Yishima 4 - Mukanda Wa Zambi 1970

Kufumbuka cha mana

¹ Ana jami banjikenu longeso lia tatenu. Kanyamenu mba hanga nubwe ni malinjekela.

² Longeso liami lili libema, kashika kanda nulivulama.

³ Muze nabwile mwana mukepe, mwana wa wika wa yisemi jami,

⁴ tata te kakungulongesa. Te kakungwamba ngwenyi: “Iwuluka yize ngunakulongesa, kanda uvulama nichimwe. Linga chize ngunakwambe, mba hanga ukabwe ni mwono.

⁵ Bwako ni mana ni malinjekela! Kanda uvulama hanji kulelesa yize nakukulongesa.

⁶ Kanda ulituna mana, mumu mana kumaakufunga; azange, mba ubwe ni uhwimino.

⁷ Kubwa ni mana chili Chuma chahiana. Yeswe yikwo muuzanga, hatangu achililongese malinjekela.

⁸ Zanga mana, mba maakupwisa mutu mulemu. Nyi muwakakaminya, maakulemesa.

⁹ Maabwa ngwe chipangula che cha uhenya.”

¹⁰ Mwanami, banjika kuli yami. Tayiza chize ngunakulongesa, mba muubwa ni mwono wa matwangwa anji.

¹¹ Hingunakulongesa mana ni ndako jibema.

¹² Nyi unende ni mana Chuma nichimwe muchikukwika, ni muze muuzomboka kuuchi kutalinga.

¹³ Matangwa eswe iwuluka yize hiunalilongesa. Kulilongesa chili mwono we, funga longeso kanawa.

¹⁴ Kanda wenda mu jila ya yingulungulu. Kanda wimbulula ndako jo.

¹⁵ Kanda uchilinga! Ehuka yibi! Litune yo, yako mu jila ye.

¹⁶ Yingulungulu keeshi kuhasa kuya tulo, shina muze haalinga Chuma chibi. Keeshi kuya tulo shina muze haalimbula umwe mutu.

¹⁷ Ungulungulu ni kushiha atu, kuli ayo yili ngwe kulia ni kunwa.

¹⁸ Jila ya akwa ululi yili ngwe kuvumbuka cha tangwa, kuliakutemuka hakepe hakepe ndoo tangwa mulisoloka liakulu.

¹⁹ Alioze jila ya yingulungulu yili kwayo milima bwii. Kaakulimbuka, alioze keeshi kumona Chuma chize chinaalimbwisa.

²⁰ Mwanami, banjika kanawa chize ngunambe, ivwa kanawa maliji jami.

²¹ Kanda wa atokesa nichimwe. Ewuluke, afunge mu mbunge ye.

²² Maapwisa ni mwono, maatakamisa yoze makaabanjika.

²³ Funga mbunge ye, mumu che chishina cha mwono we.

²⁴ Kanda uhanjika mahuza nichimwe, chibwe maliji a kupiangula.

²⁵ Tala lume kanawa kulutwe; kanda utala hashi ni sonyi.

²⁶ Shishika kanawa ha yize unalingi, mba yeswe yize muulinga muyiwaha.

²⁷ Kanda upiangukila chibwe ku chindume chibwe ku chimeso, kanda wenda mu jila yibi.