Yishima 25 - Mukanda Wa Zambi 1970

Yishima yikwo ya mwanangana Solomone

¹ Yino yili yishima yikwo yize atele mwanangana Solomone, yize asonekene kuli tuvumbi twa mwanangana Hezekia wa Yuda.

² Twakulemesa Zambi mumu ha yuma yize akusweka; twakulemesa mianangana mumu ha yuma yize akulumbununa.

³ Kuwahashile kunyingika manyonga ja mwanangana; manyonga jenyi kaakutuhiana, kaali ngwe chize mwasuhwa mwilu ni kujotoka cha kalunga lwiji.

⁴ Chiza yinganga ku prata, mba fuli mahasa kufula Chuma chibema.

⁵ Chiza akwa kuyula abi ku meso ja mwanangana, mba wanangana wenyi muukola ni ululi.

⁶ Muze unamana ku meso ja mwanangana, kanda ulichichimieka, chibwe kumana homa hali atu alemu,

⁷ chibema nyi maakwamba ngwo: “Tweya kuno ku muhela ulemu,” hi chibema ko, nyi maakwamba ngwo: “Hana muhela we kuli mukwenu mulemu.”

⁸ Kanda ulipupwisa kutwala ku chisopelo Chuma chize hiwamona. Mumu nyi umwe chela mukwo makukumika ngwenyi; “Kuwamwene kanawa,” mba kuchi muulinga?

⁹ Nyi ngwe yena ni mwenyembo we nuli ni maliji waze analituchika, alulikenu yenwene, kanda nwambulula kuli atu akwo,

¹⁰ Nyi ka, umwe mevwa ngwo, yena wachambulula; mba muwivwa sonyi kuhiana.

¹¹ Nyonga lize linalite lili ngwe mihuko ya oru yakulamika ha prata.

¹² Kukanyamisa cha mukwa mana kuli mutu yoze mazanga kubanjika chili ngwe tuzeya twa oru hanji ngwe yingeliengelie ya oru yibema yahiana.

¹³ Kanganda wamwenemwene kuli yoze wakumutuma kali ngwe meya a chishika ha mwaka wakubatula mbuto.

¹⁴ Atu waze akulakenya kuhana yawana, hindu keeshi kuyihana, kaali ngwe malelwa ni fuji yize kuyishi vula.

¹⁵ Mutu yoze malembejeka ni mana mahasa kukununa atu akalu hanga alumune mbunge jo; mahasa kukununa chibwe mianangana.

¹⁶ Kanda ulia wuchi kuhiana; nyi ka, muusaza.

¹⁷ Kanda unangisa mwenyembo we yisuho yinji; nyi ka, makusekela ni kukuvutwokela.

¹⁸ Yoze mashindakenya mahuza hali mukwo, kali ngwe mukwale wa ku shiha nawo, hanji ngwe mweto, hanji mwivwi wa kukalula.

¹⁹ Ha tangwa lia lamba, nyi washachila hali mukwa mahuza, chili ngwe kweseka kunjakuna Chuma ni lizo lize linatekenga hanji ngwe kwenda ni kulu liasengunuka.

²⁰ Kwimbila mukwa chinyengo miaso ya chiseke, chili ngwe kuzula mahina ha tangwa lia chishika, hanji ngwe kusa mungwa ha chilonda.

²¹ Nyi mukwa kole ye kanevu zala, mulise; nyi kanevu pwila, mwehe meya anwe.

²² Kafwa ngwe wamwocha kahia ni kumwaha sonyi; Mwene Zambi makukundulula.

²³ Mukwa mafwefwe kakukoka wuli ngwe chize fuji yakuneha vula.

²⁴ Chili chibi kutwama ha fulumba lia zuwo, alioze chili chibi kuhiana kutwama mu zuwo hamwe ni pwo wa chimbangwinya.

²⁵ Kwivwa sango jibema ja ku chifuchi kusuku, chili ngwe kunwa meya akeke muze Unevu pwila yinji.

²⁶ Mukwa ululi yoze wakutayiza manyonga ja yingulungulu, kali ngwe shima lize liavunduka, hanji ngwe lize haasa utende.

²⁷ Hi chibema ko kulia wuchi unji, Chenacho nawa hi chibema ko kufupa kubwa mukwa lufuma.

²⁸ Nyi kuwahashile kulihumikiza mu ufwatulo we, yena uli ngwe limbo lize kulishi chipanga, chili chashi kulikumba.