁶ Akwa kuyula eswe a hano hashi kaakuyula ni kukwasa chami, ngaji ni atu alemu.

¹⁷ Nakuzanga waze akunguzanga yami; eswe waze akungufupa kaakunguwana.

¹⁸ Nakulemesa atu nikwabichisa, nakwawahisa.

¹⁹ Yuma yize nwakutambula kuli yami yinahiana oru yibema, yinahiana prata yibema.

²⁰ Nakwenda mu jila ya ululi; nakukaula jila ya umwenemwene.

²¹ Nakuhana yikumba kuli waze akunguzanga, nakuzalisa mazuwo jo ni ubite.

²² “Mwene Zambi mwe wangutangile ku kabutu ka yuma yeswe, ku kabutu ka yitanga yenyi ku miaka yikulu.

²³ Kangutangile ha Ubutukilo lume, ku kabutu, shimbu te hashi kanda hachibwa.

²⁴ Nasemukine shimbu te tulunga lwiji kanda achibwa, muze te kukushi mashima a meya.

²⁵ Nasemukine shimbu te milundu kanda yichibwa, ni mindundena te kanda achiyilulika,

²⁶ shimbu te Zambi kanda achitanga hashi ni ye minda, chibwe e mavu.

²⁷ Yami kwe nabwile muze azazulwile lilu, ni Shimbu lize afunjikile mufunda wa kalunga lwiji,

²⁸ muze asele malelwa kwilu, muze ajikwile ha mashima ja kalunga lwiji.

²⁹ Nambile meya a mu kalunga lwiji ngwami, kanda azala kuhiana Shimbi ya Zambi. Kwe nabwile muze asele fundamentu ya hashi.

³⁰ Nabwile ku sali lienyi ngwe mukwa kusongwela, tangwa ha tangwa nabwile uwahililo wenyi. Nawahilile ku meso jenyi matangwa eswe,

³¹ nikwivwa chiseke ni he hashi, ni akwa hashi eswe.

³² “Haliabwila yenu akweze, ngubanjikenu. Lingenu ngwe chize ngunambe, mba munuwahilila.

³³ Ngubanjikenu. Bwenu akwa mana, kanda nulelesa longeso liami.

³⁴ Mutu yoze wakungubanjika, kakuwahilila, yoze wakumana ku chikolo chami tangwa ha tangwa, nikushimbwila ku chajilo chami.

³⁵ Mutu yoze manguwana, mabwa ni mwono, ni Mwene Zambi mawahilila nenyi.

³⁶ Yoze kechi kunguwana malilimuna iye mwene; mweswawo Wakunguvutwokela kakuzanga kufwa.”