Yishima 27 - Mukanda Wa Zambi 1970

¹ Kanda ulichichimieka hakutwala ku tangwa lia hamene. Mumu kuwanyingikine yuma yize muyibwa hamene.

² Chinabeme atu akwo akuchichimieke, chibwe yilambala; alioze kanda ulichichimieka yena mwene.

³ Kulema cha liwe ni masekeseke, kuyishi kulita ni Vunda jize makoka chihepuke.

⁴ Ufwatulo uli uswii, kuwakushiha atu; alioze kuwahashile kuweseka ni ukwa.

⁵ Chibema kukanjisa mutu mwazu, alioze hi chibema ko akunyongene ngwenyi kuushi kumuzanga.

⁶ Sepa lie kali ni mbunge yibema chibwe kanakuvwisa chinyengo. Alioze muze mukwa kole ye makushisa, limuka!

⁷ Muze unakuta, muulituna wuchi, alioze muze uli ni zala, chibwe yakulia yisasu muyiyema.

⁸ Mutu yoze uli kusuku ni zuwo lienyi, kali ngwe kajila yoze uli kusuku ni chaswa chenyi.

⁹ Maji ni yitumbo ya vumba libema kuyakuwahisa, alioze Vunda kujakubinjisa mbunge.

¹⁰ Kanda uvulama masepa je hanji masepa a tatenu. Nyi uli mu lamba, kanda utambika yayenu yoze uli kusuku akukwase, tambika mwenyembo we yoze uli nenyi hakamwihi; mahasa kukukwasa kuhiana yayenu yoze uli kusuku.

¹¹ Mwanami, bwako ni mana, hanga nguwahilile. Mba mungubwa ni kumbululo kuli yoze manguchoka.

¹² Akwa kukanyama, muze maamona Vunda kujineza, keechi kuya ko, alioze yoze keshi manyonga manjila mo, mba ku songo himalinyenga.

¹³ Chihepuke yoze unalakenya kufweta kongo lia chilambala, chinabeme kukwata yuma yenyi chifungo.

¹⁴ Kuhindwisa sepa lie chichamene cheswe ni liji linene, chili ngwe Shingo.

¹⁵ Pwo wa chimbangwinya kali ngwe meya waze anasotoka ndwe, ndwe, ndwe, muze vula ananoko.

¹⁶ Ngwe kuchi muuhasa kumukanjisa? Kuchi, hiuneseka kulu kukanjisa fuji, nyi? Hanji kukwata maji mu kwoko lie, nyi?

¹⁷ Atu kaakulilongesa umwe kuli mukwo, ngwe chize utale wakwambwisa ukwo.

¹⁸ Mutu yoze mafunga mukuyu kanawa, makalia mihuko yawo. Kavumbi yoze mafunga mwene wenyi kanawa, neye makamulemesa.

¹⁹ Chizulie chize Wakumona ha meya chili huma lie. Chenacho nawa yena wakulimona mu mbunge ye.

²⁰ Usolo wa meso wa mutu kuushi kuhwa. Chenacho nawa muma lia afu kumushi kulituna kutambula afu.

²¹ Kahia kakweseka oru ni prata. Chenacho nawa atu akweseka lufuma wa mutu.

²² Chihepuke, chibwe muumutwa ngwe chize atu akutwa luba mu chinu ndoo mabwa hakamwihi ni kufwa, hindu kuuchi kuhasa kumuchiza uhepuke wenyi.

²³ Funga yimuna ye kanawa,

²⁴ mumu ubite kuushi kulinduluka. Chibwe mavungu keeshi kunyongonoka ndoo ku miaka yeswe.

²⁵ Wakulianga kubatula yambu ya mu chana, mba wakubatula nawa yambu ya ha mulundu muze uze ukwo hiwasoka.

²⁶ Muuhasa kulinga mahina ni wona wa mapanga je, ni kulanda minda ni mbongo jize hiwatambula muze hiwalanjisa amwe pembe.

²⁷ Pembe waze asala ho, muwakama yamwa ya kunwa ni kuhana kuli akwa jiko lie, ni kuli tuvumbi twe, ana mapwo.