Yishima 29 - Mukanda Wa Zambi 1970

¹ Nyi wakukalisa mbunge tangwa lieswe lize akukukanjisa, limwe tangwa susumuku, makuwonda, kuuchi kuhinduka nawa nichimwe.

² Muze akwa ululi akuyula, atu kaakuwahilila. Alioze muze yingulungulu akuyula atu kaakunenganyana.

³ Mutu yoze wakuzanga mana kakuwahisa tato. Alioze chili uhepuke kumwanga mbongo ni walikata ni yitanji.

⁴ Muze mwanangana akuyula akwa chifuchi ni ululi, atu kaakutakama. Alioze muze akubwa ni lwahu wa mbongo, monona chifuchi cheswe.

⁵ Nyi wakubebieka masepa je, wakulitela muheto yena mwene.

⁶ Yingulungulu kaakwashiha mu shili yo ene, alioze akwa kutuwika mu mbunge kaakuwahilila ni kutwama kanawa.

⁷ Mutu mubema kakunyingika Shimbi jize chatamba kukaula hakutwala kuli yiswale, alioze yingulungulu keeshi kujinyingika.

⁸ Atu waze akulelesa akwo kaakuneha Vunda mu limbo heswe; alioze akwa mana kaakuhwimisa mbunge ja atu.

⁹ Muze umwe mukwa malinjekela masuma chihepuke mulonga, chihepuke mabutula lume kuseha hanji kutukana.

¹⁰ Akwa kushiha atu kaakuvutwokela akwa kutuwika mu mbunge eswe, alioze akwa ululi kaakwafunga kanawa.

¹¹ Yihepuke kaakusolola ufwatulo wo, alioze akwa mana kaakulihumikiza.

¹² Nyi mukwa kuyula kakubanjika ku maliji a mahuza, tuvumbi twenyi eswe maabwa akwa mahuza.

¹³ Chiswale ni yoze wakumubinjisa kaakulifwa mu Chuma chino: Mwene Zambi yaaha eswe aali meso.

¹⁴ Nyi umwe mwanangana mabatwila yiswale ni ululi, makayula miaka yinji.

¹⁵ Chinabeme kuhanjika ni kufumba ana. Alioze nyi ngwe mwana kakukaula jila yenyi mwene, makakolesa naye sonyi.

¹⁶ Muze yingulungulu kaali mu chiyulo, milonga muyoka. Alioze akwa ululi maakamona kulimbuka cha e yingulungulu.

¹⁷ Fumba mwane, mba muuwahilila nenyi. Kechi kukukolesa sonyi nichimwe.

¹⁸ Nyi Zambi keshi kusongwela limwe vungu, kachi atu kakubinda. Kawaha mutu yoze wakufunga Shimbi ja Zambi!

¹⁹ Kuwahashile kulongesa kavumbi ke ni kuhanjika nenyi wika. Ewa, mahasa kukwivwa, alioze kechi kusako mbunge.

²⁰ Unamono mutu yoze wakulipupwisa kuhanjika, nyi? Chinabeme kusa mbunge kuli chihepuke, hi kuli mutu yoze ko.

²¹ Nyi wakwaha kavumbi ke yeswe yize akuzanga, chize ku kukusemuka chenyi, tangwa mulikeza lize makatambula yuma ye yeswe.

²² Yifwatulo kaakukoka Vunda ni kuzwela.

²³ Kulengumuka muchikulimbwisa, alioze nyi uli mukwa kulikehesa, maakulemesa.

²⁴ Sepa lia mwiji keshi kuzanga mwono wenyi. Mumu atu maamumwesa lamba nyi mahanjika umwenemwene ku chisopelo. Alioze nyi malikala, Zambi mamumwesa lamba.

²⁵ Kuvwila atu woma chili ngwe muheto, alioze nyi wakushachila hali Mwene Zambi, unawaha kwe.

²⁶ Atu eswe kaakuzanga hanga mukwa kuyula alinge kanawa, alioze shina Mwene Zambi wakubatula ni ululi.

²⁷ Akwa ululi kaakuvutwokela yingulungulu; yingulungulu no kaakuvutwokela akwa ululi.