Yishima 23 - Mukanda Wa Zambi 1970

-6-

¹ Muze unatwama nikulia hamwe ni mutu mulemu, nyonga chize abwa.

² Nyi uli mukwa lwahu wa yakulia, litale kanawa.

³ Kanda ubwa ni lwahu wa yakulia yenyi yibema; mumu tangwa likwo kanakweseka hanga akukwate.

-7-

⁴ Kanyama, kanda ulikatalisa kubwa pichi.

⁵ Mumu ubite we muuhasa kutoka nikawashi; muusoka mapulwa ni kuhumuka ngwe tela.

-8-

⁶ Kanda ulia ku mesa ya chijiji, hanji kubwa ni lwahu wa yakulia yenyi yibema.

⁷ Makwamba ngwenyi: “Liwezele yikwo,” alioze ku mbunge kazangile. Chize ananyongo, Chenacho abwa.

⁸ Kumuusaza yize hiwalia; ku chichimieka cheswe muchibwa chamokomoko.

-9-

⁹ Kanda weseka kuhanjika maliji a mana kuli chihepuke, keshi kwalula ngwe Chuma.

-10-

¹⁰ Kanda ututulula chinyingi cha njiza yikulu, hanji kutambula chifuchi cha mbala cha shiwa.

¹¹ Mumu Mwene Zambi, hako yo wa tachi, kumakaahakwila, kumakaasopela.

-11-

¹² Banjika kanawa longeshi ye, lilongese yeswe yize muuhasa.

-12-

¹³ Kanda wecha kufumba mwana; kechi kufwa nyi wamulamba ni kabama.

¹⁴ Kafwa ngwe, muchihasa kulamwina mwono wenyi.

-13-

¹⁵ Mwana, nyi wabwa mukwa mana, munguwahilila.

¹⁶ Mungwivwa chiseke muze mungwivwa maliji je a mana.

-14-

¹⁷ Kanda uvwila akwa shili ukwa; lemesa Mwene Zambi matangwa eswe.

¹⁸ Nyi wachilinga, muukawaha ndoo ku miaka yeswe.

-15-

¹⁹ Mwanami, banjika, bwako mukwa mana ni malinjekela, twama kanawa.

²⁰ Kanda ulikata ni akwa kuzengewa hanji akwa lwahu wa yakulia.

²¹ Mumu akwa kuzengewa ni akwa lwahu wa yakulia kumaabwa yiswale. Nyi wakulia kuhiana ni kuya tulo anji, muubwa ni uvu nikawashi.

-16-

²² Banjika kuli tatenu; nyi iye te keshiko, yena kuwahashile kusemuka. Nyi noko habwa kashinakaji, muse vumbi.

²³ Umwenemwene, ni mana, ni yinyingi, ni malinjekela kuyahiana ubite; kanda uyilanjisa.

²⁴ Tato ya mukwa ululi kakwivwa chiseke. Nyi mwane kali mukwa mana, muuhasa kuwahilila.

²⁵ Wahilisa tatenu ni noko, noko yoze wakusemene.

-17-

²⁶ Mwanami ngwehe mbunge ye, ngwimbulule.

²⁷ Mapwo yitanji ni mapwo ja mbala kaali miheto.

²⁸ Kaakukujikinyina ngwe yikwata, kaakuvulumwisa malunga anji.

-18-

^29-30 Akwa lamba aya? Akwa chinyengo aya? Akwa Vunda aya? Akwa kulinyenyeta aya? Akwa yilonda mumu ha kubinda cho ene aya? Akwa meso achiluluka aya? E akwa kuzengewa. Atu waze akuzanga vinyu yaha.

³¹ Kanda utayiza vinyu yikweseke, chibwe yinachili ni kulejima, yinafuluka mu musenge, chibwe yinayekemena ha muliu.

³² Hakusula muyibwa ngwe kapela wa utende wakusuma.

³³ Muumona ngwe mu yilota yuma yakuvwisa woma. Kuuchi kuhasa kunyonga hanji kuhanjika kanawa.

³⁴ Muuwivwa ngwe uli ni yikola ha kalunga lwiji, yikola ya kuzelwoka, ngwe yoze unabombo ha mutondo uze uli mu wato.

³⁵ Muwamba ngwe: “Haangulamba, haangufufula, alioze chisolo kwiwuluka kanawa. Mumu yika chahashile kulauka? Changutamba kunwa nawa.”