Yishima 31 - Mukanda Wa Zambi 1970

Maliji a kukanyamisa mwanangana

¹ Wano kaali maliji waze naye ya mwanangana Lemuele amulongesele, ngwenyi:

² “Yena uli mwanami wa lunga nakwichile kuli Zambi, nakukuzanga. Kuchi mungukwamba?

³ Ngwami: kanda ukunjika tachi je jeswe ni mbongo je jeswe kuli mapwo, mumu mapwo haabihisa mianangana anji.

⁴ Lemuele, banjika! Mianangana kuchatambile kunwa vinyu hanji kwivwa pwila ya walwa usasu.

⁵ Mumu muze maanwa, maavulama Shimbi, ni keeshi kubatula ni ululi.

⁶ Walwa uli wa atu waze anambe kufwa, ni waze ali mu luyinda.

⁷ Anwe kwo hanga avulame uswale wo ni lamba lio.

⁸ “Hanjikila kama atu waze kaanyingikine yihanjika. Funga atu alelu.

⁹ Ahakwile, bwako ngaji mukwa ululi. Funga yiswale ni akwa kuhona.”

Pwo wa ndako jibema

¹⁰ Chili chikalu kuyuka pwo wa ndako jibema! Kali ni ulemu Wahiana mawe a ndando yinji.

¹¹ Lunga lienyi kakushachila hali iye, kechi kubwa chiswale nichimwe.

¹² Ha matangwa eswe a mwono wenyi, kakumulinga yibema, keshi kumulinga chibi nichimwe.

¹³ Kakufupafupa wona wa mapanga ni Wanda wa swaa, kakulinga milimo yenyi ya moko ni chiseke.

¹⁴ Kakuya kusuku ni kusaka yakulia ni kuyineha ku zuwo lienyi, ngwe chize akulinga mato ja akwa kulanjisa.

¹⁵ Kakulimeneka shimbu kuchili ufuku ni kutelekela akwa zuwo lienyi yakulia ni kulweza tuvumbi twenyi a mapwo yize chaatamba kulinga.

¹⁶ Kakwendesa munda, mba maulanda; kakulima minda ya vinyu ni mbongo jize hafumbula iye mwene.

¹⁷ Kali mukwa tachi kakuhondangana milimo.

¹⁸ Kananyingika ulemu wa yuma yize akulinga, ndeya yenyi kuyishi kujima ha ufuku.

¹⁹ Kakuhosa Wanda wenyi, kakulinga mahina jenyi iye mwene.

²⁰ Kakukwasa yiswale ni akwa kuhona.

²¹ Keshi kwivwa woma hakutwala ku chishika, mumu akwa zuwo lienyi eswe kaali ni mahina a chishika.

²² Kaakulitungila mahina alemu akulifuka, kakuzala mahina abema a ufungo.

²³ Atu kaakunyingika lunga lienyi kanawa, kakutwama mu mbunga ya akwa kuyula.

²⁴ Kakutunga mahina ni miya ni kuyilanjisa kuli akwa kulanjisa.

²⁵ Kali mukwa tachi, ni atu kaakumusa vumbi, keshi kwivwa woma ku yuma yize muyikeza kulutwe.

²⁶ Kakuhanjika ni mana ni kakulongesa ni utu.

²⁷ Kakuhondangana matangwa eswe, kakutala akwa jiko lienyi kanawa.

²⁸ Ana jenyi kaakumuwahisa, ni lunga lienyi kakumuchichimieka.

²⁹ Ngwenyi: “Mapwo anji kaali abema, alioze yena unahiana eswe.”

³⁰ Ubeme wa ku meso uli wamokomoko, alioze chinabeme kuchichimieka pwo yoze wakulemesa Mwene Zambi.

³¹ Chinabeme kumuchichimieka ha yitanga yenyi yeswe. Atu eswe amulemese.