Yishima 24 - Mukanda Wa Zambi 1970

-19-

¹ Kanda uvwila yingulungulu ukwa, kanda ulikata no.

² Kaakukoka Vunda; matangwa eswe muze akuhanjika kaakubinjisa atu akwo.

-20-

³ Atu kaakutunga mazuwo ha fundamentu ya mana ni yinyingi.

⁴ Kuze kuli yinyingi, mu yibatulo kaakusa mo yuma yilemu ni yibema.

-21-

⁵ Kubwa ni tachi chinabeme alioze kubwa ni mana chinahiana kubema. Chamwenemwene mana kaahiana tachi.

⁶ Mumu Chakutamba kululika kwasa jita, nyi wabwa ni akwa kuyula anji, muuhaasa kukumba.

-22-

⁷ Chihepuke keshi kunyingika ulumbunwiso wa yishima. Keshi kwamba nichimwe muze atu maasopesa yuma yilemu.

-23-

⁸ Nyi matangwa eswe wakutaka yuma yibi, shimbu likepe muubwa ni lufuma ngwo, mukwa Vunda.

⁹ Manyonga ja chihepuke kali abi. Atu kaakuvutwokela mutu yoze wakusaula atu akwo.

-24-

¹⁰ Nyi walekumuka ha tangwa lia lamba, chamwenemwene uli lume mukwa mulekeleke.

-25-

¹¹ Kanda uyambashana kulamwina umwe mutu yoze haabatwila kumushiha keshi chitela.

¹² Muuhasa kwamba ngwe: “Ayize hi milonga yami ko,” alioze Zambi kananyingika, kumakakubatwila. Kakukutala, kananyingika, makakufwetesa nikulita ni yize wakulinga.

-26-

¹³ Mwanami, liako wuchi, unabeme. Chishila cha wuchi chinayeme mu kanwa lie.

¹⁴ Chenacho nawa nyingika ngwe, kubwa ni mana chili chibema mu mwono we. Tambula mana mba muubwa kanawa ku miaka yeswe.

-27-

¹⁵ Kanda ubwa ngwe chingulungulu yoze wakweseka kwiya yuma ya mutu watuwika mbunge, hanji kububa zuwo lienyi.

¹⁶ Chibwe mukwa ululi malimbuka yisuho shimbiali, hindu majikiza nawa; alioze lamba liakushiha chingulungulu.

-28-

¹⁷ Kanda uwahilila muze mukwa kole ye mamona lamba, kanda wivwa chiseke muze halimbuka.

¹⁸ Mumu Mwene Zambi machimona, ni kechi kuchizanga; tangwa likwo kechi kumumwesa lamba.

-29-

¹⁹ Kanda ulibikala mumu hali yingulungulu; kanda weevwila ukwa.

²⁰ Mumu chingulungulu kechi kutwama kanawa kulutwe, keshi nichimwe chize masa mbunge.

-30-

²¹ Mwanami, wivwila Mwene Zambi woma, lemesa mwanangana. Kanda ulikata ni atu waze akwakatukila,

²² mumu maahasa kufwa susumuku. Kuwanyingika lamba lize Mwene Zambi chibwe mwanangana maahasa kwamwesa, nyi?

Yishima yikwo

²³ Akwa mana yaata yishima yino: Hi chibema ko ngaji kubatula milonga ni katonde.

²⁴ Nyi masambisa mukwa mulonga, atu eswe maamushinga, maamuvutwokela.

²⁵ Alioze ngaji waze maamwesa akwa milonga lamba, kumaawaha, kumaabwa ni lufuma mubema.

²⁶ Kumbululo liamwenemwene lili chinyingi cha Usendo wamwenemwene.

²⁷ Kanda utunga zuwo lie ni kululika ku mahie shina muze hiwalima minda ye. Mba muunyingika pundu ngwe, munguhasa kufumbula ni kutwama kanawa.

²⁸ Kanda ubwa chela wa mahuza nikuliongela mutu ni mukwenu. Kanda umulamikiza.

²⁹ Kanda wamba ngwe: “Mungumulinga ngwe chize hangulinga yami! Mungumuhilwishila yibi yize angulingile!”

³⁰ Nabaliele mu minda ya mukwa ngwaza, chihepuke.

³¹ Himunajiki ni mingonga ni yambu yibi. Chipanga cha mawe chize ajingilikile ko hichinabuuka.

³² Yingutala, yingushinginyeka hakutwala ku Chuma chize, yingulilongesa mana.

³³ Nongwoka, bomba nyi unazange. Sepekenya moko je, hwima kwe.

³⁴ Alioze ha shimbu lize unabombo, uswale muukuwana ngwe umwe mwiji ni uta wenyi.