Yishima 6 - Mukanda Wa Zambi 1970

Kukanyamisa cheka ni cheka

¹ Mwanami, hiwahana chifungo kuli mukwenu, nyi?

² Hiwalihisa ku maliji je ni ku yilakenyo ye, nyi?

³ Mwanami, nyi Chenacho, nyingika ngwe, uli mu chiyulo cha mutu yoze. Alioze ha kutuhuka mo linga chino: lipupwise, yako kuli iye, uliondele kuli iye, akutusule.

⁴ Kanda uya tulo, kanda unongwoka.

⁵ Litusule ngwe chize akulinga kai muze anachina yanga, ngwe kajila mu muheto wa mukwa kumutela.

⁶ Yena mukwa ngwaza, yako kuli tungenyengenye, uzewule ndako jo, ulilongese mana.

⁷ Keeshi kasongo, chibwe mwata, chibwe mukwa kwayula,

⁸ alioze kaakulifupila yakulia ha mwaka Ubema, ni kuyitulika ha matangwa a kukungika mbuto.

⁹ Mukwa ngwaza ola jingahi mabomba ha muhela? Shimbu lika mahinduka kama?

¹⁰ Kakwamba ngwenyi: “Manguchibombe kama, manguchilisusuminye kama, nguhwime hamwe hakepe.”

¹¹ Alioze ha shimbu lize te anabombo, uswale muumuheta ngwe mwiji ni uta wenyi.

¹² Yingandangali ni yingulungulu kaakulikungulula ni kuhanjika mahuza.

¹³ Kaakulitenya ni kuliwondawonda ku yipaya ni kwonga,

¹⁴ alioze muze akulinga Chenacho, nikulita ni kubiha cha mbunge jo kweswako akuya, kaakuneha Vunda.

¹⁵ Kashika susumuku lamba mulialundumukina, maafwa kwo, niumwe keshi kuhasa kwawuka.

^16-19 Kuli yuma shimbiali yize Zambi akuvutwokela, yize keshi kutayiza: liso lia kulizelula, ni kanwa lia mahuza, ni moko akushiha atu waze keeshi yitela, ni mbunge ya uhenge, ni molu akutambuka aye ni kulinga yibi, ni chela yoze wakulamikiza akwo milonga, ni mutu yoze wakukoka Vunda mukachi ka masepa.

Kukanyamisa hakutwala ku utanji

²⁰ Mwanami, linga yize tatenu anakulweze, kanda uvulama nichimwe yize akulongesele noko.

²¹ Funga maliji jo matangwa eswe, afunge mu mbunge ye.

²² Longeso lio mulikusongwela muze unende, mulikufunga ha ufuku, mulikwaha mana ha mwalwa.

²³ Shimbi jo jili ngwe ndeya; kufumba cho muchihasa kukulongesa kubwa ni ndako jibema.

²⁴ Mujihasa kukufunga kuli mapwo abi, ni ku kubebieka cha mapwo ja mbala.

²⁵ Kanda akweseka ni ubeme wo; kanda ukwachika ku kukoka cha meso jo.

²⁶ Lunga mahasa kulinga yibi ni twamishi chitanji ni ndando ya mbolo yimuwika, alioze nyi malinga utanji ni pwo lia mbala matokesa yeswe yize ali nayo.

²⁷ Muuhasa kumbachila kahia mu zalilo ye, hindu mahina je keechi kuwema, nyi?

²⁸ Muuhasa kuliata ha makala a kahia, hindu kuuchi kuwema, nyi?

²⁹ Chimuwika nawa ni yoze malimona ni pwo lia mbala. Mweswawo machilinga mamona lamba.

³⁰ Atu keeshi kuyunga mwiji muze aneyi yuma mumu kanafu zala.

³¹ Hindu nyi haamukwata, chamutamba kuhilwisa ye yuma yisuho shimbiali, chamutamba kuhana yeswe yize ali nayo.

³² Alioze mutu yoze malinga utanji keshi manyonga niamwe. Kanalishihi iye mwene.

³³ Atu maamulelesa, maamulamba; neye kumevwa sonyi jize kujishi kuhwa.

³⁴ Lunga, nyi hevwa ukwa kakubwa ni ufwatulo unji. Kukala chenyi kuchishi kusula.

³⁵ Keshi kutayiza fweto niyimwe; chibwe ubite woka naye hindu wuli wenyi kuushi kuhwa.