Yishima 5 - Mukanda Wa Zambi 1970

Ku kanyamisa hakutwala ku utanji

¹ Mwanami, kanyama, banjika ku mana ni malinjekela jami.

² Mba muunyingika ndako jibema, ni maliji je maasolola yinyingi ye.

³ Mivumbo ya pwo lia mbala kuyasenena ngwe maji, maliji jenyi maahasa kuyema ngwe wuchi,

⁴ alioze ku songo lia yuma yeswe, kusasa ni lamba wika.

⁵ Makakutwala muma lia afu; jila yize akwenda yili ya kufwa.

⁶ Keshi kukaula jila ya mwono; kakupianguka, alioze keshi kuchinyingika.

⁷ Ana jami, ngubanjikenu, kanda nuvulama nichimwe yeswe yize ngunambe.

⁸ Lifunge kuli pwo ngwe yoze! Kanda ukundama ku zuwo lienyi!

⁹ Nyi ka, makulelesa, ni yena muufwa shimbu uchili mukweze mu moko ja yiswii.

¹⁰ Mba yilambala maakazuka ubite we, ni yuma yeswe yize wabichile ha matangwa ja mwono we muyikabwa ya mutu weka.

¹¹ Muukafwa nikuteta ha muhela we, manyinga je ni musunya we muyikahwa.

¹² Mba muukamba ngwe: “Mumu yika nevwile kubiha ha kufumba cha atu? Mumu yika nalitunyine yoze wangukanjishile?

¹³ Nalelesele alongeshi jami, nalitunyine longeso lio.

¹⁴ Mba susumuku nevwile sonyi kuhiana ku meso ja atu eswe.”

¹⁵ Bwako ni mbunge yibema kuli pwo lie, umuzange iye wika.

¹⁶ Ana waze muusema ni pwo weka keechi kakulingila nichimwe chibema.

¹⁷ Ana je chaatamba kutatuka ni kukukwasa, hi yilambala ko.

¹⁸ Kashika Wahilila ni pwo lie, ubwe ni chiseke ni yoze wambachile,

¹⁹ mubema ni mukwa vumbi. Akuwahise ni tulo jenyi, akulembejeke ni zango lienyi matangwa eswe.

²⁰ Mwanami, mumu yika muuzanga chitanji? Mumu yika muuzanga kukwata ha tulo ja pwo lia mbala?

²¹ Mwene Zambi kakumona yuma yeswe yize wakulinga. Kweswako wakuyaya, kakutala.

²² Shili ya chingulungulu yili ngwe muheto; kakufwa ha Wanda wa uhenge wenyi mwene.

²³ Kakufwa mumu keshi kulifumba. Uhepuke wenyi muukamutwala mu fuka.