Yishima 7 - Mukanda Wa Zambi 1970

¹ Mwanami, funga maliji jami, kanda uvulama nichimwe yize ngunakwambe.

² Linga chize ngunambe, mba ubwe ni mwono. Funga longeso liami ngwe chize wakufunga meso je.

³ Funga longeso liami matangwa eswe; ulisweke mu mbunge ye.

⁴ Ambila mana ngwe: “Yena uli ndumbwami!” Kuli malinjekela amba ngwe: “Yena uli usoko wami.”

⁵ Maakufunga kuli mapwo ja mbala, kuli pwo yoze makubebieka ni maliji jenyi.

Pwo chitanji

⁶ Limwe tangwa te nguli mu zuwo liami, ngunatale haze mu kapenda.

⁷ Yingumona ho akweze anji yizuzuke, alioze yihabwa umuwika chizuzuke kuhiana akwo eswe.

⁸ Te kanabalika mu jila hehi ni konda kuze te anatwama umwe pwo. Yabalikila hehi ni zuwo lia mwe pwo

⁹ ha ola ya chingoloshi, ha kajimba usoko.

¹⁰ Mba mwe pwo yalitakana ni mukweze yoze; yalihenyesa ngwe chitanji, yabwa ni manyonga a kumubebieka.

¹¹ Te kali mukwa hamu, keshi sonyi, te kakwendangana chinji,

¹² hanji mashimbwila ha makano, tangwali mu majila, tangwa likwo mu yitanda.

¹³ Yakangayika mukweze yoze, yamushisa, yamutala lume zaaa ha tutumba twa meso, ngwenyi:

¹⁴ “Hinalambula milambu yami, ni milambu ya yifwo nguli nayo.

¹⁵ Kashika hinatuhuka haze ni kukufupa. Te hinazanga kukumona, kuma hano hiuli!

¹⁶ Hinala muhela wami ni mahina a fwifwima a ku chifuchi cha Egiptu.

¹⁷ Hinamwangina ho maji a vumba libema, ni mira, ni yilombo, ni sinamone.

¹⁸ Tweya! Tulilweze zango ufuku weswe. Tuliwahise ni zango.

¹⁹ Lunga liami keshiko. Hanayi mu wenyi usuku.

²⁰ Kanakaya ni mbongo jinji, makahiluka hakachi ka kakweji.”

²¹ Chenacho amwesekele ni ulembekese wenyi, yamushinjila ni kubebieka chenyi.

²² Mwe mukweze yaya nenyi nikawashi ngwe kuji a ngombe yoze maya ku chishihilo, ngwe kai yoze unambe kufwa mu muheto,

²³ uze muutuwa mbunge yenyi, ngwe chize kajila akufwa ha Wanda, kanyingikine ngwenyi, nguli mu utoji.

²⁴ Kashika haliabwila ana jami, ngubanjikenu. Kanyamenu ku yize ngunambe.

²⁵ Kanda utayiza pwo ngwe yoze kukupiangula, kanda umukaula.

²⁶ Mumu halimbwisa malunga anji, hashiha anji kuhiana.

²⁷ Nyi waya ku zuwo lienyi, hiwanjila mu jila yize yinatwala muma lia afu. Muufwa nikawashi.