Yishima 3 - Mukanda Wa Zambi 1970

Longeso kuli akweze

¹ Mwanami, kanda uvulama yize ngunakulongesa. Matangwa eswe iwuluka kulinga yize ngunakulongesa.

² Longeso liami mulikwaha mwono Ubema wa miaka yinji.

³ Kanda wecha umwenemwene ni kushishika. Yikashile mu kota ye; yiise mu mbunge ye.

⁴ Nyi wachilinga, Zambi ni atu maawahilila ni yena.

⁵ Shachila hali Mwene Zambi ni mbunge ye yeswe. Kanda ujikijila ha mana ja yena mwene.

⁶ Iwuluka Mwene Zambi mu yuma yeswe yize wakulinga, neye makulweza jila yoloka.

⁷ Kanda ulimona ngwe uli mukwa mana kuhiana; alioze lemesa Mwene Zambi, wehuke yibi.

⁸ Nyi wachilinga, muchibwa ngwe yitumbo yibema, yize muyiwuka yilonda ye ni kukuhuzulula.

⁹ Lemesa Mwene Zambi ni milambu ye, umulambule mbuto yitangu ya mu minda ye.

¹⁰ Nyi wachilinga, machila je maazala ni mbuto, ni yikwachilo ye muyisupwoka ni vinyu.

¹¹ Mwanami, kanda ulelesa kufumba cha Mwene Zambi, kanda ubihilila kukanyamisa chenyi.

¹² Mwene Zambi kakufumba waze anazange, ngwe chize tata akufumba mwanenyi yoze anawahilila nenyi.

¹³ Kawaha mutu yoze habwa mukwa mana, yoze habwa ni malinjekela.

¹⁴ Mana ni malinjekela kaahiana prata ni oru.

¹⁵ Mana kaahiana ulemu wa mawe a ndando yinji; nichimwe chize unazange muchilita no.

¹⁶ Mana maakwaha mwono unji, ni yinyingi, ni ulemu.

¹⁷ Mana maakuwahisa, maakufunga.

¹⁸ Mana kaali ngwe mutondo wa mwono; mukwa mana mabwa ni mwono ni uwahililo.

¹⁹ Mwene Zambi hanatange hashi ku mana jenyi; ku malinjekela jenyi hanalulika lilu.

²⁰ Ku mana jenyi hanazalisa njiji ni meya, kakunokesa vula hashi.

²¹ Mwanami bwako mukwa mana ni malinjekela, kanda watokesa nichimwe.

²² Kumaakupwisa mukwa mwono, mwono wa uwahililo.

²³ Mba muuhasa kwenda ni uhwimino mu jila ye, kuuchi kutalinga nichimwe.

²⁴ Kuuchi kwivwa woma muze unabombo ha muhela we, muubomba kanawa ufuku weswe.

²⁵ Kuuchi kwivwa woma wa lamba ngwe lize liakulundumukina hali yingulungulu.

²⁶ Mwene Zambi makufunga; kechi kukutayiza kufwa mu muheto.

²⁷ Kanda umina mukwa kuhona, nyi muuhasa kumukwasa.

²⁸ Kanda wambila mwenyembo we ngwe, Shimbwila ndoo hamene, nyi muuhasa kumukwasa musono.

²⁹ Kanda ulemeka mwenyembo we; iye kakutwama hehi ni yena, kakukufuliela.

³⁰ Kanda ulitachika ni mutu niumwe yoze keshi kwenyi chitela, yoze kakulingile chibi nichimwe.

³¹ Kanda wivwila akwa kushiha atu ukwa, kanda weembulula.

³² Mumu Mwene Zambi kakuvutwokela yingulungulu, alioze kakulikata ni akwa ululi.

³³ Mwene Zambi kakushinga mazuwo ja yingulungulu, alioze kakuwahisa mazuwo ja akwa ululi.

³⁴ Keshi kuzanga akwa kulengumuka, alioze kakulweza utu kuli akwa kulikehesa.

³⁵ Akwa mana maabwa ni lufuma, alioze yihepuke maaliwezela sonyi.