Yishima 26 - Mukanda Wa Zambi 1970

¹ Kuchichimieka chihepuke, hi chibema ko; chili ngwe neve (neige) hanji vula ha tukweji a kubatula mbuto.

² Mashingo kaahashile kukulinga chibi nyi kuushi chitela. Kaali ngwe tujila waze anende mu tetela, keeshi kubwila nichimwe.

³ Chatamba kulamba kavwalu ni shikote (fimbo), ni kusongwela chimbulu ni lwoji, ni kulamba chihepuke ni kabama.

⁴ Nyi muukumbulula ku chihula cha uhepuke, yena muulifwa ni chihepuke wachihulanga.

⁵ Hana kumbululo lia uhepuke ku chihula cha uhepuke; hanga yoze wachihulanga anyingike ngwenyi, keshi ni mana ngwe chize ananyongo.

⁶ Mutu yoze matuma maliji ni chihepuke kali ngwe yoze habatula molu jenyi; kanalikokela Vunda.

⁷ Ngwe chize molu jenyi keeshi kukwasa Chilema, Chenacho yishima kuyahashile kukwasa chihepuke.

⁸ Kuchichimieka chihepuke kuchishi kukwasa nichimwe, chili ngwe kusa holo ha Chuma chize akwasa nacho mawe anene.

⁹ Chihepuke yoze unate chishima kali ngwe chizenge yoze uneseka kuchiza mungonga uze hiwamutuwa mu kwoko.

¹⁰ Mutu yoze wakuhana milimo kuli chihepuke mweswawo unabalika, kakumwesa atu lamba.

¹¹ Chihepuke yoze unalingi Chuma cha uhepuke chisuho cha muchaali, kali ngwe kawa yoze unahiluka ku yisajilo yenyi.

¹² Mutu yoze Unanyongo ngwenyi, nguli ni mana, alioze kuma keshi no, kali chihepuke munene Wahiana.

¹³ Mumu yika chihepuke keshi kutuhuka mu zuwo lienyi? Chika akuvwila woma? Tambwe, nyi?

¹⁴ Mukwa ngwaza kakwalumioka ha muhela wenyi, ngwe chize chajilo chakulicheka ku utale uze akuchikashila.

¹⁵ Atu akwo kaali akwa ngwaza kuhiana, kaahashile chibwe kusa yakulia mu makanwa jo ene.

¹⁶ Mukwa ngwaza kakunyonga ngwenyi kali ni mana anji, kuhiana malunga shimbiali waze maahasa kulumbununa manyonga jo kanawa.

¹⁷ Kunjila mu mulonga uze kuwakubanjile, chili ngwe kwendangana mu jila ni kukwata ku mutwe wa umwe kawa.

^18-19 Mutu yoze mapiangula mutu mukwo, mba mamba ngwenyi: “Ngunakusehesa lume,” kali ngwe chizaluke yoze unahehe ni chikungo cha jita.

²⁰ Nyi kukushi kunyi, kahia kukakujima; nyi kukushi mukwa mafwefwe, kuzwela muchihwa.

²¹ Ngwe chize kahia kakulekwoka muze atu maasa makala hanji kunyi, Chenacho nawa akwa Vunda akukolesa kuzwela.

²² Mafwefwe kaabema kaali ngwe yuma yize twakuzanga kulia.

²³ Maliji a ulembekese waze akusweka yuma yize unazange kulinga, kaali ngwe kukwita yinganga ha ndeho (yimbia) ya uma.

²⁴ Chilembese kakusweka kole yenyi mu maliji jenyi akubebieka.

²⁵ Maliji jenyi kaakusoloka abema, alioze kanda umufuliela, mumu kali ni kole mu mbunge yenyi.

²⁶ Mahasa kusweka kole yenyi, alioze mutu mweswe mamona yuma yibi yize akulinga.

²⁷ Yoze unashimi umbu hanga oze mo atu akwo, mafwa mo iye mwene. Yoze wakulangumwina mukwo luliwe, mulikamuwonda iye mwene.

²⁸ Mukwa mafwefwe kakuvutwokela atu waze akulamikiza. Maliji a ulembekese kaakunongesa atu.