Yishima 30 - Mukanda Wa Zambi 1970

Maliji ja Agure

¹ Wano kaali maliji a Agure mwana wa Jake, ngwenyi: “Zambi keshi hamwe ni yami, Zambi keshi hamwe ni yami, ngunalele.

² “Yami ngunalele, nguli ngwe kashitu hi nguli ngwe mutu ko; Chishi ni mana aze mutu chatamba kubwa no.

³ Chalilongesele mana niamwe, chanyingikine nichimwe hakutwala kuli Zambi.

⁴ Iya hanazezuka kama anyingike mana a mwilu? Iya hanakwata kama fuji mu kwoko lienyi? Hanji hanambata kama meya mu limwe hina? Hanji hanalulika njiza ja hashi? Jina lienyi iya, nyi unamunyingika? Jina lia mwanenyi iya?

⁵ “Zambi kakumanununa yilakenyo yenyi yeswe. Kali ngwe lukebwe kuli eswe waze aswama muli iye.

⁶ Kanda uwezela ku maliji jenyi. Nyi ka, iye makukanjisa ni kukwamba ngwenyi, uli mukwa mahuza.”

Yishima yikwo

⁷ Zambi, ngunakwichi, ungwehe kama yuma yaali shimbu kanda ngufwa:

⁸ ngufunge, kanda nguhanjika mahuza, ni kanda ungutayiza kubwa pichi hanji chiswale. Ngwehe lume yakulia yize yinalite.

⁹ Nyi nabwa ni yuma yinji, tangwa likwo mungulituna yena. Alioze nyi nabwa chiswale tangwa likwo mungwiya yuma ni kuvwisa yena Zambi sonyi.

¹⁰ Kanda ubajila kavumbi ku meso ja kako. Nyi ka, makushinga, muumona lamba.

¹¹ Kuli amwe atu waze akushinga atato, keeshi kuwahisa anaye.

¹² Kuli atu akwo akunyonga ngwo kaali abema, alioze kaali akwa luchisa.

¹³ Kuli atu waze akunyonga ngwo kaali abema, kaa kulengumuka kuhiana.

¹⁴ Kuli amwe atu yiswii, akumwesa yiswale ni akwa kuhona lamba; kaakwatambwola ubite wo.

¹⁵ Zambo kakwete ana aali a mapwo, eswe aali majina jo: “Ngwehe!” Kukuli yuma yiwana yize kuyishi kukuta:

¹⁶ muma lia afu, ni pwo mumba, ni mavu omu, ni kahia kaze kakulekwoka.

¹⁷ Mwana yoze wakulelesa tato ni keshi kusa naye vumbi mu ushinakaji wenyi, chinalite yikwakwalo kumulia hanji chiselele ku tombongona meso jenyi.

¹⁸ Kuli yuma yiwana yize yangukalila ha kuyinyingika:

¹⁹ chize akwenda tela mu tetela, ni chize akwenda kapela ha liwe, ni chize wato wakwenda ha meya, ni chize lunga ni pwo akulizanga.

²⁰ Pwo chitanji, kakulinga ngwe chino: malinga utanji, masana, mba mamba ngwenyi: “Chalingile kwami chibi nichimwe!”

²¹ Kuli yuma yiwana yize akwa hashi keeshi kutayiza:

²² ndungo yoze habwa mwanangana, ni chihepuke yoze habwa ni yakulia yinji,

²³ ni pwo wa ndako yibi yoze haya ku ulo, ni mwana pwo kavumbi yoze masalakana kako.

²⁴ Kuli tushitu awana hano hashi, kaali akepe akepe alioze kaali ni mana kuhiana:

²⁵ Tungenyengenye: kaali alelu, alioze kaakutulika yakulia yo akalie ha lushiho.

²⁶ Seji: keeshi tachi alioze kaatwama mu milundu ya mawe.

²⁷ Makumbi: keeshi mwanangana, alioze kaakwenda ha mikana.

²⁸ Tusulu: muuhasa kwakwata mu kwoko, alioze muhasa kwawana nawa mu mazuwo ja mianangana.

²⁹ Kuli yuma yiwana yize muulishimwoka ha kuyimona chize yinende:

³⁰ Tambwe, tushitu a tachi kuhiana, keeshi kuvwila niumwe woma;

³¹ ni makuji a pembe, ni ndemba a tusumbi, ni mianangana ku meso ja atu jo.

³² Nyi mu uhepuke we walengumuka, unakamba kulinga yibi, achimana, uchishinginyeke.

³³ Nyi muuchinga yamwa, muubwa ni maji a kulia. Nyi muulamba umwe ha zulu, mulihita manyinga. Nyi muuvwisa mukwo wuli, muukoka Vunda.